Beer & Code започна спонтано во стартапот Fridgecheck, каде хрватскиот основач Иван Мајсторовиќ сакаше да ги запознае програмерите и другите ИТ професионалци од Македонија. Иван со тим македонски програмери работи на апликација со која може да се следи потрошувачката на храна, односно колку е празен фрижидерот. Со Beer & Code, вели тој, сакаа да се запознаат уште талентирани луѓе и да споделат идеи. Како поинаку ако не со пиво и муабети за кодирање?
„Основната идеја беше, со пиво во рака, да разговараме за актуелните трендови, да споделиме идеи и да ја зајакнеме македонската заедница, бидејќи по Mobile Monday на кој предавав, немаше посериозни ИТ настани“.
На Beer & Code, кој се оддржува секој втор четврток, а веќе е најавено осмото издание, се собираат околу 50-тина програмери и ИТ ентузијасти кои споделуваат предавања и искуство. Засега има локални предавачи, но Иван вели дека сака со тек на време, како што ќе расне настанот, да донесе и интернационални предавачи кои ќе зборуваат на глобални теми.
„Кој знае можеби еден ден ќе направиме и конференција“, вели Иван.
