Услови за користење на IT.mk

1. Користење на IT.mk

IT.mk ги опфаќа порталот, Форумот, Огласникот, IT.mk/Маркет, IT.mk/Кариера, IT.mk/Индекс, IT.mk/Мапирање, PRO членството и други постоечки или идни сервиси достапни преку IT.mk. Корисникот се обврзува сервисите да ги користи законски, одговорно и без да ги нарушува правата на IT.mk, другите корисници или трети лица. Забрането е користење на IT.mk за:

• незаконски активности;
• измама, phishing, malware или други злоупотреби;
• закани, вознемирување или дискриминација;
• објавување туѓи лични или доверливи информации без основ;
• нарушување авторски, сопственички или други права;
• автоматизирано преоптоварување или попречување на сервисите;
• неовластено тестирање или искористување безбедносни слабости.

2. Кориснички профил

При регистрација корисникот е должен да доставува точни информации и да ја одржува безбедноста на својата сметка. Корисникот е одговорен за активностите направени преку неговата сметка. Не е дозволено:

• користење туѓ профил без дозвола;
• претставување како друго лице или компанија;
• лажно претставување како член на тимот на IT.mk;
• отворање дополнителни профили со цел избегнување ограничување или забрана.

IT.mk може да ограничи, суспендира или затвори профил во случај на прекршување на правилата, злоупотреба, безбедносен ризик или активност што може да предизвика штета на IT.mk, неговите корисници или трети лица.

3. Модерација

IT.mk го задржува правото да:

• отстрани или измени содржина;
• премести или затвори тема;
• ограничи одредени функционалности;
• суспендира или затвори профил;
• спречи повторна регистрација;
• преземе други разумни мерки за заштита на платформата и заедницата.

Мерките може да бидат преземени и без претходно известување кога ситуацијата го бара тоа.

4. Корисничка содржина

Корисникот останува носител на правата врз содржината што ја создава и потврдува дека има право да ја објави и дека со неа не ги повредува правата на трети лица. Со јавно објавување на IT.mk, корисникот му дава на IT.mk неисклучиво право содржината да ја хостира, прикажува, форматира, технички обработува, архивира, дистрибуира и промовира во рамките на функционирањето и промоцијата на IT.mk и неговите сервиси. Јавно објавените дискусии може да останат достапни и по затворање на профилот кога нивното отстранување би ја нарушило смислата и интегритетот на дискусијата, освен кога применливите прописи бараат поинаку.

5. Интелектуална сопственост и бренд

Името IT.mk, логото, визуелниот идентитет, графичките елементи, дизајнот, софтверот, ознаките, беџовите, PRO и оригиналната редакциска содржина се сопственост на ИВМ Нетворк или се користат врз основа на соодветно право. Не е дозволено без претходна дозвола:

• претставување како официјален партнер или претставник на IT.mk;
• користење на логото или брендот на начин што создава впечаток на поддршка или партнерство што не постои;
• копирање или клонирање значителни делови од IT.mk;
• систематско преземање на базата на содржини;
• комерцијално препакување или препродавање содржини.

6. Автоматизирано преземање и AI

Не е дозволено систематско scraping, crawling или автоматизирано преземање содржини со цел:

• создавање комерцијални бази на податоци;
• републикација;
• создавање конкурентни сервиси;
• тренирање AI/ML модели;
• креирање datasets;
• масовно профилирање на корисници;

без претходна писмена дозвола од IT.mk. Ова ограничување не се однесува на стандардно индексирање од интернет-пребарувачи и други технологии одобрени од IT.mk.

7. Комерцијална употреба

Промоција на производ, компанија, услуга или проект мора да биде во согласност со правилата на конкретниот сервис. IT.mk може да побара комерцијалните субјекти да користат профил „Верификувана компанија“, спонзорирана тема, рекламен формат или друг соодветен комерцијален сервис.

8. Надворешни сервиси

IT.mk може да содржи линкови или интеграции со надворешни сервиси. IT.mk не управува со нив и не одговара за нивната содржина, достапност, безбедност или услови за користење.

9. Достапност

IT.mk не гарантира непрекината достапност на платформата или на одредена функционалност. Сервисите може да бидат изменети, привремено прекинати или укинати поради одржување, безбедност, деловни или технички причини или други околности надвор од разумната контрола на IT.mk.

