Неделава никако не седевме со скрстени раце. По организираниот giveaway за The Rogue Prince of Persia, ви предложивме 3 солидни игри за забавен старт на неделата, а потоа и пеколно добра игра во форма на Hell of an Office! По проникливиот разговор со Љупчо Кошчицовски за неговото студио Snowball Games, се опуштивме со релаксирачката Sunnyside, па потоа разговаравме со Анселм Пајта и Бенедикт Хамел за предизвиците и инспирацијата за Lucky Tower Ultimate, за да на крај завршивме раниот преглед за The Last Plague: Blight.
Технички не застануваме тука. Со поднаполнети батерии од празничното расположение, решивме овој викенд да направиме нешто поразлично и да ви препорачаме неколку интересни демо верзии за игри кои допрва ќе излезат. Некои демо верзии може уште викендов да се проверат, а некои демо верзии ќе се појават привремено на Steam Next Fest настанот, кој ќе се одржи од 14 октомври до 21 октомври.
Достапно демо: Trash Goblin, од Spilt Milk Studios
Trash Goblin
Релаксирачка симулација во која откривате и чистите најразлични предмети. Потоа, на истите им вдахнувате нов живот и ги продавате на, обично, ексентрични муштерии.
Демото за Trash Goblin одлично ви покажува дел од гејмплеј елементите поврзани со чистење, средување, изложување и продавање најразлични работи, притоа стапувајќи во впечатливи интеракции со муштериите.
Преку демото ќе можете да ги проверите првите триесетина минути од играта и да експериментирате со 20-тина предмети. Со спечалените пари ќе можете да ја надградувате вашата продавница, да купувате нови алатки за подобро обновување на предметите, како и да го ширите вашиот бизнис низ градот. Интересна cozy игра со малку поразлични механики кои целосно се фокусираат на убавината која произлегува од средување и продавање стари предмети.
Trash Goblin излегува на 6 ноември 2024!
Достапно демо и цела игра: Skautfold: Into the Fray, од Steve Gal
Skautfold: Into the Fray e единствената игра во овој текст која е веќе излезена. На Steam e излезена поодамна, но на PS5 неодамна се појави по прв пат пред недела дена.
Skautfold: Into the Fray
Акциона RPG игра која влече силна инспирација од Doom и Dark Messiah. Преку едноставна графика ќе добиете бројни можности за адреналински пресметки со најразлични оружја и против предизвикувачки непријатели!
Како дел од серијалот Skautfold, Into the Fray ги продолжува настаните кои беа обработувани во Usurper и Shrouded in Sanity. Тоа значи дека некои работи поврзани со приказната би ви биле делумно нејасни доколку првин не поминете низ претходните игри од серијалот. Но, доколку сте заинтересирани да го пробате демото, приказната слободно може да се повлече во втор план.
Skautfold: Into the Fray е игра која се одликува со предизвикувачки битки. Во случај да сакате брутална игра во која константно избегнувате удари и напаѓате со арсенал од оружја, ова е игра само за вас. Мапите, иако едноставни, служат за одлично пополнување со легија од предизвикувачки непријатели. Непријателите се одликуваат со уникатни напади и никако не дозволуваат премногу да се опуштите.
Демо кое едвај чекаме да го провериме: Sancticide, од Red Square Games, Sylen Studio
Sancticide
Sancticide е акциски roguelike со hack and slash примеси, но во трето лице. Во постапокалиптичен свет, ќе играте со колекционер на гревови, што е само фенси збор за крвава и визуелно импресивна акција!
Демото би требало да понуди на играчите арсенал од ладни оружја, како и бројни можности за крвави комбинации, се со цел да се извлечат импресивни елиминации. Покрај користењето ладни оружја, ќе можете да користите и оружја за напад од далечина, како и најразлични моќи. Особено сме заинтересирани за моќите. Дел од нив ќе ви дозволат да кревате предмети и суштества користејќи ја моќтта на вашиот ум. Друг дел, пак, ќе го менуваат времето и перцепцијата на околината околу нас. Сакаме уште многу повеќе да кажеме на оваа тема, но не смееме. Ќе мора да почекате до 14-ти и самите да проверите!
Достапно демо: Warside, од Lavabird
Warside
Стратегија со запазување редови. На располагање имате самостојна кампања, поддршка за мрежно играње, едитор за мапи и бројни единици кои ќе ве одведат до ултимативната победа.
Штотуку излезеното демо за Warside ќе ви дозволи да одиграте неколку нови мисии, да го пробате мрежниот дел и во ко-оп и ликално, и онлајн преку некои од внимателно избраните pvp модови. Доколку сакате turn-based статегии со невообичаена графика, тогаш преземете го демото, одберете лиде, и ослободете деструктивни моќи врз предизвикувачките непријатели.
Демо кое едвај чекаме да го провериме: Overthrown, од Brimstone
Overthrown
Амбициозна игра преку која ќе можете да градите и да управувате со огромно кралство. Сами или со уште пет други пријатели, ќе можете да ги браните вашите граѓани од нандити и мутанти, да одгледувате различни култури и да собирате ресурси, водејќи, притоа, посебна грижа и за среќата на вашите селани.
Демо верзијата која, со малку среќа, би требало да е излезена во моментот кога го читате овој текст, ќе ви понуди околу час и половина време на играње или две сезони во играта. За време на демото, можете без проблем да повикате уште пет ваши пријатели и да започнете со истражување, отклучување и градење на над 20 структури, како и да одгледувате култури и да поставувате дополнителни структури во вашето кралство. Паралелно со ова, ќе можете да се соочите со три уникатни непријатели. Среќно!
Достапно демо: Nazar, од Eray Dinc Studio, Recontact Games
Nazar
Nazar е уникатна игра која ви дозволува да навлезете во интересна комбинација помеѓу FMV и 2D platforming. Истражувајте неверојатен свет, отклучувајте психички моќи и спречете ја мрачна иднината која се заканува на вашиот свет!
Моќите кои ќе можете да ги отклучите во Nazar ќе ви дозволат да гледате во иднината, да решавате загатки кои се поврзани со перцепција на времето околу вас, како и да се спротивствавувате на предизвикувачките непријатели од Fatum култот.
Nazar е создадена од познатиот FMV директор Иреј Динк, а се одликува со музика од познатиот композитот Инон Зур. Игра која ветува многу, едвај чекаме да навлеземе во неа.
Достапно демо: Tomb Stalkers, од Itchy Games
Tomb Stalkers
Игра која жонглира аркадни елементи со загатки на уникатен начин. Шетајте низ гробниците и пробајте да ги откриете бројните мистерии што со векови себично биле криени зад бројни скриени ѕидини и смртоносни замки
Tomb Stalkers веќе имаше демо, но сега истото е значително надградено. Демото се одликува со надградени перформанци, подобрен систем за одбележување предмети и осветлување на околината. Паралелно со ова, стазите кои ги имате на располагање се значително проширени, а има воведено и поддршка за играње со други играчи преку Steam Remote Play.
Тоа беа демо верзиите кои сакавме да ви ги препорачаме во оваа прилика. Како се наближува Steam Next Fest така очекувајте уште многу други интересни предлози за брза, каратка и, пред сѐ, бесплатна забава. Убав викенд!
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
