На втората по ред Европска олимпијада по информатика за девојки (ЕДОИ 2022), која од 16-ти до 23-ти октомври се одржува во Анталија, Турција, македонските ученички – информатичарки ја заокружија успешната година за Македонија на меѓународните олимпијади по информатика, освојувајќи сребрен медал. Во август македонските средношколци освоија сребрен и два бронзени на Интернационалната олимпијада по информатика во Индонезија, а во септември на Јуниорската балканска олимпијада успехот од 1 сребрен и 2 бронзени медали беше повторен.
Со последниот успех, македонските ученици на интернационалните информатички олимпијади само оваа година имаат освоено вкупно 5 сребрени медали, 5 бронзени медали и 3 олимписки пофалби.
Сребрениот медал за Македонија на ова престижно меѓународно натпреварување го освои Софија Велковска од Скопје која беше дел од и средношколскиот тим на интернационалната олимпијада, а солидно претставување имаа и останатите 3 членки на македонскиот тим: Сара Стефановска од Крива Паланка, Јована Трифуноска од Тетово и Атина Рувинова од Охрид.
Тимот беше раководен од д-р Миле Јованов и д-р Емил Станков од ФИНКИ. Пласманот ученичките го заслужија преку целогодишен циклус на натпревари, којшто редовно се организира од Здружението на информатичарите на Македонија (ЗИМ), а годинава се одржуваше по 33-ти пат.
Секоја земја – членка на ЕОИД заедницата учествува со свој тим составен од најмногу 4 натпреварувачки, избрани преку националните натпревари во програмирање. По минатогодишното прво издание на оваа олимпијада кое се одржа онлајн заради пандемијата, ЕОИД 2022 се одржува со физичко присуство и со учество на вкупно 95 учеснички од 27 европски земји. Дополнително, како претставници на земји-гости на ЕОИД, во неофицијална конкуренција учествуваат и 60-ина ученички од 15-ина земји надвор од Европа (како САД, Канада, Саудиска Арабија, Бразил, Сингапур и др.). Главни организатори на ЕОИД 2022 се Министерството за индустрија и технологија, како и Научно-технолошкиот истражувачки совет на Република Турција.
Следната, трета по ред, Европска олимпијада по информатика за девојки (ЕОИД 2023) ќе се одржи идната година, во Лунд, Шведска.
И девојките можат!
Според мапирањето на ИТ индустријата во .мк, и во 2019 и во 2022 година, женскиот пол е застапен со 20-30% во ИТ индустријата, а од нерационални причини машките се поплатени на секоја позиција – најистакната разлика е на Senior и на Lead позициите каде што разликата е повеќе од 25%. Се надеваме дека компаниите во ИТ индустријата многу брзо ќе го согледаат овој негативен тренд и ќе понудат ист терен и фер плеј за сите учесници во индустријата, независно од полот.
IT.mk им честита на девојките информатичарки и им посакува уште уште голем број успеси!
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
Честитки!