Една од најпопуларните употреби на технологијата во здравството лежи во потенцијалот за подобрување на целата здравствена индустрија – модернизација на начинот на работа, поедноставување на процедурите и убрзување на доставата на услуги, при што многу компании и стартапи ширум светот работат на нови решенија кои им помагаат на пациентите на најразлични начини искористувајќи разни сегменти од ИТ индустријата. Еден од нив е и Zana Technologies, стартап за разговорна вештачка интелигенција чии решенија како што се четботовите и гласовните асистенти имаат за цел да донесат иновации во секторот и да ја подобрат здравствената заштита преку користење на ML и AI технологија.

Според извршниот директор и ко-основач на компанијата, Јулија Хоџа, развојот на технологијата за разговорна вештачка интелигенција на овој стартап има потенцијал да го најави и следниот значаен бран на иновации во здравството.
„Извонредниот развој на технологијата за разговорна вештачка интелигенција, вклучувајќи ја и во четботовите и во гласовните асистенти полека добива на сила. Разговорните апликации за вештачка интелигенција веќе го покажаа потенцијалот по различни вертикали и различни нивоа на пазарот – од една страна, тие имаат моќ да го намалат товарот на административните задачи за медицинскиот персонал и од друга страна да им овозможат подобро да комуницираат со пациентите,“ вели Хоџа.
Како поранешен постдокторски истражувач по медицинска информатика на Универзитетот Колумбија и научен соработник на Технолошкиот институт во Карлсруе, Хоџа е исто така автор на бројни научни публикации за пресекот на машинското учење и семантичките технологии, како и виш советник при албанскиот Институт за наука. Во моментот, нејзиниот стартап кој е базиран во Германија главно работи со традиционални здравствени организации како што се различни клиники и болници, а исто така на фармацевтските и медицинските компании им нуди придружни решенија за пациентите за далечинско клиничко испитување.

Последниот проект на Zana вклучува употреба на дигитални алатки за телемониторинг на пациенти со астма и хронична опструктивна белодробна болест (ХОББ). Преку ваквиот тип на соработка, Zana обезбедува придружна мобилна апликација за пациентите, користејќи ја својата комерцијална технолошка платформа Healthcare Conversational AI.

Придружната апликација секојдневно им помага на пациентите да ги следат симптомите и виталните знаци во комбинација со соодветни физички вежби.
„Оваа соработка претставува одлична можност да ја прошириме нашата технологија во доменот на респираторните заболувања и вокалните биомаркери,“ објаснува Хоџа.
Според нејзе, целта на проектот е да се воспостави релевантна врска помеѓу вокалните карактеристики и отежнато дишење кај пациенти со ХОББ и астма.
„ХОББ и астмата се состојби на респираторниот систем што влијаат и на човечкиот глас. Очекуваме дека преку новата технологија со вештачката интелигенција ќе можеме да најдеме вокални обрасци кои укажуваат на степенот на отежнатото дишење и можни егзацербации (акутно влошување на болеста)“, вели д-р Сами Симонс, пулмолог кој е дел од истражувањето и соработката со Zana на вакви проекти.
Во однос на порастот на употребата на технологијата во здравството, Хоџа верува дека новите дигитални технологии како што се вештачката интелигенција за следење на здравјето ќе имаат зголемена примена и ќе имаат сè подоминантна улога со текот на времето.

„Секако очекувам зголемена и подоминантна улога на новите дигитални технологии во здравството, вклучувајќи превенција, дијагноза, управување со болести и откривање лекови“, вели Хоџа.
Сепак, според нејзе исто така има некои сегменти, како што е гласовните технологии (Voice Tech), кои се уште се нови и чиј потенцијал во здравството треба допрва целосно да се реализира.
„Гласовната технологија во здравство сè уште е во зародиш и ја нема достигнато својата зрелост, особено во однос на освојувањето на пазарот. Клучните предизвици за ова се состојат во целокупното прифаќање на корисниците и високите бариери за влез на пазарот, како што се долгите циклуси за регулаторни одобренија и клиничка валидација,“ заклучува Хоџа.