10. Ограничување на одговорност

IT.mk вложува разумни напори платформата да биде безбедна и функционална, но не гарантира дека сите информации објавени од корисници, компании, партнери или трети лица се точни, целосни или постојано ажурирани. До максималниот степен дозволен со закон, IT.mk не одговара за:

• содржина објавена од корисници или трети лица;
• трансакции помеѓу корисници во Огласникот;
• неточни информации доставени од компании или други субјекти;
• одлуки за вработување донесени преку IT.mk/Кариера;
• производ, испорака или гаранција кога трето лице е јасно наведено како продавач, освен за сопствените законски обврски на IT.mk како оператор на платформата;
• привремена недостапност или прекин на сервисите;
• индиректна штета во случаи кога таквото ограничување е дозволено со закон.

Ништо во овие Услови не исклучува или ограничува одговорност или права кои согласно закон не можат да бидат исклучени.

11. Измени

IT.mk може периодично да ги менува овие услови и да менува, дополнува, ограничува или укинува одделни функционалности и сервиси. Кај материјални измени ќе биде објавено известување со датум на стапување во сила на IT.mk или преку друг соодветен канал.

12. Применливо право и спорови

За овие услови се применуваат законите на Република Северна Македонија. IT.mk и корисникот ќе настојуваат евентуалните спорови најпрво да ги решат по мирен пат. За спорови за кои не може да се постигне договор, надлежен е стварно и месно надлежниот суд во Република Северна Македонија, освен кога задолжителните правила за заштита на потрошувачите предвидуваат поинаку.

13. Приватност

Обработката на личните податоци при користење на IT.mk е регулирана со Политиката за приватност на IT.mk. При користење на IT.mk/Маркет, податоците неопходни за реализација на нарачката може да бидат споделени со конкретниот продавач, курирската служба, платежните оператори и други субјекти неопходни за реализација на трансакцијата. Деталите за категориите податоци, целите и правниот основ на обработката, периодите на чување и правата на корисниците се наведени во Политиката за приватност. Информациите за употребата и управувањето со колачиња се наведени во Политиката за колачиња.

14. Малолетни лица

Малолетните лица може да користат корисничка сметка само во обем во кој тоа е дозволено со применливите прописи и, кога е потребно, со согласност или одобрение од родител, старател или законски застапник. Нарачка на производ, платено членство или друга платена услуга од малолетно лице може да се изврши само кога лицето има законска способност за конкретната трансакција или со претходна согласност или одобрение од родител, старател или законски застапник. IT.mk или продавачот може да побара разумна потврда за таквата согласност или овластување.

15. Делумна ништовност

Доколку одредена одредба од овие Услови биде утврдена како ништовна, неважечка или неприменлива, тоа нема да влијае врз важноста и применливоста на останатите одредби.

1. Спам и рекламирање

Строго е забранет спам. Не е дозволено користење на Форумот првенствено за:

• рекламирање компанија;
• промовирање производ или услуга;
• SEO и поставување линкови;
• affiliate промоција;
• собирање leads;
• пренасочување корисници кон сопствен сајт или сервис.

Повремено споменување сопствен производ или компанија во релевантна дискусија е дозволено кога е суштински поврзано со темата и комерцијалната поврзаност е јасно наведена.

2. Скриена комерцијална активност

Не е дозволено лице поврзано со компанија, бренд, продавница или сервис да се претставува како независен корисник со цел скриена промоција. Поврзаноста треба јасно да се открие кога членот:

• е сопственик;
• е вработен;
• работи за компанијата;
• добива финансиска или друга корист од неа.

IT.mk може да побара ваквата активност да продолжи преку профил „Верификувана компанија“ или друг комерцијален формат.

3. Однесување

Национализам, расизам, сексизам, говор на омраза и друга дискриминација не се дозволени. Не се дозволуваат:

• директни закани;
• лично вознемирување;
• повторено таргетирање на член;
• stalking;
• doxxing;
• објавување приватни информации без дозвола.

Несогласување и критика се дозволени. Лични напади не се.

