Што е саботна симс средба?
Неделна статија замислена да ја информира The Sims заедницата преку детално разгледување експанзии и бројни додатоци за култната симулација.
Преку критичка посвета на бројните новитетите поврзани со додатокот, ве известуваме за тоа што најдобро функционира во поглед на механиките и на какви сѐ работи би можеле да наидете за уредување на вашиот дом.
Моментно, The Sims 4 има 17 главни експанзии, 12 game пакети, и 20 stuff пакети. Целта на оваа статија е заеднички да поминеме низ сите нив!
Претходните саботи пишувавме за:
- Дружење со домашни миленичиња!
- Летен островски живот!
- Живот низ годишни времиња!
- Снежно бегство
- Селски живот
- Дружба под туѓ кров
- Да се јава коњ е да се лета без крилја
- Развивање еколошка свест
- Паранормално дружење
- Роб на сопствената работа
- Џунгла на асфалт
- Забавување со стил
Get Famous е шестата експанзија за популарната симулација The Sims 4. Проширувањето беше официјално најавено во октомври 2018 година, а излезе на 16 ноември истата година. Get Famous ве носи во блескавио свет на славните, заедно со сите компликации кои произлегуваат од таквиот гламурозен живот. Get Famous може да се смета за духовен наследник на легендарните претходници како The Sims: Superstar и The Sims 3: Late Night, внесувајќи го холивудскиот сон директно во вашите домови. Во случај да сонувате за дигитално стекнување слава, градење репутација и искусување на сите предности и недостатоци што ги носи животот на една ѕвезда, тогаш оваа експанзија треба да биде задолжително инсталирана на вашата конфигурација.
Преубаво, мало градче
Експанзијата воведува целосно нов, блескав свет со име Дел Сол Вели. Градчето е видливо инспирирано од сончевиот Лос Анџелес и културата на Холивуд. Светот се залага да ја отслика целата патека на еден уметник, од анонимен сонувач до мегаѕвезда, преку три карактеристични населби. Патешествието започнува во Mirage Park, предградие со поскромни домови каде што амбициозните Симс ги прават своите први чекори. Центарот на случувањата е Starlight Boulevard, гламурозна област каде што се наоѓаат VIP клубови како Orchid a-Go-Go, музејот Plumbob Pictures и секако, булеварот на славните. На овој булевар, вашите Симс можат да ја овековечат нивната, а со тоа, и вашата слава преку посебна дијамантска плоча.
Врвот на успехот е претставен со The Pinnacles – ексклузивна населба која е повчена во ридовите, каде што живеат само најголемите ѕвезди, нудејќи максимално ужување преку луксузни вили со спектакуларни погледи. Иако визуелно импресивен, светот Дел Сол Вели е често критикуван поради малиот број на парцели, што го прави да изгледа повеќе како детален филмски сет отколку како жив и динамичен град. Сепак, атмосферата на Холивуд е беспрекорно доловена, нудејќи совршена позадина за драмата и сјајот што ги носи славата.
Слава и репутација
The Sims 4: Get Famous воведува два клучни, меѓусебно поврзани системи, слава и репутација. Овие системи мајсторски го трансформираат начинот на кој вашите симс ликови комуницираат со светот, додавајќи длабочина на социјалната игра преку огромни предности и неочекувани предизвици. Славата може да се стекне на повеќе начини, давајќи ви голема флексибилност при изборот на патот до врвот. Најочигледниот пат е преку новата активна актерска кариера, каде симс ликовите одат на аудиции и снимаат филмови. Сепак, славата е достапна и за креативците како писатели, сликари и музичари. Сосема нов пат се отвора преку вештината за медиумска продукција, која им овозможува на ликовите да станат инфлуенсери преку снимање видеа и стримање во живо. Дури и дружењето со познати личности може да ви донесе дел од нивниот сјај.
Како што расте нивото на слава на скала од 1 до 5 ѕвезди, така вашите симсовци отклучуваат поени за слава. Овие поени потоа се користат за специјални поволности кои го обликуваат нивниот живот како позната личност. На почетокот, тие можат полесно да се дружат со други славни личности, а подоцна можат да ангажираат PR агенција, да формираат сопствена придружба, па дури и да лансираат сопствен бренд. Славата, меѓутоа, крие и исклучително темна страна. Со зголемување на популарноста, симс ликовите може да развијат негативни особини. Ваквите каприци се директна последица на нивниот животен стил. На пример, може да станат опседнати со папараците, да развијат аверзија кон физички допир, или да станат зависни од својот телефон. Каприците се трајни и додаваат реален предизвик во управувањето со животот на славните.
Одвоен, но подеднакво важен е и системот за репутација, кој не мери колку сте познати, туку како ве доживува јавноста. Репутацијата се движи од одлична до ужасна и се менува врз основа на вашите постапки, како што се донации во хуманитарни цели или јавни караници. Добрата репутација носи попусти и полесно склопување пријателства, додека лошата предизвикува страв и презир кај другите ликови. Важно е што славата и репутацијата можат да бидат во целосна спротивност, овозможувајќи ви да создадете глобална суперѕвезда со ужасна репутација или помалку познат, но сакан уметник.
