Додека продавачите се во предниот дел на продавницата, роботи работат во магацините и ги надополнуваат купените производи кои недостасуваат. Ова е слика во стотици продавници од ланецот на маркети FamilyMart во Јапонија. Продавниците го користат роботот TX SCARA кој доаѓа со вештачката интелигенција GORDON.
TX SCARA е производ на компанијата Telexistence и треба да биде робот помошник кој може да се користи во маркети. TX SCARA е значително поедноставен робот од хуманоидниот робот Atlas на Boston Dynamics или некои други слични роботи кои ги гледаме последниве неколку години. TX Scara е помал робот кој ограничено се движи низ продавниците и ги надополнува купените производи на рафтовите.
Сакаме да ја автоматизираме работата која се повторува и да ги автоматизираме задачите кои се здодевни за луѓето. Ова е насоката во која се движиме. Најдобар начин да го направиме ова е да користиме роботи, вели Џин Томиока од Telexistence, јапонска компанија која произведува роботи.
Како работи TX SCARA?
TX SCARA има рака поставена на телото на роботот со која може да подигне и пренесе од едно на друго место конзерви, лименки или шишиња. Со помош на софтверот GORDON роботот може да префрли 1.000 производи дневно. За користењето на роботот е искористен интелигентен дизајн на ентериерот на целата продавница – TX SCARA се движи по шина на задната страна од ѕидот од полици и оттаму надополнува производи кои купувачите ги купуваат на другата, предна, страна.
Роботот е наменет за употреба претежно во продавници, да го олесни работењето, и да им овозможи на вработените да бидат присутни со купувачите наместо да трчаат напред-назад до магацинот. „Conbini“ е назив на многу малечки продавници, во стил на киосци, во кои се продаваат пијалаци, грицки и различни други производи и се чести во Јапонија. „Conbini“-те се отворени 24 часа дневно и имаат и до 3.000 производи, но мал број вработени. За да ги надополнат производите вработените мора да се постојано во магацинскиот дел со што голем број на потрошувачи чекаат за да бидат услужени…
TX SCARA користи Nvidia GPU – технологија за вештачка интелигенција и контрола на далечина преку Azure. Оператор од компанијата е во постојан надзор, па ако затреба може да преземе контрола врз роботот. Преземањето на контрола би било во ретки случаи, на пример ако се истури пијалак, пренесе Associated Press.
TX SCARA веќе се користи во 300 продавници од ланецот FamilyMart. Ланецот има 16.000 продавници.
Јапонија има недостиг на работници и недостиг на население. Популацијата старее, па за некои од работните позиции е потребно решение.
Малите продавници не се единствени кои вработуваат роботи
Стареењето на населението и недостатокот на работна сила во Јапонија зафаќа повеќе сектори. Малите продавници не се единствени кои „вработуваат“ роботи. Стареењето на работната сила во градежната индустрија пред неколку години ја инспирираше компанијата Obayashi да тестира роботи кои ќе се користат во изградба на брани.
Над 50 отсто од градежните работници во Јапонија се постари од 55 години. Машинеријата која ја развиваат не само што треба да помогне за побрзо градење во иднината, туку ќе помогне и да се употреби ова време во кое овие искусни работници можат да го „пренесат“ своето знаење на машините. Изградбата на браната во провинцијата Мие треба да понуди значителни податоци за иднина за забрзување на градењето со помош на роботи. Браната треба да биде завршена во 2023 година, а кога ќе заврши треба да покаже како овој процес може да се оптимизира. Компанијата која ја гради браната се надева дека со оптимизација роботите ќе можат да ja изградат браната 30% побрзо отколку што тоа го прават со работници.
Со намалувањето на работоспособно население Јапонија последните години го зголемува бројот на рoботи работници. Роботи работат во домовите за стари лица, во училиштата, па дури и како обезбедување.
Од 11-ти август тим од 3 автономни роботи секојдневно патролира во дел од владините згради во Токио, пишува Japan Today. Вештачката интелигенција помага да се детектираат луѓе и други пречки при движењето и да се избегне судир. Роботите се опремени со повеќе камери и ги испраќаат видеата во центарот во кој ги прегледуваат оператори.
Ниту овие роботи не се креирани за да се роботизира секторот, туку едноставно нема доволно работна сила во секторот. Роботите менуваат луѓе, а тоа го прават и поекономично, па не само што се решава проблемот, туку роботите во случајот и заштедуваат финансии.
Роботи кои се грижат за луѓето
Хуманоидниот робот Pepper повеќе години се користи во различни сектори, роботот ги разбира емоциите на луѓето и се користел и како помошник во болница и како банкарски асистент.
Роботот Pepper во дом за грижа за возрасни лица се користи да ги анимира луѓето во домот. Pepper се користи да организира игри, па дури и комуницира со пациенти кои страдаат од деменција. Роботот во оваа задача многу подобро памети од луѓето, па самата задача ја завршува подобро.
Роботите може да се користат и како физичка помош за луѓето. Надворешен егозскелет им помага на луѓето да креваат поголем товар без речиси воопшто да се напрегнат. Благодарение на ова се избегнуваат долготрајни хронични повреди кои значително го влошуваат квалитетот на живот.
Овие роботи веќе се користат во фабриките на Ford, но слични роботи им помагаат и на негувателките во Домот за грижа на возрасни лица „Silver Wing“ во Токио.
Користењето на роботи во установите за нега и болниците, повторно е предизвикано од стареењето на работната сила и недостатокот на кадар во овој сектор.
Засега е отворено прашањето дали напредокот кој Јапонија го прави на полето на секојдневната употреба на роботи ќе биде пример за остатокот на светот. Стареењето на населението е најизразено во Јапонија, но секако е актуелен проблем во голем дел од развиените држави.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