4. Јазик и култура

Членовите треба да комуницираат разбирливо и со основно ниво на почит. Вулгарни кориснички имиња, прекумерни навреди и намерно провокативно однесување може да бидат санкционирани. Во секции каде традиционално се дозволува поопуштена дискусија може да има поголема толеранција, но закани, сериозни навреди и вознемирување и таму не се дозволени.

5. Теми и релевантност

Форумот е првенствено наменет за ИТ, технологија и сродни теми. Содржини надвор од тие теми треба да се објавуваат во соодветните off-topic секции. Не објавувајте намерно неповрзани мислења или содржина што ја нарушува дискусијата.

6. Форматирање

Прекумерно користење:

• ГОЛЕМИ БУКВИ;
• смајли;
• интерпункција;
• големи фонтови;
• непотребно форматирање;

може да биде изменето или отстрането. Насловот на темата треба јасно да опишува за што се дискутира.

7. Потписи и профили

Потписите и профилите не треба да се користат како бесплатен рекламен простор. IT.mk може да отстрани комерцијални линкови, банери или друга промотивна содржина.

8. Авторски права

Не објавувајте пиратски материјали или содржини што незаконски нарушуваат авторски или други права. Кога пренесувате туѓа содржина, наведете го изворот и авторот кога е познат.

9. Недозволена содржина

Забранета е содржина која е незаконска или чија примарна цел е овозможување незаконска активност. Порнографска содржина не е дозволена.

10. Обвинувања кон лица и компании

Корисниците може да споделуваат негативни искуства и критики. Кога се изнесуваат сериозни фактички обвинувања против лице или компанија, IT.mk може да побара дополнително објаснување или доказ и може да ја отстрани содржината ако процени дека создава неоправдан правен или безбедносен ризик. IT.mk не е арбитер и не гарантира точност на тврдењата на членовите.

11. Претставување

Забрането е:

• лажно претставување како друго лице;
• имитирање член на администрацијата;
• лажно претставување како претставник на компанија;
• создавање профили чија цел е заблуда.

12. Модерација

Администраторите и модераторите може без претходно предупредување:

• изменат или избришат мислење;
• затворат или преместат тема;
• издадат предупредување;
• ограничат пристап;
• суспендираат профил;
• трајно забранат профил.

Одлуките може да се базираат и на историја и образец на однесување, а не само на една конкретна порака. IT.mk може, но не е должен, да даде детално образложение за секоја модераторска одлука.

13. Избегнување забрана

Отворање нов профил или користење туѓ профил за избегнување изречена забрана или ограничување е дополнително прекршување.

14. Приватни пораки

IT.mk не ги третира приватните пораки како јавна содржина. Кога порака е пријавена од учесник во разговорот или кога постои оправдан безбедносен или законски основ, овластени лица може да ја разгледаат за потребите на модерација, безбедност или исполнување законска обврска.

15. Огласник

Купување и продажба преку Форумот е дозволено само во Огласникот и согласно посебните правила за Огласник. IT.mk не гарантира успешност на зделките меѓу членови.

1. Право на огласување

Пристапот до Огласникот, со цел да се зголеми квалитетот на огласите и да се избегнат злоупотреби, може да биде условен со:

• старост на профилот;
• активност на Форумот;
• статус на членство;
• други критериуми утврдени од IT.mk.

Актуелните услови се прикажуваат во самиот сервис.

2. Точност на огласот

Огласувачот е одговорен информациите и фотографиите да бидат точни. Треба јасно да се наведат:

• производот;
• реалната состојба;
• цената;
• познатите значајни оштетувања или дефекти;
• гаранцијата, доколку постои;
• други информации што може материјално да влијаат на одлуката на купувачот.

3. Право на продажба

Со објавување оглас, корисникот потврдува дека има право да го продаде или понуди производот. Не е дозволена продажба на:

• украдени производи;
• фалсификати;
• производи чија продажба е незаконска;
• нелегален софтвер или содржини;
• други предмети забранети со закон или правилата на IT.mk.

4. Комерцијални продавачи

Огласникот првенствено е наменет за зделки меѓу членови. Компании и лица кои систематски продаваат производи со комерцијална цел не смеат да се претставуваат како приватни продавачи. IT.mk може да побара користење профил „Верификувана компанија“ или друг комерцијален пакет.

