Во новата недела би можеле да помислите да навлезете со некој од следниве три наслови. Пред да го направите тоа, меѓутоа, можеби не е лошо да прочитате што имаме да кажеме за нив.
Shines Over: The Damned e хорор игра достапна само за сопствениците на PS5
Shines Over: The Damned е кратка и, првенствено, експериментална игра каде константно се тестираат вашите сетила. Без име, без оружја и без какви било сеќавања навлегувате во угнетувачки свет полн со скриени опасности.
Одење, скокање и решавање загатки
Shines Over: The Damned почнува амбициозно и со силно ветување за имерзивен Walking Simulator. Графиката е преубава и веродостојно ја прикажува околината околу вас, а музиката мајсторски допринесува до создавање мистериозна и тензична атмосфера.
Полека, но сигурно, ги правите вашите први чекори, скокате од едно до друго место и налудничаво удирате L1 и R1 секојпат кога од никаде ќе проба да ве зграпчи пеколно суштество. Го следите кучето кое ве води од загатка-до-загатка… и тука доаѓате до првиот проблем – загатките или не се доволно инвентивни или пак често се повторуваат.
Во ситуација со скокање врз карпи или камења кои стануваат видливи само откако ќе стапнете на нив, новитетот беше интересен првиот пат, но не и по вториот и третиот. Потоа, одредени загатки, како тие со симболите на мистериозните камења, знаат да бидат фрустрирачко тешки, барем додека да сфатите што всушност се бара од вас.
Не ни се допадна ни тоа што откако истраживме три поглавја, не наидовме за опција да ја сочуваме играта. При наредно покренување на Shines Over: The Damned моравме да почнеме од почеток и повторно да поминуваме низ истите мапи. Од овие и слични причини, Shines Over: The Damned моментно има 3.4 оценка на PlayStation Store.
Повеќе детали за играта
- Произведува: Firenut Consulting S.L.
- Издава: Firenut Consulting S.L.
- Жанр: хорор авантура, Walking Simulator
- Платформа: PS5
- Излезе на: 21 март 2024
Final Stand: Ragnarök се поднови со надополнувањето 1.0 и воведе нови опции, системи и содржини
Final Stand: Ragnarök ветуваше многу, особено на почетокот од нејзиниот ран пристап. Со најновото најновото 1.0 надополнување, развојното студио Unchained Entertainment воведе бројни нови содржини. Но, дали е ова доволно за да „процвета“ играта?
Aнтиклимактичен отпор
Final Stand: Ragnarök ви дозволува вие и уште седум играчи да се соочите со силите на Хел и да ставите крај на илјадници непријателски единици преку користење способности кои се уникатни за петте шампиони на богот Один.
Арно ама, движењата, анимациите и способностите на шампионите не успеваат премногу да нѐ импресионираат.
Сега за сега, недостасува соодветна тежина и многу е тешко да се чувствувате како ултимативната борбена машина на Один кога сѐ се сведува на трапави, нереални движења и визуелно-неинспиративна реализација на моќи и способности.
Паралелно со ова, вештачката интелигенција е исклучително слаба и предвидлива, а графичкиот енџин никако не ја оправдува хардверската побарувачка.
Како најголем проблем е тоа што не можете соло да играте во играта туку мора да чекате додека некој друг вистински играч не се приклучи. Во една прилика чекавме повеќе од пет минути, во друга скоро десет.
И во двете ситуации ни се приклучи само еден играч, што значи дека седум играчи е невозможна мисија. А, кога сме и кај мисиите што ви се доделуваат, па, им фали разноликост. Моментно, многу работи се премногу генерични, неинспиративни, а, со тоа, и здодевни.
И покрај ова, би сакале да истакнеме дека Final Stand: Ragnarök има солидна основа, но тоа е сепак основа на која мора дополнително да се работи.
Повеќе детали за играта
- Произведува: Unchained Entertainment
- Издава: Unchained Entertainment
- Жанр: hack and slash акција
- Платформа: Microsoft Windows
- Излезе на: 19 март 2024
REAL ESTATE Simulator – FROM BUM TO MILLIONAIRE е уште една игра од жанрот со симулации
Ова не е нашето прво родео со развојното студио Geekon. Претходно, пишувавме за нивната игра Bootlegger’s Mafia Racing Story, а потоа и за Buried Alive: Breathless Rescue. И во двете ситуации, успеавме да најдеме нешто интересно, особено во Buried Alive. Но, REAL ESTATE Simulator – FROM BUM TO MILLIONAIRE? Ова е нешто сосема друго…
Значително полоша верзија на House Flipper
Играта ви ветува симулација во која ќе можете да започнете и водите длабок и динамичен бизнис преку купување, уредување и продавање имоти. Имотот што ќе го купите, ќе можете целосно да го реновирате, да поставувате најразличен мебел, и да исполнувате одредени предизвици.
Со развивање соодветни вештини и разговори со најразлични NPC ликови, ќе добивате подобар увид во потребите на клиентите и ќе се трудите да склопите профитабилни зделки.
Сево ова се чини како да е само одлична идеја со катастрофално лоша реализација. Со бројни багови и лоши (читај: здодевни) изведби на механики, се чини дека REAL ESTATE Simulator – FROM BUM TO MILLIONAIRE целосно ги оправдува бројните негативни рецензии за играта.
Искрено се надеваме дека Geekon ќе продолжи да работи на играта и да понуди подобар продукт во иднина. Во меѓувреме, ако барате слична, но значително подобра игра, од срце ви ја препорачуваме House Flipper 2!
Повеќе детали за играта
- Произведува: Geekon
- Издава: Midnight Games
- Жанр: симулација
- Платформа: Microsoft Windows
- Излезе на: 22 март 2024
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
