Она што го очекувавме, тоа и го добивме. Samsung на „Light Up Seoul“ настанот престави два нови телефони со флексибилен екран, паметен часовник и таблет компјутер. Вестите за уредите кои ќе ги видиме, а и изгледот на уредите, протече предвреме, па на настанот немаше некое големо изненадување. Ако воопшто може да се зборува за било какво изненадување, тогаш тоа секако е цената на телефоните.
Samsung Galaxy Z Fold 5
Galaxy S е „флегшип“ уред кај стандардните телефони, а се чини дека Galaxy Z Fold треба да го заземе местото кое во минатото го имаше Note. Компанијата престана да ја издава серијата со Galaxy Note 20, а денес овој простор Samsung се обидува да го пополни со Fold уредите. Основниот модел на новиот Fold 5 чини 1800 долари, и за таа цена може да купите 2 Galaxy S23 телефони.
Најновата надградба на Fold телефоните не се разликува премногу од својот претходник. Телефонот доаѓа со 7,6-инчен внатрешен дисплеј и 6,2-инчен дисплеј на надворешната страна. Двата екрани се со рефреш до 120Hz, а внатрешниот екран е ист како оној кој Samsung го користи во S23 Ultra.
Вкупната дебелина на телефонот кога е преклопен е 13,5 mm, што го прави потенок од претходникот, но и речиси 1,5mm подебел од Pixel Fold. Заштитата на телефонот е IPX8, ова покажува дека е водоотпорен, но според овој код механичката заштита не е тестирана што не изгледа премногу веројатно. Тоа е доволно да ви покаже дека носењето на телефонот на плажа или на било кое место со ситни честички не е најдобра идеја.
Со оглед на тоа дека станува збор за „флегшип“ уред, љубителите на паметни телефони веројатно веќе и можат да го погодат хардверот. Процесорот е 4nm Snapdragon 8 Gen 2 Mobile Platform for Galaxy од Qualcomm. Телефонот доаѓа со 12GB RAM и 256GB, 512 GB или 1TB простор.
Модулот за камера доаѓа со 3 сензори, 50MP на главната камера; 12МP широко-аголна и 10МР телефото камера. На внатрешната страна нема камера, но на предниот екран има 10МР селфи камера.
Батеријата е со капацитет 4400 mAh со 25W полнење, а има и безжично полнење.
Претпродажбата започна денес, а официјално телефонот ќе биде достапен од 11 август.
Galaxy Z Flip 5
Вториот уред со флексибилен екран е еден од оние ретро флип телефони. Flip 5 доаѓа со 3,4-инчен помошен екран на предната страна, наменет за брз преглед кога телефонот не е отворен. На екранот се достапни мали виџетчиња, кои ги споделуваат потребните информации, но ако затребаат повеќе детали, може да се отворат и апликациите. Како и претходниот уред, и Flip е на својата петта верзија.
Телефонот доаѓа со истиот Snapdragon 8 Gen 2 специјално прилагоден за Samsung процесор како и Fold 5. Основниот модел доаѓа со 256GB простор и 8GB RAM меморија, а достапен е и модел со 512GB простор.
Внатрешниот екран е 6,7-инчен, 1080p OLED, со рефреш до 120Hz. Предниот екран е 720р OLED и рефреш од 60Hz.
Главната камера е 12МР, а има и 12МР широко-објективна и 10 МР селфи камера.
И овој уред доаѓа со заштита IPX8, што звучи одлично за заштита од вода, но некако не нѐ охрабрува кога механичката заштита е во прашање.
Капацитетот на батеријата е 3700mAh се полни со 25W или 15W безжично.
Претпродажбата е веќе започната, а телефонот официјално излегува на 11 август. Цената за која е достапен е 1000 долари.
Покрај телефони, на настанот беа претставени и новите надградби на паметните часовници и таблет компјутери од Samsung, но за нив ќе може да прочитате во неделниот „Хардвер од оваа недела“.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