5. Огласи за други лица

Не е дозволено заобиколување на условите преку објавување оглас во име на лице кое нема право на огласување.

6. Зделки

Купувачот и продавачот сами ги договараат:

• цената;
• плаќањето;
• доставата;
• проверката на производот;
• гаранциите;
• другите услови.

IT.mk не е страна во договорот меѓу нив.

7. Верифициран статус

Ознаката „Верифициран“ или сличен статус значи само дека IT.mk извршил конкретен вид проверка или дека профилот исполнува одредени критериуми. Ознаката не претставува гаранција од IT.mk за:

• идентитетот во секоја ситуација;
• платежната способност;
• квалитетот на производот;
• исполнувањето на договорот;
• успешноста на зделката.

8. Измама и сомнителна активност

IT.mk може да отстрани оглас, да побара дополнителни информации или да ограничи профил доколку постои основано сомнение за измама, злоупотреба или незаконска активност. Во случај на сомневање за кривично дело, корисниците треба да се обратат до надлежните институции. IT.mk може да соработува со надлежни органи и да достави податоци кога за тоа постои важечки законски основ.

9. Одговорност

IT.mk не одговара за:

• неплаќање;
• непраќање производ;
• неисправен производ;
• лажно претставување;
• измама;
• оштетување при транспорт;
• други спорови меѓу купувач и продавач.

Ништо во овие правила не ограничува права или одговорност кои согласно закон не можат да бидат исклучени.

1. Улога на IT.mk/Маркет

Поголемиот дел од физичките производи достапни на IT.mk/Маркет ги продаваат трети лица, регистрирани трговци и партнери на IT.mk. Кога за одреден производ изречно е наведено дека продавач е IT.mk / ИВМ Нетворк, ИВМ Нетворк е продавач на тој производ. Во сите останати случаи договорот за продажба се склучува помеѓу купувачот и партнерот наведен како продавач. Тековни партнери преку кои се продаваат производи на IT.mk/Маркет се:

• НЕКСИО КОМПЈУТЕРИ ДОО увоз-извоз Скопје: Адреса: ул. Воденска бр. 6, Скопје, Карпош; телефон: 02 614 2599; ЕМБ: 7068883; ЕДБ: МК4057015530266.
• Салон 29 ДОО: Адреса: ул. Брадфордска бр. 2, Скопје; телефон: 02 309 2671; ЕМБ: 5221510; ЕДБ: МК4030998344370.

Листата на партнери може да се менува и дополнува.

2. Одговорности на продавачот

Кога производот го продава партнер, партнерот како продавач е одговорен за:

• точноста и ажурноста на описот, спецификациите, фотографиите и другите информации за производот;
• достапноста и залихата на производот;
• точноста на цената доставена до IT.mk;
• пакувањето, исполнувањето на нарачката и испораката;
• сообразноста на производот, гаранцијата и сервисирањето;
• постапувањето по рекламации, дефекти, замена, повлекување или враќање на производот согласно важечките прописи;
• издавањето на соодветната фискална сметка, фактура, гарантен лист или друга документација кога е применливо.

IT.mk обезбедува техничка инфраструктура за презентација и нарачување на производите и може да посредува во комуникацијата помеѓу купувачот и продавачот. Освен кога за конкретен производ изречно е наведено дека IT.mk е продавач, IT.mk не е производител, увозник, дистрибутер или продавач на производот и не ја презема одговорноста на продавачот за неговиот квалитет, исправност, гаранција, достапност или испорака. Ниту една одредба од овие Услови не ги ограничува задолжителните права на потрошувачите или законските обврски што не можат договорно да бидат исклучени. Продавачот е одговорен за производот, информациите за производот, залихата, исполнувањето на нарачката, испораката, сообразноста, гаранцијата и рекламациите. IT.mk управува со онлајн продажниот простор и обезбедува техничка инфраструктура и поддршка согласно своите законски обврски.

3. Цени

Цените на IT.mk/Маркет се прикажани во македонски денари. Прикажаните цени ги вклучуваат сите применливи даноци, освен кога изречно е наведено поинаку. Редовната цена на производот е јасно прикажана на страницата на производот. Кога се применуваат попусти, промотивни цени или други поволности, условите за нивно користење се означуваат кај производот или промоцијата. Дополнителните трошоци, вклучувајќи ги трошоците за испорака кога постојат, се прикажуваат пред потврдување на нарачката.

