Имотен лист сега ќе можете да вадите преку сајтот на Агенцијата за катастар

По повеќе години осовременување на Агенцијата за катастар на недвижности, конечно ќе им овозможи на корисниците основна и корисна функција – можност за преземање и вадење на имотен лист од дома. „Дистрибутивниот систем ќе биде достапен на интернет 24 часа за сите правни и физички лица во земјата и во странство. Во зависност од желбата и од потребата на корисникот, бараните податоци може да се добијат во дигитална или во хартиена форма. Дигиталните податоци се за 20 проценти поевтини од хартиените податоци“, вели Славче Трпески, директорот на агенцијата.

За вадење на дигитален имотен лист потребно е пребарување по број на катастарска парцела, имотен лист или пребарување по мапа. Вториот чекор е додавање во кошничка и плаќање преку интернет, последниот чекор е преземање на електронски потпишан имотен лист. Можноста за увид во имотниот лист за прв пат беше воведена во 2009 година, но останува нејасно зошто беа потребни шест години за можност за преземање на документите. Цената на издавање на имотниот лист во електронска форма е 150 денари, а за преземање во хартиена форма ќе чини 183 денари и 70 денари поштарина.

Пред околу една недела катастарот беше во централните вести на телевизиите, откако 19 вработени во катастарот беа осомничени за злопотреба на службена должност.