Google потврди дека купува поголем дел од Green Throttle Games, компанија која беше изгасена при крајот на минатата година, но која успеа да креира гејминг контролери и додатоци за видео игри. Иако останува непознато што Google ќе прави со Green Throttle Games, чиј тим се преселува кај интернет гигантот, сепак веќе кружат шпекулации за можна гејминг конзола која ќе работи на Android, и за Nexus TV сервис.
Според Pando Daily, кои први известија за аквизацијата, Google планира да ја искористи експертизата на тимот и технологијата на Green Throttle да развие свој Google TV уред, кој ќе биде брендиран како Nexus уред. Идејата на Google е да креира уред преку кој ќе стрима содржина за телевизиите, но и преку кој ќе може да се играат видео игри.
Android апликацијата на Game Throttle, која овозможува да се користи нивниот Atlas контролер за играње игри, поврзан преку Bluetooth, уште во ноември беше тргната од Google Play. Според TechCrunch, ова наговестува дека Google е на пат да креира систем преку кој ќе може да понуди гејминг искуство директно преку телевизор.
