Неодамна објавивме листа од 10 игри со кои би можеле да ја почнете новата година. Се потрудивме да покриеме што е можно повеќе жанрови во листата, но еден жанр беше криминално игнориран – жанрот на акциони roguelike игри во стилот на Vampire Survivors. За среќа, во меѓувреме успејавме да го провериме и чедото на Igniting Spark Games. Striving for Light: Survival е интересен спин-оф со богати можности.
Многу опции за малку пари
Преку интересен, рачно-нацртан визуелен стил, Striving for Light: Survival се одликува со динамични механики кои допринесуваат до забавна акциона формула. Имено, на располагање имате 8 различни ликови и 37 оружја за пресметки од блиску или од далечина. Згора на ова, имате можност за експериментирање со над 60 вештини во дрво кое се развива на рандомен начин, се со цел да се понуди понепредвидлива забава со повисока вредност на преигрување.
Низ 16 уникатни мапи, ќе се соочите со над 30 уникатни непријатели, со исто толку „нормални“ босови и со дополнителни 16 endboss-ови. Нема да лажеме, листава од опции е навистина долга и крајно сме импресионирани од финалниот резултат на Igniting Spark Games, уште повеќе откако дознавме дека самиот автор ја има осмислено музичката подлога, со должина од скоро 80 минути.
Доколку не сте сигурни дали е ова игра за вас, дефинитивно проверете го демото за Striving for Light: Survival. А, во случај да сакате дополнително да ја продолжите забавата која ќе ја најдете тука, би ви го насочиле вниманието и кон Striving for Light играта која, и понатаму е дел од раниот пристап на Steam!
Повеќе детали за играта
- Произведува: Igniting Spark Games
- Издава: Igniting Spark Games
- Жанр: Акциона RPG
- Платформа: Microsoft Windows
- Излезена на: 2 декември 2023
