Младите ИТ таленти редат успеси – сребрен и 2 бронзени медали на Јуниорската балканска олимпијада по информатика

Avatar img-thumbnail img-circle

во ИТ настани, ИТ.МК

Откако сениорскиот тим освои сребрен и два бронзени медали на Интернационалната олимпијада по информатика во Индонезија, јуниорскиот тим на македонски информатичари годинава освои идентичен резултат – 1 сребрен и 2 бронзени медали и успешно се претстави на 15-тата Јуниорска балканска олимпијада по информатика (ЈБОИ 2022), која од 28-ти август до 3-ти септември се одржува во Дорохои, Романија. Тимот беше составен од учениците Благој Рујаноски Стојановски од Прилеп, Никола Стојковски од Скопје, Дамјан Давков од Штип и Владимир Грчев од Кочани, предводени од Владислав Бидиков и д-р Миле Јованов од Факултетот за информатички науки и компјутерско инженерство (ФИНКИ).

После една година пауза и една година како онлајн натпреварување, ЈБОИ се одржува како регуларен настан. Покрај учеството на повеќето земји од балканската иницијатива во информатика, беа присутни и Украина и Азербејџан како земји гости. Во силна конкуренција во која скоро сите земји учеснички се поголеми од Македонија, сребрениот медал го освои Благој Рујаноски Стојановски, ученик со штотуку завршено основно образование. Учениците Никола Стојковски и Дамјан Давков од Скопје освоија бронзени медали, а најмладиот учесник од Македонија се врати со олимписка пофалба.

До сега, во овие 15 изданија на олимпијадата  македонските натпреварувачи имаат освоени вкупно 5 сребрени и 24 бронзени медали. 

Овој резултат на нашиот јуниорски тим покажува дека континуираната работа на членовите на Здружението на информатичарите на Македонија (ЗИМ) создава не само врвни резултати туку и иднина, вели д-р Миле Јованов, претседател на ЗИМ.  Добро би било и фокусот на државните институции да се насочи кон поддршка и развој  на талентите преку средување на законската легислатива и вистинска поддршка на  организациите и поединците кои работат на тоа. Талентите, во која било област, може  да бидат потребната сила за придвижување на државата во вистинска насока, а, во  денешно време, особено идните информатички инженери. Благодарни сме до Факултетот за информатички науки и компјутерско инженерство (ФИНКИ) и  општествено одговорните компании Мелон Технологии, Нетцетера и Семос Едукација, кои годинава го поддржаа циклусот на натпревари.  

Во периодот кој следи ни претстои учество на Балканска олимпијада во Букурешт, Романија, Европска олимпијада за јуниорите во Украина – во онлајн издание, како и Европска олимпијада за девојки во Турција, а учениците од сите тимови следниот викенд ќе бидат гости во вилата Билјана во Охрид, на покана на Претседателот на  државата, Стево Пендаровски.

Добивај известувања
Извести ме за
guest
0 Коментари
Inline Feedbacks
View all comments