4. PRO цени и попусти

Членовите со активно IT.mk PRO членство може да имаат право на посебни попусти на одредени производи. Кај производите за кои постои PRO поволност:

• редовната цена останува јасно прикажана;
• PRO цената или вредноста на PRO попустот е посебно означена;
• попустот важи само под условите наведени за конкретната понуда;
• PRO цените може да се разликуваат по производ и временски период.

PRO попустот не значи дека секој производ на IT.mk/Маркет има намалена цена за PRO членови.

5. Рангирање на производи

IT.mk/Маркет не користи еден заеднички сложен алгоритам за рангирање. Производите се прикажуваат во одделни секции, при што релативната важност на параметрите е следна:

• во секцијата „Најново“, датумот на додавање е примарен параметар, а производите се прикажуваат почнувајќи од најновите;
• во секцијата „Најголеми попусти“, висината на активниот попуст е примарен параметар, а производите со поголем попуст се прикажуваат пред производите со помал попуст;
• производите означени како достапни на залиха може да се прикажуваат по случаен редослед, при што ниту еден производ нема приоритет во рамките на случајно избраниот сет.

Редоследот може да се менува при секое вчитување кога се користи случајно прикажување. Платеното или спонзорираното позиционирање може да има предност пред вообичаениот редослед само кога позицијата е јасно означена како платена или спонзорирана.

6. Нарачки и достапност

Прикажувањето на производ на IT.mk/Маркет не претставува гаранција дека производот во секој момент е достапен. По поднесување на нарачка може да се изврши дополнителна проверка на залихата кај продавачот. Нарачката може да биде одбиена или откажана доколку:

• производот повеќе не е достапен;
• продавачот доставил погрешна информација за цена, спецификација или залиха;
• постои техничка или очигледна грешка;
• продавачот објективно не може да ја реализира нарачката.

Корисникот ќе биде известен за откажувањето. Ако за таквата нарачка веќе е извршено плаќање, средствата ќе бидат рефундирани согласно применливите правила за плаќање.

7. Склучување на договор и потврда на нарачка

Пред поднесување на нарачката, купувачот може да ги прегледа и исправи внесените податоци. Пред финалното поднесување јасно се прикажуваат продавачот, производите, количините, поединечните цени, вкупниот износ, трошокот за испорака и избраниот начин на плаќање. На почетокот на процесот на наплата јасно се прикажуваат прифатените начини на плаќање и сите применливи ограничувања за испорака. Финалното копче за поднесување мора недвосмислено да означува дека нарачката создава обврска за плаќање, со текст „Нарачка со обврска за плаќање“ или друг законски недвосмислен еквивалент. По поднесувањето на нарачката, купувачот добива електронска потврда на наведената адреса за е-пошта. Потврдата ги содржи бројот и датумот на нарачката, продавачот, производите, количините и цените, информациите за испорака и релевантните информации за правата на потрошувачот.

8. Испорака

Испораката на физички производи преку IT.mk/Маркет е ограничена на територијата на Република Северна Македонија. Испораката ја организира продавачот преку курирска служба, односно брза пошта, освен ако за конкретниот производ или нарачка не е наведено поинаку. Вообичаените рокови за испорака се:

• 1 до 3 дена за Скопје;
• 3 до 7 дена за други градови и населени места во Северна Македонија.

Овие рокови се информативни и не претставуваат гарантиран рок, освен ако за конкретната нарачка изречно не е договорено поинаку. До доцнење може да дојде поради недостапност на производот, курирската служба, празници, временски услови, неточни податоци за испорака или други околности надвор од разумната контрола на IT.mk или продавачот. Трошокот за испорака, доколку постои, се прикажува пред финалното потврдување на нарачката.

9. Право на повлекување и враќање

Кога купувачот има статус на потрошувач и кога согласно закон е применливо правото на повлекување од договор склучен на далечина, потрошувачот може да се повлече од договорот во рок од 14 дена без наведување причина. Кај продажба на производ, рокот започнува од денот кога потрошувачот или лице определено од него, различно од превозникот, физички ќе го прими производот. Кога една нарачка содржи повеќе производи што се испорачуваат одделно, рокот започнува од приемот на последниот производ. Потрошувачот може да го оствари правото на повлекување преку:

• образецот за повлекување достапен на IT.mk/Маркет; или
• друга недвосмислена изјава со која го известува продавачот за својата одлука.

