На хартија, новиот систем со Endeavors звучи навистина добро. Решавате дневни и неделни квестови кои ве наградуваат со нова валута која се вика Endeavors. Потоа, со новата валута можете да си купите било која работа што се наоѓа во моментните Crown Crates, дали животно за јавање, нов изглед, костим, милениче, и слично. Порано, ова беше можно само со давање вистински пари, но откако Microsoft ја купи Bethesda, политиката мораше да се промени и да се воведе можност за добивање на вакви работи без трошење вистински пари.
Проблемот со новиот систем е тоа што потребно е да вложите многу време доколку сакате да си се подновите на ваков начин. Имено, секој ден можете да решите само три дневни квестови. Еден ден, еден квест ќе ви даде 20 Endeavors, друг ден би можел да ви даде само 15, а трет ден 25. Да одиме со еден баланс и да кажеме дека со дневни квестови можете да извлечете просек од 60 Endeavors. Пред да продолжиме понатаму, да погледнеме колку чинат сите работи, во зависност од нивните категории:
- Radiant Apex награди: 16000 Endeavors
- Apex награди: 8000 Endeavors
- Legendary награди: 3600 Endeavors
- Epic награди: 2000 Endeavors
- Superior награди: 1000 Endeavors
- Fine награди: 360 Endeavors
- Common награди: 360 Endeavors
Поголемиот број гејмери се заинтересирани за четирите горни категории бидејќи тука се наоѓаат навистина добрите работи. Е сега, проста математика, ако секој ден вадиме 60 Endeavors, за да можеме да земеме Apex награда потребно е да решаваме дневни квестови добри четири месеци. Два месеци нѝ треба доколку сакаме да извлечеме една легендарна работа, или месец дена за Epic награда. Radian Apex награда? Цели 9 месеци решавање дневни квестови!
Нормално, ова дефинитивно би можело да се забрза со решавање неделни квестови, затоа што таквите ќе даваат повеќе Endeavors, но одземаат значително повеќе време од дневните квестови. Имено, еден дневен квест би можел да биде да убиете два боса, а еден неделен квест би можел да е да убиете 30 боса. Е сега, еден дневен квест ви дава 20 Endeavors, но еден неделен квест ви дава 250 Endeavors, плус 10000 злато. На понуда имате три неделни квестови, но штом еден решите, другите два се заклучуваат и не можете да извлечете награда за нив.
Никако не сакаме да звучиме неблагодарно и разбираме дека на повеќето ова е пријатно изненадување кое дозволува интересна награда со секојдневно играње, но не можеме а да не мислиме дека целиот систем е тука само колку да се испочитува политиката на Microsoft која диктира дека сите работи што се продаваат мора да можат да бидат заработени и преку играње игра. Огромната висина на Endeavors се чини дека и понатаму никако не ја девалвира вредноста на кутиите со плен и трошењето вистински пари на нив и понатаму се охрабрува, особено кога ќе земете во предвид дека наградите кои ги гледате денес, нема да бидат тука и утре, туку ќе бидат заменети со некои други награди од некои други сезонски кутии за плен.
