Microsoft минатата недела објави дека ја издава Windows 11 Insider Build Beta верзијата на новиот оперативен систем. Претходно компанијата ја претстави и Developer верзијата на оперативниот систем, но ова треба да биде постабилно издание, кое е поблиску до финалната верзија на Windows 11.
Иако станува збор за постабилна верзија сепак инсталирањето на бета како единствен оперативен систем на компјутерот веројатно не е добра идеја. Секако оваа верзија е постабилна од верзијата за девелопери, но тоа не значи дека е готова за сите корисници. Инсталирање на втора партиција или на сосем друг компјутер (тест машина) е попаметно решение.
Еден од најголемите предизвици за сите кои се заинтересирани за учество во тест програмата е хардверот. Компанијата во најавата на новиот Windows ни го претстави минималниот потребен хардвер:
- 1GHz или побрз барем двојадрен 64-битен процесор
- 4GB RAM
- 64GB слободен простор
- TPM верзија 2.0; UEFI; Secure Boot
- Графичка картичка компатибилна со DirectX 12+ и WDDM 2.0 драјвер
- 720p дисплеј со екран над 9-инчи
Во последниот блог за минималните побарувања, Microsoft е малку поспецифичен за процесорите:
„Уредите кои доаѓаат со 8-ма генерација Intel процесор, AMD Zen 2, Qualcomm 7 и Qualcomm 8 Series ги исполнуваат принципите за безбедност и доверливост, но и минималните побарувања за Windows 11…“
Сите кои сакаат да се вклучат во Windows Insider програмата можат од Settings > Update & Security > Windows Insider Program да одберат Get Started да се регистрираат за учество.
Засега нема точна дата за излегување на Windows 11.
