Времето на купување физички копии на игри е во фаза на заминување. Локално, тука и таму, гејмерите на конзоли имаат на располагање прилично мал број игри, најчесто преку Галерија, Анхоч, Сетек и слични продавници, но за 95% од продажбите сепак е потребно да направите дигитална трансакција и да купите клуч за играта која ја сакате.
Во поглед на ова, со години гејмерите се поделени. Од една страна, некои купуваат клучеви од официјални продавници, како од Steam, Epic Store, Ubisoft, EA и слично. Ваквите гејмери може да ги поделиме дополнително и во три подгрупи:
- Првата подгрупа имаат пари и воопшто не размислуваат за цената; си купуваат она што сакаат – кога сакаат!
- Втората група, следат постојани зделки, чека внимателно кога омилената игра е на попуст и тогаш ја купува од официјалните продавници, и
- Третата подгрупа, не знае дека има целосно друга група гејмери кои ги купуваат клучевите од неетички гејмери или препродавачи
Сајтови кои нудат значително поевтини игри преку неофицијални продавачи на клучеви
Многу продавници продаваат неофицијални клучеви на игри. Нивниот број е запрепастувачки голем, а историјата зад тоа како продавниците дошле до клучевите е непозната. Некои клучеви, кои што се продаваат преку неофицијалните продавници, се добиени по легален пат. Претпоставуваме дека се сеќавате дека преку Twitch Prime минатиот месец се нудеше феноменалната игра Star Wars: Squadrons. Таа игра моментно не е достапна преку промоцијата и, според CheapShark, ако сакате да ја купите сега, најевтиниот официјален клуч за неа е на Fanatical и чини 2000 денари. Но, не и на неофицијалните продавници. На неофицијалните продавници, играта и понатаму има чудно ниска цена од 50 денари. Ова кажува дека бројни препродавачи имаат направено еден куп акаунти преку Twitch Prime, па потоа го имаат искористено бесплатниот пробен период од месец дена за да зграпчат, теоретски, стотици и стотици клучеви кои и понатаму продолжуваат да ги продаваат по смешно ниска цена. Што, за гејмерот кој нема или не сака да одделува поголеми финансиски средства за овој е-спорт :), е одлична работа.
Можни проблеми со купување клучеви од неофицијални продавници
Од друга страна, често се случува клучевите кои се продаваат да се купени со украдена кредитна картичка и потоа да се препродаваат. Паметиме ситуација каде купивме клуч за Titan Quest експанзијата Titan Quest: Ragnarök преку неофицијална продавница. Цената на експанзијата беше околу 100 денари таму, значително поевтино од 1200 денари, нели? По само еден ден, нѝ стигна известување на Steam дека клучот е деактивиран по барање на издавачот.
Ова значи само едно нешто – клучот е купен на начин кој не се оправдува од издавачот и го имаат наложено Steam да го повлече. Решивме да не застанеме тука и купивме уште еден. Откако по два дена и тој беше деактивиран, купивме уште еден – зошто да не? Ни треба материјал за текстови…. Па и уште еден. Лично, на авторот на овој текст не му пречеше затоа што парите од претходните трансакции се враќаа откако преку поддршката ќе се пријави дека клучот е невалиден. Четвртиот клуч што го купивме и понатаму останува активен, но целото искуство беше, во најмала рака, непријатно и големо трошење на време кое можеше да биде поминато во играње на експанзијата за Titan Quest.
Паралелно со ова, многу издавачи низ годините порачуваат преку социјалните мрежи подобро да им се преземе нивната игра како пиратски торент отколку да се даваат пари на неофицијалните продавници. Тоа е затоа што, во поголемиот дел од ситуациите, издавачите и девелоперите, немаат никаков профит од клучевите кои се продаваат преку неофицијални продавници, а таквата финансиска инфузија само додатно ги мотивира неофицијалните продавници да продолжат со истата пракса. Но, во време кога просечниот гејмер нема пари, моралната и етичката граница знаат да претрпат одредени поместувања.
Кои се тие неофицијални продавници?
Погоре го споменавме CheapShark. Ова е феноменален веб сајт кој прикажува зделки од официјални продавници и лесно можете да видите која игра по кои цени се продава низ бројните продавници во моментот, кога била најниската цена по која се продавала, како и да го оставите вашиот имејл за известување кога истата игра повторно ќе е на попуст.
CheapShark е супер, но AllKeyShop оди еден чекор понапред и прикажува зделки од игри и од официјални и од неофицијални продавници. Можете да добиете информации за игри за најразлични платформи за PC, или конзоли, како и да дознаете по која цена се продаваат најразлични валути и додатоци за игри. Нема што нема и е дестинација број 1 за сите оние гејмери кои по која било цена сакаат да поминат поевтино. Од неофицијални продавници со значително евтини игри и позитивна репутација, често се истакнувaат неколку продавнци и доколку ги посетите ќе видите стотици и стотици клучеви за игри кои се под 1 евро.
На што да внимавате доколку купувате од неофицијални продавници?
Првин, на вашата совест. Дали сметате дека е во ред да се купува од тука, со оглед на тоа дека не знаете од каде доаѓа клучот? Дали сте спремни да ризикувате да дадете пари, а клучот да не може да се активира или пак да ви направи проблем по одредено време? Искуството на авторот на овој текст е дека во 90% клучевите се активираат и функционираат без проблем, со исклучително мали шанси да бидат деактивирани подоцна.
Но, треба да внимавате.
Еден сајт, на пример, постојано наметнува опција за додатна заштита, која чини повеќе пари. Па така, Control – Ultimate Edition на тој сајт моментно чини 30 денари. Ако одите на копчето Buy Now ќе видите дека автоматски е изберена опцијата Customer Protection Program. Износот се менува во зависност од тоа колку пари ќе потрошите. За сума од 30 денари, доплатувате пет денари, но за повисоки суми е значително поскапо и ваквата дополнителна услуга може да ве чини и до 500 денари! Гледајте да не ја активирате Customer Protection Program, затоа што дури и да не работи клучот, пак ќе можете да дојдете до задоволителна резолуција со поддршката. Откако ќе кликнете на копчето Go to Checkout, сајтот оди со втора „мајмунска“ работа и сака автоматски да ве принуди да започнете месечна претплата од 130 денари за „дополнителни предности“ како live chat поддршка и ексклузивни попусти. Потребно е да ја деактивирате. На крај, плаќањето го правите преку PayPal, но имајте во предвид дека трошоците од трансакцијата вие ги покривате. Доколку се направи вака, последната цена за Control – Ultimate Edition ќе излезе 66 денари (30 денари игра + 36 денари PayPal трошоци). Во спротивно, доколку не се внимава, сајтот ќе се потруди да ви наплати за играта скоро 200 денари! Ова е честа пракса кај вакви неофицијални продавачи на клучеви и доколку не ја рачно деактивирате претплата, изложени сте на константни месечни трошоци од 130 денари, дури и да не купувате никакви игри.
Времето се менува, а со тоа и начинот на кој доаѓаме до нашите игри. Дали ги користите неофицијалните продавници и какво е вашето искуство со нив? Споделете во коментарите или на социјалните мрежи.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
