Furious Avocado 
На почетокот на минатиот месец македонското студио за видеоигри Furious Avocado ја издаде и својата втора игра Candle Craft, која веднаш стана светски хит – неколку милиони играчи веќе играат и се забавуваат креирајќи виртуелни свеќи и надградувајќи го своето студио за свеќи. Издавач на Candle Craft 3D е најголемиот издавач на т.н. „хиперкежуал“ видеоигри Voodoo. Furious Avocado е основано на 15-ти јануари 2020 година од страна на Бобан Стојчевски, Дамјан Михаилов, Томи Џуровски, Марио Ампов, Иво Нешковиќ и Наум Михајловски. Нивната прва игра Tie Dye, издадена преку Crazy Labs, ја создадоа во јуни, а благодарение на посветеноста и редовните надградби играта успешно се одржуваше на врвот на популарни кежуал видеоигри зa Android и iOS со месеци и ја надминаа бројката од 140 милиони преземања (ако ви недостасуваат нулите за перцепција, повелете: 140.000.000). Btw, оценката на играта е 4.1 од 360.880 рецензии, што е супер оценка.
Новата игра на Furious Avocado – Candle Craft 3D повторно е супер едноставна игра. Играчите од виртуелен восок креираат свеќа. На почетокот доаѓа муштеријата кој ви кажува каква форма на свеќа сака да му направите, и има повеќе различни бои на восок во кои играчите ја потопуваат својата свеќа. На крајот користејќи различни ножиња треба да ја креираат и нејзината конечната форма. Со секоја продадена свеќа играчите добиваат парички кои потоа може да се користат за надградување на продавницата. И новата игра веќе има неколку милиони преземања…
За тоа како се прават популарни игри за мобилен, како истите се пробиваат на пазар, тајните ни ги открива Наум Михајловски, еден од основачите на Furious Avocado, студио за игри со многу светла иднина.
Идејата за првата игра Tie Dye беше во соработка со претходниот издавач Crazy Labs, како настана идејата за Candle Craft 3D?
Candle Craft е идеја која е дојдена од интерниот процес на идејација на Furious Avocado. Уште од поодамна го имавме увидено виралниот тренд на изработка на свеќи, но воедно и слободниот простор за еден ваков наслов, бидејќи ништо слично не постои на пазарот. Популарноста на трендот во спрега со нашата интуиција дека треба да се обидеме на ова поле, и визија за игра која се базира на креативност но и прецизност, како додатен предизвик, вродија со плод…
Како всушност изгледа процесот кога си пичувате идеи? Како одлучувате: Е ОВА Е ТОА! ?
Како тим, секојдневно работиме на нови идеи за игри кои се базирани на моментални трендови, анализа на пазарот на игри, интуиција и пасија. Инспирацијата може да дојде буквално од било каде и од било кого. Сите овие идеи се вметнуваат во една огромна интерна листа од која подоцна ги бираме најинтересните, кои според нас, сакаме да им ги презентираме на нашите издавачи. Нивното мислење и евентуални сознанија, во случај да имаа тестирано во минатото игра која засега иста тематика како некоја наша идеја, е вториот филтер преку кој поминуваат идеите за да на крајот станат дел од листата за тестирање и трпеливо го чекаат својот ред да бидат прототипирани :)
Така да, TL:DR, нашиот процес е прилично сегментиран, се базира на спој помеѓу интуицијата, рационалноста и бизнис аспектот.
Voodoo е еден од најголемите издавачи на hyper-casual игри, како дојде до соработката? Имаше тешки преговори или брз беше процесот?
Voodoo е еден од основоположниците на hyper-casual индустријата, а воедно и најголемиот издавач на ова поле статистички гледано, кој 2021 ја заврши со тотален број на симнувања на сите свои игри, како следните три издавачи на листата заедно.
Процесот на преговори за соработка со Voodoo се одвиваше подолго време. Веднаш по мега успехот на Tie Dye, Furious Avocado го доживеа статусот на Star Studio, според зборовите на издавачите. Овој статус ги донесе и буквално сите светски издавачи (повеќе од 40) на наша врата. Секако, од бизнис перспектива, за нас имаше многу смисла да почнеме соработка со уште еден партнер на ова поле, пред се заради различен пристап во издавачкиот процес, што е голема можност за нас да созрееме како студио.
Од сите издавачи кои ни пристапија, Voodoo беа најупорни и најпрофесионални, како во намерата да станеме нивни партнери, така и во бизнис условите кои ни ги понудија. Фактот дека се број 1 hyper casual издавач само ја олесни за нас финалната одлука.
