Интересот за купоните е посебно голем во 2012-та година во која имаше 1.240 успешни зделки од вкупно над 1.700 зделки до сега. Тоа е пораст од 262 отсто споредено со 2011. Што се однесува до зделките, најуспешна зделка се ноќевањата во Банско која продаде 403 купони во вредност од 7.000 денари.

Grouper.mk моментално работи со попусти во Скопје, но во втората половина на 2013-та година се планира да се прошират и во други градови. Но, за тоа треба да се направи соодветна анализа и да се најде соодветен тим кој ќе го разбере концептот на сервисот, вели основачот Нина Ангеловска.

„Не е лесно во овој бизнис да се создаде одличен тим за работа, кој пак е еден од главните предуслови за успех имајќи во предвид дека овој бизнис не е толку IT ориентиран како што многумина мислат, туку напротив е многу зависен од луѓето кои работат. Ќе се потрудиме да го најдеме вистинскиот тим со страст и желба за работа, тимот кој ќе го почувствува адреналинот и среќата по добра склучена зделка како што го изградивме сегашниот тука во Скопје.“, вели Нина.