Телеграф МКД ќе биде портал составен од независна редакција од 50 новинари која ќе биде активна 24 часа секој ден во неделата, најави Дневник. Овој македонски дневен весник е во сопственост на Медиа Принт Македонија која станува стратешки партнер со Internet Group од Србија.
Internet Group е компанија која се занимава со интернет трговија, развој на веб апликации, и е основач на Telegraf.rs, портал кој има над 5 милиони читатели месечно, од кои 150.000 од Македонија. По неков терк ќе се стартува и новиот портал во Македонија.
Партнерството меѓу МПМ и Internet Group стартува откако Орка холдинг продаде 50 отсто од својот удел во Графички центар Скопје нa српската компанија. ГЦС e 100% сопственик на Медиа Принт кои ги издаваат дневните весници Вест, Утрински весник, Дневник и неделникот Теа Модерна.
Тоа што ќе биде интересно е да се види како новиот портал ќе се натпреварува (или соработува) со трите дневни весници на МПМ. Денес веб порталите и агрегатори привлекуваат многу читатели кои инаку би купиле печатен весник, што ги прави директни конкуренти со традиционалните медиуми. Уште поинтересно е што неодамна весниците на МПМ решија да ја сокријат својата веб содржина зад платежен ѕид со цел да ги зголемат продажбите на своите печатени изданија кои сè уште привлекуваат најмногу реклами. Но, огласувачите одат таму каде што се читателите.