По поднесување на барањето за повлекување, производот треба да биде вратен согласно инструкциите на продавачот и применливите прописи. Потрошувачот е должен да го врати или испрати производот на продавачот или на лице овластено од продавачот без непотребно одлагање, а најдоцна во рок од 14 дена од денот кога го известил продавачот за својата одлука за повлекување, освен ако продавачот самиот го преземе производот. Директниот трошок за враќање на производот е на товар на потрошувачот, освен ако продавачот се согласил да го преземе трошокот или ако применливите правила предвидуваат поинаку. Правото на повлекување не се применува во случаите за кои законските прописи предвидуваат исклучок.

10. Рефундација

Кога потрошувачот законски и навремено се повлекол од договорот, продавачот ги враќа сите плаќања примени од потрошувачот и, кога тоа е законски применливо, трошокот за првичната стандардна испорака. Рефундацијата се врши најдоцна во рок од 14 дена од денот кога продавачот е известен за одлуката за повлекување, освен кога согласно закон продавачот има право да го одложи враќањето на средствата до прием на производот или доказ дека производот е испратен назад. Враќањето на средствата се врши со истото средство за плаќање користено при првичната трансакција, освен ако со потрошувачот изречно не е договорено поинаку и без дополнителен трошок за потрошувачот по тој основ. Кога производот го продава партнер на IT.mk, партнерот како продавач е одговорен за одобрување и извршување на рефундацијата. IT.mk може да помогне во комуникацијата и обработката на барањето. Ако IT.mk / ИВМ Нетворк е изречно наведен како продавач, рефундацијата ја извршува ИВМ Нетворк.

11. Гаранција, сообразност и рекламации

За секој производ важат законските права на потрошувачот во однос на сообразноста на производот. Кога производот има дополнителна комерцијална гаранција, нејзиното времетраење и условите се наведуваат со производот или во гаранциската документација. Комерцијалната гаранција не ги ограничува законските права на потрошувачот. Кога производот го продава партнер, рекламациите поврзани со производот, дефектите, сообразноста, гаранцијата, сервисирањето и испораката ги обработува продавачот. IT.mk може да помогне во комуникацијата со продавачот преку своите канали за поддршка, но не ја заменува законската или договорната одговорност на продавачот.

12. Потрошувачки приговори

Потрошувачки приговор може да се поднесе преку достапните законски дозволени канали, вклучително и по е-пошта. За проблем со IT.mk/Маркет, приговор може да се поднесе преку [email protected] или на 02 3224 582. Поднесувањето приговор е бесплатно. За прашања поврзани со самиот производ, гаранцијата, сообразноста, испораката или враќањето, корисникот може да биде упатен директно кај продавачот на производот. За електронски поднесен приговор, одговорниот трговец доставува потврда за прием на траен носач. Одговорниот трговец одговара на приговорот во рок од 15 дена од приемот. Одговорот наведува дали приговорот е прифатен, содржи кратко образложение и, кога е применливо, предлага рок за решавање. Секој продавач е одговорен за водење на законски потребната евиденција за приговорите за кои тој е трговец. Кога продавач е партнер, IT.mk може да му помогне на потрошувачот во комуникацијата со партнерот, но партнерот останува одговорен за постапувањето по приговорот согласно закон.

1. Содржина на IT.mk

IT.mk објавува, организира, агрегира и прикажува различни видови содржина преку порталот, Форумот, IT.mk/Индекс, IT.mk/Мапирање, IT.mk/Кариера, IT.mk/Маркет, Огласникот и други актуелни или идни сервиси. Содржината може да биде:

• создадена од редакцијата на IT.mk;
• објавена од регистрирани корисници;
• доставена од компании, партнери, работодавачи или продавачи;
• добиена или структурирана од јавно достапни извори;
• целосно или делумно создадена со AI технологии;
• автоматски обработена, категоризирана или дополнета со употреба на софтверски и AI технологии.

