Ќе се одржи вториот Game Развиотка, настан организиран од гејмери за гејмери. Целта на настанот, кој е организиран од Македонска асоцијација за развивање игри, или МАГДА, е да се споделат искуствата од поискусните до поновите креатори на видеоигри. Game Развиотка II: Враќање на мускулот, ќе се одржи на 28 февруари во просториите на Seavus Education and Development Center со почеток од 12:00, а влезот е слободен за сите заинтересирани.
„Идејата е да се направи платформа со која луѓето кои имаат искуство од различни аспекти во развивање игри ќе можат да ги споделат тие искуства со нашата заедница.“, вели Петар Котевски, дизајнер на игри и еден од основачите на МАГДА.
Презентери на настанот се Александар Костоски од Seavus на тема „Living as a 24h Gamer“, што ќе биде дискусија за 24 часовна посветеност на дизајнирање на игри, како од концепт се стигнува до реализација и продукција. Кристијан Трајковски и Мартин Пупков од Dark-1 ќе говорат тема „48 hour games“, односно ќе ги споделат нивните искуства од различните Game Jam-ови во Европа.
Говорите ќе бидат куси и треба да бидат уводно излагање кое ќе изроди поширока дискусија. Покрај говорите ова се разбира е одлична можност и за запознавање со заедницата, размена на мислења, но и за дружење. Планот на МАГДА е да привлече над 60-тина гејминг ентузијасти, колку што присуствуваа на првиот настан, и да започне со почести Game Развиотки.
