Што е саботна симс средба?
Неделна статија замислена да ја информира The Sims заедницата преку детално разгледување експанзии и бројни додатоци за култната симулација.
Преку критичка посвета на бројните новитетите поврзани со додатокот, ве известуваме за тоа што најдобро функционира во поглед на механиките и на какви сѐ работи би можеле да наидете за уредување на вашиот дом.
Моментно, The Sims 4 има 17 главни експанзии, 12 game пакети, и 20 stuff пакети. Целта на оваа статија е заеднички да поминеме низ сите нив!
Претходните саботи пишувавме за:
- Дружење со домашни миленичиња!
- Летен островски живот!
- Живот низ годишни времиња!
- Снежно бегство
- Селски живот
- Дружба под туѓ кров
- Да се јава коњ е да се лета без крилја
- Развивање еколошка свест
- Паранормално дружење
- Роб на сопствената работа
- Џунгла на асфалт
- Забавување со стил
- Слава по секоја цена!
Објавена на 15 ноември 2019 година, The Sims 4: Discover University е осмата експанзија за популарната симулација на живот. Оваа проширување конечно го враќа долгоочекуваното универзитетско искуство во светот на The Sims 4, исполнувајќи г желбите на долгогодишните фанови така што воведува нови механики кои го прават академскиот живот подлабок и подинамичен од кога било досега.
Добредојдовте во Britechester
Стандардно за вакви, чистокрвни експанзии, Discover University воведува целосно нов свет. Britechester е дом на два ривалски универзитети со дијаметрално спротивни филозофии и естетика. Од една страна, универзитетот во Britechester е инспириран од класичните британски универзитети како Оксфорд. Овој кампус зрачи со историски шарм, стари камени градби и фокус на уметноста и хуманистичките науки. Ова е место за Симови кои ја ценат традицијата и престижот.
Од друга страна, институтот Фоксбери е ултрамодерен, технолошки напреден кампус кој потсетува на современите американски универзитети. Со фокус на науката, технологијата и иновациите, ова е идеално место за Симови кои гледаат кон иднината.
Покрај двата кампуса, светот вклучува и населба наречена Gibbs Hill, која им овозможува на студентите, но и на обичните Симови, да живеат надвор од кампусот, со што се нуди поголема флексибилност во споредба со претходните универзитетски пакети во серијалот. Се работи за преубаво-дизајниран свет со раздвижени ликови и уникатни градби. Britechester е еден од поомилените градови на фановите, нешто во што и самите се уверивме по само едно часовно скитање низ градот.
Академскиот живот и кариерни можности
Срцето на експанзијата е академскиот систем. Симовите можат да се запишат на еден од двата универзитети и да изберат од тринаесет различни дипломи, вклучувајќи биологија, компјутерски науки, историја на уметност, па дури и криминал. Секоја диплома е поврзана со одредени вештини и нуди значителни предности во кариерата по дипломирањето.
Студирањето е сериозна работа. Симовите мора да посетуваат предавања, да работат на семинарски работи и презентации, и да учат за завршните испити. Успехот на факултет директно влијае на нивните оценки, а добриот просек отвора врати за престижни дипломи кои носат уште подобри бонуси во кариерата. На овој начин, управувањето со времето станува клучно – дали вашиот Сим ќе ја помине ноќта во библиотека или на забава? Во зависност од таквите, ваши одлуки, иднината на ликот ќе биде значително поразлична. Имено, по успешното дипломирање, Симовите добиваат предност при вработување во новите кариери како право, образование и инженерство, почнувајќи од повисока позиција и со поголема плата.
Студентски живот надвор од училницата
Discover University не е само за учење. Пакетот воведува богат социјален живот. Симовите можат да живеат во студентски домови со цимери, што создава динамични и честопати хаотични ситуации. Дружењето со колегите, забавите со „juice pong“, играњето пинг-понг или фрлањето фризби се само дел од активностите.
Симовите исто така можат да се приклучат на разни училишни организации како дебатен клуб, уметнички клуб, клуб по роботика или дури и мистериозно тајно друштво. Овие активности не само што се забавни, туку и развиваат вештини и градат пријателства.
За првпат, воведени се и велосипеди, кои се практичен и забавен начин за истражување на големиот свет на Britechester.
Нови карактеристики и враќање на омилени елементи
Оваа експанзија е полна со нови, долго посакувани содржини. Па така обожавателите на The Sims 2: Open for Business ќе бидат израдувани од враќањето на Серво. Преку новата вештина роботика, Симовите можат да конструираат и активираат целосно функционален, играчки робот кој станува дел од семејството.
Паралелно со ова, покрај роботиката, воведена е и вештината истражување и дебата, која е клучна за академскиот успех. На располагање имате и нови предмети и опции за персонализација. Имено, пакетот вклучува мини-фрижидери, тоалетни кабини, заеднички тушеви и многу нови предмети за декорација на студентските соби.
Додадени се и нови опции во Create a Sim режимот, работи како пирсови на лицето и минималистички тетоважи. За да се осети вистинската тежина на студирањето, воведени се студентски кредити и стипендии, што додава слој на реализам во планирањето на образованието. Внимавајте што правите во тој поглед затоа што ако вашите Симови не си ги плаќаат сметките, подгответе се за посета од стариот познаник кој ќе им заплени дел од имотот.
The Sims 4: Discover University е робусна и содржајна експанзија која успешно го враќа универзитетскиот живот со доволно длабочина и новини за да биде свежо искуство. Таа нуди одлична рамнотежа помеѓу академските предизвици и социјалната забава, давајќи ви нова, долгорочна цел за нивните Симови. Со воведувањето на два различни универзитети, нови кариери и враќањето на омилениот Серво, овој пакет е задолжителен за секој играч кој сака да го збогати своето искуство во The Sims 4 со нова димензија на игра.
Повеќе детали за играта
- Произведува: Maxis
- Издава: Electronic Arts
- Жанр: симулација
- Платформа: Microsoft Windows, конзоли
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