Содржината која е целосно или во значителен дел создадена со AI технологии ќе биде јасно означена како AI-создадена содржина. AI-создадената содржина може да содржи фактички грешки, неточности, пропусти или несоодветни толкувања. IT.mk вложува разумни напори за нејзина проверка, но корисниците треба да ги проверат информациите пред да донесат одлука врз нивна основа. IT.mk вложува разумни напори за точност на сопствената содржина, но не гарантира дека сите информации објавени од корисници, компании, партнери или трети извори се целосни, точни или постојано ажурирани. Субјектите што доставуваат содржина потврдуваат дека имаат право да ја објават и дека таа не ги повредува правата на трети лица.

2. IT.mk/Индекс и IT.mk/Мапирање

IT.mk/Индекс и IT.mk/Мапирање имаат информативна цел и може да содржат профили, податоци, категории, локации, описи и други информации за компании, организации, институции, производи, услуги или други субјекти релевантни за македонската ИТ и деловна заедница. Информациите може да потекнуваат од:

• самите субјекти;
• официјални веб-страници;
• јавно достапни извори;
• партнери;
• редакцијата на IT.mk.

Присуството на субјект во IT.mk/Индекс или IT.mk/Мапирање:

• не претставува препорака или одобрување од IT.mk;
• не значи дека IT.mk има деловен однос со субјектот;
• не претставува гаранција за квалитетот, репутацијата, финансиската состојба или услугите на субјектот.

Субјектите можат да побараат исправка или дополнување на неточни информации преку [email protected]. IT.mk го задржува правото да категоризира, уредува, дополнува, коригира или отстрани информации кога тоа е потребно за точност, законска усогласеност, безбедност или квалитет на сервисот. Кога содржината е доставена директно од компанија или друг субјект, тој субјект е одговорен за точноста, законитоста и правото за објавување на доставените информации, фотографии, логоа и други материјали.

3. Авторски права

Освен кога е наведено поинаку, оригиналната редакциска содржина на IT.mk е заштитена со авторски и други права. Дозволено е споделување линк до оригиналната содржина. Кратки извадоци може да се користат со јасно наведување на IT.mk како извор и директен линк до оригиналната содржина. Републикација на цел текст, фотографија, видео или значителен дел од содржина за комерцијални цели бара претходна дозвола.

4. Scraping и AI

Не е дозволено систематско преземање на содржината на IT.mk за:

• создавање друга медиумска база;
• автоматска републикација;
• комерцијални datasets;
• тренирање AI модели;
• создавање конкурентни информативни производи;

без претходна писмена дозвола.

5. Авторски ставови

Колумни, блогови, коментари и други авторски текстови може да содржат личен став на авторот. Таквиот став не мора да претставува официјален став на IT.mk или ИВМ Нетворк.

6. Точност

IT.mk настојува редакциските информации да бидат точни и актуелни. Сепак, не се гарантира дека секоја информација секогаш ќе биде целосна или без грешка. Материјалите не треба да се третираат како правен, финансиски, медицински или друг професионален совет освен ако тоа не е јасно наведено.

7. Исправки

IT.mk може да исправи, дополни или ажурира објавена содржина. Доколку сметате дека содржина содржи материјална фактичка грешка или ги нарушува вашите права, можете да ја контактирате редакцијата преку официјалните контакт-канали на IT.mk.

8. Спонзорирана содржина

Платена или спонзорирана содржина ќе биде означена на начин што овозможува разумно да се разликува од независната редакциска содржина.

9. Материјали доставени до редакцијата

Со доброволно доставување фотографија, информација, изјава или друг материјал за објавување, испраќачот потврдува дека има право да го достави. Освен ако не е договорено поинаку, IT.mk добива неисклучиво право материјалот да го користи во рамките на редакциското известување за кое бил доставен.

1. Работодавачи

Со објавување оглас, работодавачот потврдува дека:

• има право да го објави;
• работната позиција е реална;
• информациите се точни;
• условите за работа не се намерно погрешно претставени;
• компанијата е законски овластена да ангажира лица за позицијата;
• огласот е во согласност со применливите прописи.

