Загреб стана првиот европски град каде може да нарачате автономно возило

Загреб стана првиот град во Европа каде корисниците можат да нарачаат автономно возило преку Uber апликацијата, со што американската компанија за превоз го направи првиот конкретен чекор кон пошироко воведување на роботакси во европските градови.

Услугата ја лансираа Uber Technologies, хрватската компанија за автономна мобилност Verne и Pony.ai, компанија која ја обезбедува технологијата за автономно управување. Според соопштението на Uber, Загреб е првиот европски пазар каде корисник може директно преку Uber да резервира возење со автономно возило.

Услугата е достапна од оваа недела, а во почетната фаза ги покрива клучните делови од Загреб, вклучително и централното градско подрачје. Компаниите најавуваат дека географската покриеност постепено ќе се проширува.

Три компании, три различни улоги

Моделот што го избрале Uber, Verne и Pony.ai е интересен затоа што не се обидуваат сите да прават сè. Pony.ai ја обезбедува технологијата за автономно возење. Компанијата користи Level 4 автономна технологија, што значи дека возилото е дизајнирано да ги извршува сите задачи поврзани со возењето во одредени услови без потреба од човек да управува со него.

Verne, хрватската компанија која работи на автономна мобилност, е сопственик и оператор на возниот парк во Загреб. Компанијата уште во март соопшти дека ќе ја има улогата на локален оператор, додека Pony.ai ќе ја обезбеди автономната технологија, а Uber ќе го интегрира сервисот во својата платформа.

Uber, пак, ја носи платформата преку која корисниците го нарачуваат возењето, плаќаат и добиваат поддршка. Практично, за корисникот искуството треба да биде слично на обично Uber возење. Главната разлика е што зад воланот нема класичен возач.

Засега сепак има човек во возилото

Иако станува збор за автономни возила, првата фаза не значи дека Загреб веднаш ќе биде полн со автомобили без луѓе во нив.

Во возилата во почетната фаза ќе има обучен безбедносен оператор, кој ќе го следи возењето и ќе интервенира доколку тоа биде потребно. Целта е постепено да се премине кон целосно автономна операција.

Ова е важен детал бидејќи воведувањето автономни возила во Европа не е само технолошко прашање. Регулативата, одговорноста при сообраќајна несреќа, осигурувањето и начинот на кој автономните возила се однесуваат во реален град се исто толку важни.

Verne претходно објасни дека токму регулаторната подготовка и локалното оперативно знаење се дел од нејзината улога во проектот. Она што е можеби поважно од самото лансирање во Хрватска е планот што Uber и Pony.ai го имаат за остатокот од Европа.

На 13 август компаниите најавија проширување на партнерството со план за распоредување на повеќе од 2.000 роботаксија во Европа, покрај Загреб и во уште четири европски градови. Имињата на градовите засега не се откриени.

Партнерството е замислено како модел што може релативно лесно да се повтори на различни пазари. Pony.ai ја носи автономната технологија, Uber ја обезбедува платформата и корисниците, додека локални партнери можат да бидат задолжени за сопственоста и секојдневното управување со возниот парк.

Тоа е значајна промена во однос на досегашниот пристап кон роботаксито, каде автономните компании често мораа сами да го изградат целиот екосистем околу возилата.

Uber сака мешан пазар на возачи и роботи

За Uber, автономните возила не значат дека традиционалните возачи веднаш ќе исчезнат од платформата.

Компанијата веќе го опишува својот пристап како хибриден пазар, во кој автономните возила и човечките возачи работат паралелно. Uber веќе воведува автономни возила во одредени американски градови, а достапноста зависи од локацијата и времето.

Во Европа, сепак, Загреб е првиот вистински тест за овој модел. За корисниците, најголемата промена може да биде тоа што автономното возење постепено ќе стане уште една опција во истата апликација која веќе ја користат за класичен превоз. Наместо да отвораат посебна апликација за роботакси, автономното возило едноставно ќе биде дел од понудата на Uber.