Зад камерите
Најголемата иновација во проширувањето The Sims 4: Get Famous е воведувањето на активна актерска кариера. За разлика од пасивни кариери кои беа стандардни за претходните експанзии, ова значи дека вие сега можете целосно да ги следите вашите симсовци на нивното работно место и директно да управувате со сите нивни задачи и интеракции за време на снимањето. Оваа промена го прави искуството многу подинамично и попривлечно.
Првиот чекор е да се приклучите на една од двете достапни агенции за таленти: Everyday Extras Talent Agency или A-Lister Talent Agency. Агенцијата Everyday Extras е достапна веднаш и нуди почетни, пониско платени улоги, додека A-Lister Talent Agency станува достапна откако вашиот Симс ќе стекне одредена слава и овозможува пристап до попрестижни и подобро платени ангажмани. По приклучувањето во агенција, вашиот Симс може да пребарува и да аплицира за аудиции за најразлични проекти, вклучувајќи реклами, ТВ серии и филмови, притоа земајќи ги предвид барањата за вештини за секоја улога.
Кога вашиот лик ќе добие улога, вие патувате заедно со нив до студиото Plumbob Pictures во новиот свет Del Sol Valley. Пред да започне снимањето, има низа задолжителни задачи кои мора да се извршат. Овие задачи вклучуваат шминкање, облекување костими специфични за улогата, вежбање на текстот за да се усоврши изведбата, и разговарање со режисерот за подобрување на односот и потенцијално отклучување нови опции. Исто така, интеракциите со другите актери на сетот можат позитивно да влијаат на целокупниот квалитет на сцената.
Кулминацијата на процесот е самото снимање на сцената. Успехот на вашиот Симс во голема мера зависи од нивното ниво на актерска вештина, но и од изборите што ги правите. Играта ви дава опции за безбедна или ризична изведба. Безбедните изведби гарантираат пристоен резултат, додека ризичните изведби имаат потенцијал за голем успех и поголема слава, но исто така носат и ризик од неуспех, што може негативно да се одрази на снимената сцена. Успешните изведби придонесуваат за зголемување на славата, која отклучува бројни поволности како препознавање од обожаватели, формирање групи со следбеници, јавни настапи, и пристап до VIP области.
Освен самата актерска кариера, The Sims 4: Get Famous воведува и поширок систем на слава и репутација. Секој успешен актерски ангажман и перформанс придонесува за зголемување на славата на вашиот Симс, што отклучува низа придобивки и привилегии во светот на играта. Покрај славата, важна е и репутацијата, која се гради врз основа на акциите на вашиот Симс и може да биде позитивна или негативна, влијаејќи на нивната кариера и социјален живот. Новиот свет Del Sol Valley е специјално дизајниран да го поддржи животот на славните личности, со луксузни вили и ексклузивни места. Кариерата е забавна, интерактивна и нуди детален увид во предизвиците и наградите на филмската индустрија.
Што друго ќе најдете во Get Famous?
Покрај горе-споменатите работи, режимот Create a Sim се проширува со нови фризури, облека во холивудски стил, но и интересни додатоци како лузни и златни заби. Тука е и новата особина поврзана со себичност и нарцисоидност која ги прави симс ликовите да се опседнати со себеси и постојано бараат внимание. Од друга страна, режимот за купување и градење отвора дополнителни можности преку огромен број на луксузни предмети, вклучувајќи мебел со златни детали, огромен сеф за пари во кој може да се, ахем, спие, како и професионална опрема како зелени екрани, камери и дронови. Во поглед на нови вештини и аспирации ќе наидете на вештините за глума и медиумска продукција, како и на аспирациите за светска слава и врвен актер. Тежнеење да се надградуваат овие вештини за да се исполни ултимативната цел е забавен нов начин за искусување на оваа култна симулација.
Вреди ли да се стане славен?
Искуството со експанзијата The Sims 4: Get Famous е солидно и добро осмислено проширување кое успешно го интегрира светот на славните во играта. Еден од најголемите адути на оваа експанзија е длабокиот систем за слава и репутација кој има реално влијание врз гејмплејот, менувајќи ги интеракциите на вашиот Симс со другите, отворајќи нови можности и предизвици како што расте нивната слава. Дополнително, активната актерска кариера е често истакнувана како една од најдобро реализираните и најинтерактивни кариери во целата франшиза The Sims. Способноста директно да го контролирате вашиот Симс на снимање, да извршувате задачи и да правите избори кои влијаат на перформансите, додава неверојатна длабочина и чувство на контрола.
Ако сте љубител на раскажување приказни, сакате да истражувате нови, интерактивни кариери и ве привлекува идејата за гламурозен, но и драматичен живот на славна личност, тогаш оваа експанзија ќе го збогати вашето искуство и ќе внесе нова динамика и можности за играње со аспектите на славата и јавноста.
Повеќе детали за играта
- Произведува: Maxis
- Издава: Electronic Arts
- Жанр: симулација
- Платформа: Microsoft Windows, конзоли
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
