Месецот кој го оставивме зад нас, беше полн со одлични игри за играње. Како една од игрите кои навистина сакавме да ја пробаме беше и SUPER BOMBERMAN R 2. Уште пред да излезе, чедото на KONAMI ни оставаше впечаток на носталгично, шаренолико патување низ различни светови и бројни можности за предизвикувачки пресметки со другите играчи.
Првата Super Bomberman излезе во 2018 година и, покрај проблематичните рецензии, сепак успеја да собере бројни фанови. Двојката ветуваше зајакнување на сè што беше добро во единицата и исфлување на сè што беше лошо. Дали KONAMI успева да го издигне овој долгогодишен серијал или пак можеби е време да конечно да крене раце од него?
Лек за несоници
Доколку ја играте SBR2, играјте ја поради мултиплеерот, а никако поради кампањата за еден играч (story mode). Повеќе од очигледно е дека се вложени ресурси и талент во кампањата, но здодевната, детска приказна и пренагласена глума допринесуваат константно да превртувате со очите и да го благословувате времето по завршување на секоја секвенца.
Единствена ситуација за која би ве советувале да поминете низ кампањата е доколку имате детенце со кое сакате да ги здружите силите преку локален ко-оп и заеднички да ставите крај на злобниот цар Баглер!
Bombs away!
Во аркадниот мултиплеерот се наоѓа најголемата и најпредизвикувачката забава која се заснова на добро-познатиот гејмплеј принцип: движење низ мапата и поставување бомби кои уништуваат елементи и непријатели според одредена шема. Оваа клучна механика е земена како темел врз кој е изграден еден од најполуларните режими. Резултатот е хаотична и разнолика забава која се простира низ мајсторски дизајнирани мапи.
Battle Royale во Bomberman?
Како еден од најинтересни режими дефинитивно се истакнува Battle 64. Преку овој мод, можете да изберете да играте против 8, 16, 32 или 64 играчи, се додека не остане само еден. Наспроти вашата првична мисла, Battle 64 не фрла 64 играчи на една иста мапа, туку расфрлува групи од по 16 играчи низ мини мапи.
Доколку победите на мапата, продолжувате на друга мини мапа, и сè така сè додека не произлезете како ултимативниот шампион. На овој начин, работите никогаш не излегуваат од контрола и полесно можете да се справите со хаосот.
Крал на замокот
Вториот, подеднакво интересен, но крајно различен режим за повеќе играчи е Castle Mode. Се работи за мод заснован на асинхрона механика, но наспроти ужас во најчиста форма, како во ситуацијата со The Texas Chain Saw Massacre, овде работите се значително повесели. Имено, еден играч е крал кој мора да ги заштити бројните цели раштркани низ замокот, а сите други играчи работат против кралот и ги здружуваат силите за исполнување на одредените цели.
Кралот може да имплементира најразлични елементи за штитење на целите, односно успорување на непријателите, а играчите мора да ги исполнат сите цели доколку сакаат да се победници.
Експлозивна забава
Покрај горе-споменатите режими, го имате на располагање и стандардниот мод. Со добро-познатите механики и зацртани правила, тврдокорните носталгичари можат да навлезат и во таканаречениот Grand Prix режим каде битките се помеѓу два тима, а целта е да се победи спротивниот тим.
Секако, би било нефер и да не го споменеме моќниот едитор. Преку оваа алатка, можете да уредувате мапи со бројни блокови и механики, а потоа мапата да ја играте со вашите пријатели или да ја споделите со заедницата.
Секој од модовите нуди одредена разноликост која лесно ќе излезе во пресрет на вашите моментни потреби за инстантна забава. Слично на единицата, и SUPER BOMBERMAN R 2 беше прифатена од заедницата со измешани рецензии, но факт е дека двојката е значителна надградба на единицата и храбро пробува нови работи.
Независно од тоа дали сте долго-годишен фан или пак по првпат се сретнувате со овој серијал, SUPER BOMBERMAN R 2 нуди изобилство од можности за одлична мрежна забава.
Повеќе детали за играта
- Произведува: KONAMI
- Издава: KONAMI
- Жанр: акција, мултиплеер
- Платформа: Microsoft Windows, конзоли
- Ќе излезена на: 12 септември 2023
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