2. Недозволени огласи

Не се дозволени:

• лажни работни позиции;
• измами;
• регрутирање што доведува во заблуда;
• незаконски услови;
• огласи чија примарна цел е собирање лични податоци;
• MLM или слични шеми претставени како стандардно вработување;
• огласи што го прекршуваат применливото законодавство.

3. Дискриминација

Работодавачот е одговорен огласот и процесот на вработување да бидат во согласност со применливите правила за работни односи и забрана на дискриминација.

4. Модерација

IT.mk може да одбие, измени, суспендира или отстрани оглас кој:

• ги прекршува овие правила;
• е очигледно неточен;
• создава сомнение за измама;
• може да им наштети на кандидатите или на довербата во сервисот.

5. Лого и бренд на работодавачот

Работодавачот му дава дозвола на IT.mk да ги прикажува неговото име, лого и доставени материјали за потребите на објавување и промоција на огласот и потврдува дека има право да ги достави.

6. Апликации и лични податоци

Кај секој оглас може да се користи:

• директна апликација;
• контакт со работодавачот;
• надворешен ATS;
• друг систем.

Кандидатот треба да биде информиран каде ги испраќа своите податоци. Кога кандидатот преминува на сервис на трета страна, важат правилата за приватност и условите на тој сервис. Кога IT.mk обработува или чува CV, апликација или други лични податоци на кандидатите, таквата обработка се врши согласно Политиката за приватност.

7. Кандидати

Кандидатите се одговорни информациите во нивното CV, профил или апликација да бидат точни. IT.mk не гарантира:

• интервју;
• одговор од компанијата;
• вработување;
• дека работодавачот ќе најде соодветен кандидат;
• точност на секое тврдење на работодавачот.

8. Платени огласи

Цената, периодот на објава и дополнителните промотивни опции се наведуваат при нарачка. Плаќањето на оглас не претставува гаранција за број на прегледи, кандидати или вработувања освен ако конкретно не е договорено поинаку.

1. Членство

Цената, времетраењето и тековните поволности се прикажуваат пред купување. PRO членството е врзано за конкретниот кориснички профил и не може да се препродава или споделува со други лица.

2. Поволности

Поволностите може да вклучуваат:

• пристап до PRO делови на заедницата;
• дополнителни функционалности;
• попусти на IT.mk/Маркет;
• специјални понуди;
• ран пристап;
• други поволности објавени на IT.mk.

IT.mk може со текот на времето да додава, менува или отстранува одредени поволности, под услов суштинските промени соодветно да бидат комуницирани. PRO попустите на IT.mk/Маркет се применуваат само на производите кај кои е прикажана конкретна PRO цена или PRO поволност.

3. Партнерски поволности

Одредени поволности може да бидат обезбедени од трети компании. Во таков случај:

• достапноста може да зависи од партнерот;
• може да важат дополнителни услови;
• IT.mk не гарантира континуирана достапност на конкретна партнерска понуда.

4. Обнова и истекување

Доколку членството не е автоматски обновливо, по истекот PRO статусот престанува, а со тоа престанува и правото на идно користење на PRO поволностите, додека членството повторно не биде активирано. Доколку се нуди автоматска обнова, тоа ќе биде јасно наведено пред плаќање. Промена на цената ќе се применува на следниот период на членство, освен ако не е наведено поинаку.

5. Откажување и рефундација

Откажувањето и евентуалното право на рефундација се регулираат согласно условите при купување и применливите законски права на корисникот. Искористени промотивни кодови, ваучери или други поволности може да имаат дополнителни услови. Суспензија на корисничка сметка поради прекршување на правилата не создава автоматско право на поврат на членарината, освен кога применливите прописи бараат поинаку.

6. Правила на заедницата

PRO статусот не обезбедува исклучок од правилата на Форумот или другите правила на IT.mk. IT.mk може да ограничи или суспендира профил на PRO член доколку ги прекршува правилата. Платено членство не обезбедува:

• право на посебен модераторски третман;
• право на објавување забранета содржина;
• право на комерцијално рекламирање освен ако тоа не е дел од конкретна PRO поволност.

7. Комерцијална употреба

Лично PRO членство не претставува профил „Верификувана компанија“ и не ѝ дава право на компанија да го користи Форумот за систематска промоција. За комерцијални активности може да важат посебни пакети и услови.