Не знаеме за вас, но ние ја поминавме неделава дружејќи се со еден куп нови игри. Откако ви предложивме неколку интересни наслови кои би можеле да ги проверите, не губевме време да скокнеме во амбициозната Myth of Empires, а потоа и да пљачкаме како да ќе нема утре со Robin Hood – Sherwood Builders. При крајот на неделава решивме целосно да се исцрпиме со предизвикувачката стратегија Solium Infernum – играта остави феноменален впечаток на нас и доколку сте по уникатен Civilization спин со бројни интриги и политики, тогаш дефинитивно не би требало да ја заобиколите играта. За крај, решивме да се опуштиме со дигиталното остварување кое е засновано на книгите на Брајан Жак – The Lost Legends of Redwall™: The Scout Anthology e симпатичен платформер кој ќе најде начин да ги забави и помалите и повозрасните гејмери.
Како што кажавме, долга недела, но некако не сакаме тука да заврши и решивме да ископаме уште неколку интересни предлози кои би можеле да ги проверите. Неделата сеуште не е завршена!
Champion Shift штотуку излезе во раниот пристап на Steam
Иако Champion Shift е инспирирана од Vampire Survivors, сепак може да се пофали со интересни механики кои нема да можете да ги најдете во морето од слични игри.
Во Champion Shift управувате најразлични митски херои кои автоматски напаѓаат бранови и бранови од непријатели на најразлични огромни мапи. Првата уникатна механика која е својствена за Champion Shift е можноста да се инстантно трансформирате во автомобил со кој побрзо ќе можете да се движите низ мапите. Никој нема ни да ве спречи доколку пробате да испогазите сѐ што ќе ви се испречи на патот. Откако ќе убиете одреден број непријатели ќе добиете одредена задача. Решете две вакви задачи и ќе се соочите со босот од мапата. Откако ќе го успеете да го убиете босот, ќе можете да се префрлите на следната мапа.
Феноменални ликови и забавен гејмплеј
Апсолутно сме импресионирани од дизајнот на ликовите. Секој од нив се одликува со уникатен изглед и возило, како и уникатни напади. Помеѓу сево ова, со искуствените поени често ќе отклучувате дополнителни способности и моќи. Некои од овие работи се својствени за митскиот лик со кој управувате, а некои за возилото. Иако играта е во раниот пристап на Steam, забавата е на исклучително високо ниво. Топла препорака!
Повеќе детали за играта
- Произведува: SRG Studios
- Издава: SRG Studios
- Жанр: акција, roguelite
- Платформа: Microsoft Windows
- Излезе на: 29 февруари 2024
One More Dungeon 2 излезе и за конзолите!
One More Dungeon 2 е уште еден симпатичен roguelite во први лице. Чедото на Stately Snail ќе ви се допадне доколку сакате crawler-и како од доброто старо доба, но со модерна графика.
One More Dungeon 2 ви дозволува да истражувате рандомно генерирани места и да се спротивставувате со бројните непријатели и босови користејќи едно оружје за близина, а едно за далечина. Непријателите знааат да бидат безобразно агресивни и да бараат од вас брзи рефлекси и напаѓање додека сте константно во движење. Оружјето за напад од далечина е значително посупериорната верзија од оружјето за блиски пресметки, но, со оглед на тоа дека муницијата е ограничена, нема да можете целосно да се потпрете на него.
Во One More Dungeon 2 имате на располагање пет уникатни региони, а секој од регионите се одликува со уникатно дизајнирани непријатели и босови. Помеѓу навлегувањето во рандомно генерираните светови, ќе можете да истражувате стара тврдина која е како еден вид хаб – алфа и омега за сите ваши авантури. Играта е совршено пoртирана за PS5, со одлично оптимизирана и преубава графика.
Повеќе детали за играта
- Произведува: Stately Snail
- Издава: Ratalaika Games
- Жанр: акција, roguelite
- Платформа: Microsoft Windows, конзоли
- Излезе на: 1 март 2024
United Penguin Kingdom e невообичаена стратегија во која ќе градите населба за пингвини
United Penguin Kingdom е игра која посакуваме да можевме да ја играме за време на новогодишните празници. Од визуелната презентација, преку музичката подлога, па се до начинот на кој се реализирани стратешките механики, United Penguin Kingdom ни остава впечаток како игра која е направена со многу позитивна и магична енергија.
Како што е карактеристично за city builder-и, во United Penguin Kingdom ќе градите најразлични објекти. Некои од објектите позитивно влијаат на потребите на вашите пингвини, а некои нудат најразлични работни обврски, колку да не ви седат пингвините без работа. Доколку сакате, некои објекти ќе пружат можности за испраќање на пингвините на непозната територија.
Од друга страна, некои објекти се од забавен карактер и се замислени да ја разбијат евентуалната монотонија која би можела да се јави кај нив. Но, не е се сјајно како што изгледа и ќе мора да се справувате и со опасни фоки кои се вродени клептомани и китови кои љубоморно и крајно деструктивно гледаат на вашата импресивна населба. За среќа, ќе можете да градите најразлични кули, како и да отклучувате бројни надградби.
Повеќе детали за играта
- Произведува: Turquoise Revival Games
- Издава: GrabTheGames, UpgradePoint
- Жанр: стратегија, city builder
- Платформа: Microsoft Windows
- Излезе на: 9 март 2024
We’reWolves e уште една интересна алтернатива на нашиот прв предлог! :)
Сосема случајно, денешниов текст излезе да ги фаворизира roguelite игрите. Па така, доколку сакате да одморите од United Penguin Kingdom со уште еден Vampire Survivors инспириран наслов, би сакале да ви ја препорачаме најновата игра на SnowBlown Studios.
Насловена како We’reWolves, играта ви дозволува да го започнете вашето рандомно-генерирано патешествие со една од неколку уникатни класи. Секоја од четирите почетни класи се одликува со засебни способности и тактички можности кои се прилагодуваат на вашиот стил.
We’reWolves ни се допаѓа поради прекрасната визуелна презентација, бројните непријатели, како костури, тролови, орци и волци. Запрепастувачки, на располагање имате над 5600 козметички предмети и над 100 можности за уникатни билдови. Нема никакви микро-трансакции и отклучувањето е органски имплементирано – преку играње!
Споредено со слични вакви игри, We’reWolves има повисока цена но, како и Champion Shift, така и We’reWolves целосно ја оправдува цената со шаренолики места, арсеналот од навидум непресушна опрема и алатки, како и бројни можности за офанзивни и дефанзивни комбинации кои се прилагодуваат на вашиот стил.
Повеќе детали за играта
- Произведува: SnowBlown Studios
- Издава: SnowBlown Studios
- Жанр: survival, roguelite
- Платформа: Microsoft Windows
- Излезе на: 17 февруари 2024
И, со сите овие предлози сметаме дека конечно можеме да ја затвориме неделата и целосно да се посветиме на некоја од нив. Кој е вашиот избор?
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
