Таман изгледаше дека ќе може да заборавиме на Илон Маск и на купувањето на Twitter, aмa Илон има други планови. Ако сумата од насловот ви изгледа познато тоа е бидејќи е истата од април. Основачот на SpaceX и Tesla повторно понуди 54,20 долари за акција, што е истата сума која ја понуди и во април.
Веројатно немаше да биде чудно ако тогаш понудата беше одбиена, па сега Маск да ја обновува. Сепак микроблогот ја прифати оваа понуда, ама Маск се премисли, па се обидуваше некако да се извлече. Маск можеби се премисли, но во Twitter беа задоволни од понудата и беа решени зделката да заврши.
Како главна причина за повлекувањето беше обвинувањето дека Twitter лажно го прикажал бројот на ботови на платформата. Двете страни дури имаат и судски спор кој требаше да започне на 17-ти октомври. Поради новата понуда на Маск, судот го одложи почетокот на спорот за 28-ми октомври.
Илон најави дека Twitter ќе биде дел од „Х“-апликацијата која самиот ја нарече сѐ-апликација (everything app). Засега нема премногу детали за Х, но X.com е првиот успешен проект на претприемачот со кој влезе во PayPal, и му ги овозможи влезот во Tesla и SpaceX. Маск уште од 2017 година го купи X.com назад од PayPal. Оваа недела го нарече Twitter катализатор на креирањето на X. Според неговите проценки купувањето на Twitter ќе го забрза „Х“ помеѓу 3 и 5 години.
Што е Х
Интересно X Holdings е името на компанијата која Илон Маск ја основа во Делавер за да го купи Twitter. X Holdings I ќе биде компанија мајка на Twitter, X Holdings II ќе го купи Twitter, а X Holdings III ќе ја финансира зделката.
Основачот на Tesla не открива што е новиот проект, но ако мора да погодуваме – веројатно станува збор за „супер“-апликација креирана по модел на кинеските гиганти. Маск сака да креира глобална друштвена мрежа која ќе биде креирана по примерот на WeChat, пишува New York Times.
„Мислам дека таква апликација би била навистина корисна. Само функционалноста од апликација без спам каде што можете да коментирате, да објавите видеа – мислам дека е важно за креаторите на содржини да имаат дел во приходите“, откри Илон Маск на подкаст во мај.
За да му успее ова, Маск ќе мора да го направи Twitter попопуларен од било кога. Во моментов микроблогот има околу 450 милиони активни корисници. За споредба WeChat има над 1,2 милијарди активни корисници кои ја користат апликација за комуникација, но и за плаќање, порачки на храна и повикување на такси. Доколку има повеќе корисници, Twitter би може да се етаблира и како систем за плаќање, вели Маск.
Одговорот на прашањето „Што друго би можел да додаде Twitter освен овие функционалности?“ се чини е прашање на време. Веројатно апликацијата ќе се интегрира со Tesla, па ќе има некакво користење на софтверот. Колку би можело да има интегрирање со останатите услуги на компаниите на Илон Маск е прашање, но нема да биде изненадување ако видиме и некој нов сервис.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
