Окрупнувањето во гејминг секторот продолжува и оваа недела. Откако во првата половина на јануари Take-Two ја купи Zynga, и пред 10 дена Microsoft ги купи Activision-Blizzard за 68,7 милијарди долари, сега Sony за 3,6 милијарди долари го купи Bungie.
Bungie е компанијата зад Destiny 2, и e првиот креатор на Halo игрите кои ја „спасија“ Xbox конзолата. Интересно, со ова Bungie е веројатно единственото гејминг студио кое било во сопственост и на Microsoft и на Sony. Microsoft го купи Bungie во 2000 година, и Halo беше една од ретките игри кои беа ексклузивно достапни на Xbox. Во 2007 година Bungie ја доби назад својата независност, но како дел од договорот со Microsoft, Xbox го доби правото на Halo.
Иако купувањето на Bungie може и да е одговор на раздвижувањата кои ги прави Microsoft со купување на повеќе развојни студија и издавачи, секако не е одговор на купувањето на Activision-Blizzard. Преговорите помеѓу Sony и Bungie траеле неколку месеци пред да дојдат до овој чекор.
Што значи ова за Destiny и Halo
За Halo ова нема никакво значење. Правата на играта ги има Microsoft и ова нема да се промени. За Destiny 2, Bungie веќе објави дека играта останува мулти-платформска. Дали ова останува случај и за следните игри, па дури можеби и за следните експанзии на Destiny 2 ќе треба да почекаме и да видиме, иако од Bungie најавија дека ќе продолжат.
„Првата работа што треба да се каже недвосмислено е дека Bungie ќе остане независно мулти-платформско студио и издавач. Пит [Парсонс, извршен директор на Bungie] и јас зборувавме за многу работи во последните месеци, и ова беше еден од првите, а всушност и најлесни и најјасни, заклучоци што ги донесовме заедно. Сите сакаме исклучително големата Destiny 2 заедница, без оглед на платформата на која игра, да продолжи да ужива во нивните искуства со Destiny 2. Тој пристап ќе важи и за идните изданија на Bungie. Тоа е недвосмислено.
„Bungie ќе работи автономно во рамките на Sony Interactive Entertainment, и ќе продолжи да објавува игри и на други платформи. Ја сфаќаме важноста на ова. Ги зголемуваме студијата органски, но правиме и голем број аквизиции во текот на годините, без разлика дали се работи за Naughty Dog, Guerrilla Games, Suckerpunch Productions или неодамна Insomniac. Разбираме колку е важно на овие големи организации да им се даде простор и независност, а истовремено да се зајакне со поголема поддршка кога тоа ќе биде потребно.“, вели Џим Рајан, директор на Sony Interactive Entertainment.
Wordle дел од New York Times Games
Секако не аквизиција од типот на Bungie и Activision-Blizzard, но ултра-популарната игра за која започнавме да развиваме зависност – Wordle има нов сопственик. За неколку милиони долари Wordle ќе ги засили New Your Times Games и со тоа ќе ја збогати понудата. Цената која платформата ја плати за Wordle не е објавена, но станува збор за ниска 7-цифрена бројка.
Во прво време Wordle останува бесплатен за сите, но ќе биде додаден во дневните „загатки“. Ова може да се промени во иднина, и Wordle да „замине“ зад paywall, но добра вест за нас е дека и понатаму ќе може да ја играме македонската верзија Зборле.
New York Times Games и досега имаa успех. Mini crossword, Spelling Bee, Letter Boxed, Tiles и Vertex во 2021 имаа 500 милиони изиграни игри, а платформата стигна до 1 милион претплати.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
