Овој викенд е поразличен, забележувате, нели? Новата училишна година започна и учениците се наоѓаат на интересна пресвртница и со само два дена пред започнување на училишните обврски. Токму поради тоа, играта со која ќе се дружите викендов потребно е да биде посебна. Во тој поглед, ние никако не седевме со скрстени раце. Неделава се дружевме со ко-оп фантазиската акција Mist Slayer и емоционалната авантура Somerville. Некаде помеѓу овие две игри, успеавме одлично да си поминеме и со долго-очекуваната Immortals of Aveum. Но, тоа не е сѐ што успеавме да провериме!
The Bridge Curse Road to Salvation хорор играта излезе и за конзоли!
The Bridge Curse Road to Salvation е вашата карактеристична хорор игра која ви дозволува да се распаметите во прво лице. Преку истражување, прикрадување, решавање загатки и рецитирање молитви, ќе пробате да го задржите разумот додека околу вас се шушкаат суптилни наговестувања за паранормално лудило.
Во играта ќе бидете дел од група студенти кои немаат попаметна работа па ќе пробаат да ја откријат мистеријата која стои зад озлогласениот проколнат мост. Во форма на документарец или преку стриминг во живо, групата ќе открива докази, но вистината која ќе ја откријат нема да им се допадне. Доколку сте фанови на хорори во стилот на б-филмови, тогаш The Bridge Curse Road to Salvation ќе ви се допадне, особено ако решите да ја одиграте играта со глумата на кинески јазик.
Како што напоменавме, во чедото на SOFTSTAR ENTERTAINMENT потребно е истражување на морничавите места, барање најразлични докази, решавање загатки, но и криење од духови. Графичкиот енџин остава впечаток како да не може да стои раме-до-раме со помодерните алтернативи, загатките не се премногу предизвикувачки, а прикрадувањето се состои од бегање, криење во тесни и темни места и споро движење во насока подалеку од духовите.
И покрај тоа што играта нема ништо ново да понуди, сепак успева да ве вовлече во угнетувачкиот свет. Темните бои и вознемирувачките звуци, полека, но сигурно ви се вовлекуваат под кожа, а паметно-осмислените jump-scare-ови ќе ве натераат да го преколнувате моментот кога решивте да ја почнете играта. Она што сакаме да кажеме е дека The Bridge Curse Road to Salvation е страшна игра и никако не би требало да ја играте сами, со исклучени светла, и со слушалки.
Повеќе детали за играта
- Произведува: SOFTSTAR ENTERTAINMENT
- Издава: SOFTSTAR ENTERTAINMENT
- Жанр: FPS хорор
- Платформа: Microsoft Windows, конзоли
- Излезена на: 31 август 2023
Оценка
- Вкупна оценка: 7.5
- Приказна: 7
- Гејмплеј: 7
- Графика: 8
- Звук и музика: 8
Up or Lava! e Battle Royale! Но, со трчање. И многу скокање!
Денеска излезе и невообичаен спин-оф на натпреварувачките игри со до 100 играчи. Во суштина, Up or Lava! е едноставна игра со уште поедноставен концепт преземен од популатната социјална игра The Floor is Lava. Па така, вие и уште 99 други играчи се натпреварувате за ултимативното прво место така што се трчате, скокате и се туркате!
Играта ја почнувате на улица, а набргу ќе биде потребно да се искачите на врвот така што ќе скокате на најразлични предмети кои прават одреден пат до врвот. Трчајќи кон целта, можете да скокате или да се качувате на препреки и внимавате на замки, а доколку некој се осмели да ви се приближи можете да пробате да го клоцнете во лавата под вас.
Намерно или не, Up or Lava! ни остави впечаток на исклучително несмасна игра, со неверодостојни анимации и ограничувачки аудио дизајн. Но, она што го има е сосема функционално, барем за брза и кратка забава. Уште во првата минута ќе се прилагодите на начинот на трчање и скокање од препрека на препрека. Ова е игра особено забавна во друштво или за стриминг бидејќи е полна со непредвидливи моменти каде само дел од секунда ве дели од ултимативниот пораз.
Повеќе детали за играта
- Произведува: Garden of Dreams
- Издава: Garden of Dreams
- Жанр: Авантура
- Платформа: Microsoft Windows
- Излезена на: 1 септември 2023
Byte Lynx e адреналинска стратегија во која градите, но не управувате со единици!
И како последна трета игра за викендов би сакале да ви препорачаме една невообичаена стратегија чија кампања за еден играч комбинира елементи на StarCraft и Go. Во Byte Lynx, потребно е да ги насочите силите кон градење база, поставување напојни линии и градење платформи. Најновото надополнување на играта само ја проширува забавата со нови мапи и режими за ширење уште поголем хаос на мапите.
При градење база во Byte Lynx, потребно е да го поврзувате главниот штаб со напојни линии. Додека вие работите на вашата експанзија преку напојните линии, потребно е да барате слабости во напојните линии на непријателот, да пробате да ги уништите и да му ја отсечете енергијата. Ова е двонасочен однос и паралелно со ваквата офанзива, мора да внимавате и на агресивните тактики на непријателот. Па така, потребно е да градите структури кои ќе ги елиминираат можните слабости, ќе ги засилат вашите напојни линии и ќе ја спречат секоја можна инфилтрација на непријателот.
Една од најинтересните механики во Byte Lynx е тоа што ви дозволува да градите офанзивни платформи кои имаат улога на battering ram. Благодарение на ова, со огромна леснотија и невиден графички спектакл навлегувате во непријателскате територија и ги уништувате туѓите одбрамбени структури и напојни линии. Низ сите 20 мисии од кампањата, остварувањето на девелоперите Artful Games тврдоглаво бара паметно тактизирање, но ве наградува со бесконечни можности на еуфорично издвојување победа!
Повеќе детали за играта
- Произведува: Artful Games
- Издава: Artful Games
- Жанр: RTS, Tower Defense, стратегија
- Платформа: Microsoft Windows, конзоли
- Излезена на: 31 август 2023
Оценка
- Вкупна оценка: 8.5
- Приказна: 7
- Гејмплеј: 9
- Графика: 9
- Звук и музика: 9
Ви фаќа ли око некоја игра или би сакале да ни препорачате некоја сосема друга?
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