Секако за ова да се реализира и ние како студио моравме да пораснеме за да имаме доволно ресурси истовремено да работиме на нови концепти со два издавачи, Crazy Labs и Voodoo, а воедно и константно да ја надградуваме и подобруваме Tie Dye.
Минатиот пат потенцираше дека е успех ако воопшто игрите го завршат во целост патот до излегување. Веќе имате две игри со супер резултати на врвот на листите. Дали можеш да ни наброиш 5 тајни што се кријат зад една успешна мобилна игра?
Издавањето на нова hyper-casual игра станува се потешко од година во година заради големата сатурација и се поголемата конкуренција. Претпоставувам дека прашањето се однесува баш на овој сегмент на индустријата, па и мојот одговор ќе го базирам на тој контекст, кој би бил поразличен доколку зборуваме за casual или midcore игри.
1. Маркетабилност. Доколку играта има рекламна моќ да донесе голем број играчи за минимална „цена“ тогаш еден од најголемите предуслови за успешна и хит игра е исполнет.
2. Заразност. Основниот гејмплеј на играта мора да „лепи” и да го импресионира играчот „на прва”. Контролите и играчкото искуство мора да се беспрекорни и да предизвикуваат сатисфакција кај публиката.
3. Едноставност. Една hyper casual игра за да биде успешна мора да допре до што побројна публика. Ова значи и до публика која не е природно склона кон „играње игри“. Играта мора да поседува супер-интуитивни контроли, и да е разбирлива во првите 5 секунди за секого.
4. Мета. Ова делот од играта која го опкружува основниот гејмплеј. Добрата мета треба да и даде на играта една поширока смисла која ја надградува основата, го наградува вложеното време на играчот, дава смисла на прогресија и и дава на публиката причина да се навраќа секојдневно на играта во еден подолг временски период.
5. Пасиониран и посветен тим.
Колкаво учество имате како развивачи на играта во нејзиниот маркетинг и промоција?
Во принцип, развојните студија се фокусираат на изработката на самата игра, додека примарната одговорност и експертиза на издавачот е маркетингот, преку нон-стоп продукција на реклами и промоција на играта со истите преку социјалните и рекламните мрежи.
Но ние, како Furious Avocado, функционираме на еден малку поинаков начин. Секако дека развојот на игрите ни е примарен фокус, но сепак, заради нашата структура, продукциска моќ и квалитет кои можеме да ги испорачаме, често, во соработка со издавачите, сме вклучени во изработка на маркетинг материјали и кампањи кои се базираат на моментални вирални трендови или сезонски празници.
Како влијаеше пандемијата на вашиот сегмент од пазарот – игри?
Би рекол дека зависи од кој аспект гледате.
Од една страна може да кажеме дека индустријата за игри е една од ретките индустрии на кои пандемијата влијаеше позитивно (pun intended ;) ), што е разбирливо, имајќи в’ предвид дека се работи за забавна индустрија и забавни продукти кои им се сервираат на луѓето во време на затвореност и изолација.
Од друга страна, изместувањето на работата и продукцијата од дома, особено на поголемите студија и гејминг компании кои се базирани на огромни тимови, им создаде големи комуникациски и организациски проблеми. Па сведоци сме на многу поместени датуми за издавање на големи игри или проблеми при самото издавање.
За среќа, како Furious Avocado, студио кое се роди буквално на прагот на пандемијата, може да се пофалиме дека многу брзо и успешно успеавме да поставиме структура и протоколи, кои ни овозможија да издадеме две хит игри работејќи од своите домови.
Можеш ли да споделиш неколку совети на што да се фокусираат ентузијастите кои сакаат да прават игри? Од каде да почнат?
Најбитно е да се разбере дека со првото дело нема да се промени светот. Обично младешкиот ентузијазам е склон кон вакви амбиции. Но, треба да се почне од мали нешта. Едноставни прототипи, едноставни механики, едноставна графика. Нешта кои најверојатно никогаш нема да го здогледаат светлото на денот, но ќе им овозможат преку грешки да научат и да се надградат. Да бидат неуморни во копањето на нови информации и методи преку разни канали, форуми, групи. Да следат други ентузијасти и инди-тимови. Никогаш да не престанат да учат.
Пробајте ги игрите на Furious Avocado:
- Tie Dye
- Candle Craft 3D
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
