Битолскиот стартап со седиште во Велика Британија – Native Teams успеа да дојде до нова инвестиција од 6,25 милиони евра. Ова е една од поголемите инвестиции во стартап со македонска ДНК досега. Со неа вкупната инвестиции во четири инвестициски рунди во Native Teams сега се 8,4 милиони евра.
„Пресреќни сме што можеме да го објавиме затворањето на оваа pre-seed А инвестициска рунда. Ова е доказ за напредокот што нашиот тим го направи во текот на минатата година, бидејќи ја внесуваме едноставноста и транспарентноста на Native Teams за да помогне за плаќањето плати и хонорари на многу повеќе корисници ширум светот. Имаме среќа на нашиот пат за унапредување и ажурирање на надоместокот за завршена работа да ни се проклучат некои исклучителни инвеститори-истомисленици “, рече Александра Митревска, ко-основач на Native Teams.
Инвестицијата доаѓа во „pre-series A“ инвестициска рунда. Средствата доаѓаат од постоечките инвеститори, Eleven Ventures и Fil Rouge Capital, но и од нови инвеститори како MFG Invest и Begin Capital. Ова не е прва инвестиција на MFG Invest во Native Teams, во март 2024 година, MFG Invest инвестираа околу 100 000 евра. Претходно, во декември 2022 година, бугарскиот Eleven Ventures и Fil Rouge Capital лоциран во Хрватска инвестира 2 милиони евра во Native Teams.
„Пред нас е веројатно најголемиот сектор кој може да се замисли: редефинирање на плаќањето за работа. Овој инвестициски круг ќе му овозможи на нашиот бизнис да ги преземе следните важни чекори, додека опслужуваме уште поширок пазарен сегмент, во уште поголема мера, и во поголем број земји.“, вели Џек Тхорогод, извршен директор и соосновач на Native Teams.
Native Teams е глобална платформа за плаќање и подмирување на статус на вработен, основана во мај 2020 година. За олеснување на плаќањето нудат и виртуелен паричник и дебитна платежна картичка која помага при работата на секој фриленсер. Нејзини основачи се Александра Митревска, Никола Бубевски и Џек Тхоргод.
Платформата помага да се премости јазот при вработување на работници и фриленсери од различни држави. Native Teams им помага на компаниите полесно да соработуваат со работници од други држави, без потреба од бирократија, а истовремено овозможува да бидат исполнети сите законски барања.
Во 2022 година платформата беше достапна во 40 држави, најголемиот дел од Европа. Сега Native Teams може да се користи од 65 држави, има десетици илјади корисници, а компанијата има над 200 вработени на пазарите на кои ги нуди своите услуги.
Средствата од новиот инвестициски циклус ќе се искористат за подобрување и раст во нови региони. Фокусот на Native Teams сега ќе бидат САД, Индија и државите од Азија. Инвестицијата во глобалната достапност не е нова и беше во плановите уште пред неколку години кога Native Teams дојде до 2 милиони евра инвестиција во Seed рунда.
Во февруари 2023 година, Native Teams беше .мк стартап на месецот.
