Интервју со Панче Исајески: Со AgentaOS не ви требаат компании во Делавер или Естонија

Секој кој се обидел да лансира сопствен производ или SaaS од Македонија, релативно брзо станува свесен за проблемите. Еден од најголемите проблеми останува прифаќањето на глобалните плаќања со картичка, без различни експерименти од типот на отворање на компании во Делавер или Естонија.

Токму ова е инспирацијата на претприемачот Панче Исајески да ја креира AgentaOS. AgentaOS е платформа која функционира како Merchant of Record (MoR) и им овозможува на основачите, фриленсерите и програмерите да интегрираат претплати, и различни функционалности за наплата за своите продукти, а парите да ги повлекуваат директно на својата домашна девизна сметка.

За Панче идејата за AgentaOS започна во 2021 година кога креираше продукт од Македонија, но сфати дека интегрирањето на „payment processor“ е нов предизвик. Откако ниту отворањето на компанија во Естонија и Делавер, САД не му го решија сосем проблемот, одлучи дека развојот на ново решение е најдобра опција. Со оглед на тоа дека претприемништвото и програмирањето му се пасија, започна со развој на нова платформа.

„Имав своја софтверска компанија Kromatik Solutions, потоа креирав продукт наречен Kromatika Finance, па консултантска компанија во Естонија ’24, Blockia Labs, која подоцна се трансформираше во AgentaOS. 

Програмер сум по душа имам учествувано на три hackathon-и досега: PwC во 2017, Chainlink во 2021, и минатата година x402 hackathon-от на Stripe. Сакам да го одржувам програмерскиот дух од време на време.“, открива Панче.

Идејата ја разработуваше речиси една година, и во овој период откри дека многу претприемачи од Балканот го имаат истиот проблем. Така се роди AgentaOS, платформа која сега е веќе функционална и ги има првите корисници.

Со Панче разговараме за техничкиот стак зад AgentaOS, предизвиците со усогласувањата со законите, како изгледа интеграцијата преку еден prompt и зошто иднината на монотаризацијата на AI продуктите лежи во хибридните модели.

Со свои зборови раскажи ни што е AgentaOS?

AgentaOS дејствува како Merchant of Record и им помага на основачи од Балканот и пошироко да интегрираат картички и претплати, и да добиваат исплата директно на својата девизна банка во ЕУР и УСД. Тоа можеш да го направиш и како физичко лице, и како компанија. Мотивацијата зад тоа е дека во ерата на AI доаѓа бран на solopreneurs. Сем Алтман од OpenAI го кажа тоа најдобро, дека наскоро ќе видиме компании со $1B вредност водени од само еден човек. Верувам дека многу од тие луѓе ќе им треба поддршка токму околу интеграција на плаќања и pricing модели, бидејќи тоа никогаш не било нивна експертиза.

За некој што сега почнува да истражува: која е главната разлика помеѓу payment gateway (како Stripe) и Merchant of Record модел каков што нуди AgentaOS?

Payment gateway процесира само плаќањата, но целата правна, даночна и compliance одговорност останува кај тебе, ти самиот мораш да генерираш фактури, да правиш chargeback и dispute resolution. Дури и Stripe неодамна сфати дека payment processing не е доволно за секого, па лансираа нешто наречено Managed Payments, во суштина нивна верзија на Merchant of Record. Кај MOR моделот, ние легално стануваме продавач, ние собираме данок на продажба, ние одговараме за compliance. 

Но AgentaOS оди чекор понатаму од класичен MOR. Неодамна лансиравме бесплатен Revenue & Pricing Audit, каде не само што ти интегрираме card и wallet плаќања (Apple Pay, Google Pay), туку ти го ревидираме и целиот pricing модел и ти даваме конкретни предлози како да го подобриш, додека веќе процесираш плаќања преку нас. Комплетен payment OS.

Платформата е креирана од мал „bootstraped” тим. Колку време работевте на новата верзија и кој ви беше најголемиот предизвик?

Почнав во претходната компанија, Blockia Labs, пред една година, градејќи алатки за cross-border плаќања, тогаш проектот се викаше Blockia Pay. Во февруари 2026 Blockia Labs се трансформираше, и јас продолжив соло со новата компанија, го зедов продуктот и продолжив да ја развивам идејата. Најголемиот предизвик беше compliance, да ги најдеш вистинските партнери со кои можеш и сакаш да работиш. 

Другиот голем предизвик е доверба. Плаќањето е целосно базирано на доверба, никој не сака да ја стави картичката на случаен процесор. Затоа моравме да градиме доверба и кај корисниците и кај нивните клиенти истовремено, што бара сериозен степен на професионализам: добри terms & conditions, добра структура, добра веб страница, поддршка, мониторинг, буквално сè што би очекувал од сериозен Fintech продукт.

И еден детал, што можеби не е очигледен однадвор. Кога велам „мал тим”, зборувам за тим од еден founder, армија од AI агенти и неколку повремени соработници. Целата архитектура, целата compliance логика, целата инфраструктура за банкарски и card rails, е развиена соло. 

Спомнав погоре дека Сем Алтман очекува еден човек да изгради компанија со $1B вредност. Не знам дали AgentaOS ќе стигне таму, но некој мора прв да покаже дека сериозна fintech инфраструктура, не како side проект, може да се изгради од еден човек. Ако не успее, барем ќе знам дека сум пробал, на свој грб.

Кој е главниот технолошки стак на кој е изградена AgentaOS 2.0, зошто ги избравте токму тие технологии?

Архитектурата ги користи речиси сите enterprise патерни што постојат: hexagonal architecture, clean code, OOP принципи, целото изградено на TypeScript со defensive programming. Интересно е дека почна како рачно пишуван код, без AI vibe coding. Дури откако архитектурата и тестирањето станаа солидни, почнав да користам Claude Code, најмногу за не-core делови. Core фунционалностите, се рачно развиено и рачно тестирано. Работиме со TDD, следиме metrics и monitoring преку PostHog, Supabase како ДБ, и cloud VM за deployment.

Како ја поставивте архитектурата за инфраструктурата да биде стабилна и скалабилна од првиот ден? Кои беа најголемите предизвици во овој дел?

Одговорот всушност продолжува од претходното прашање. Hexagonal architecture ни дозволува да ги менуваме интеграциите (payment providers, banking rails) без да ја менуваме core бизнис-логиката, што е критично кога работиш со повеќе партнери истовремено. TDD не значеше само тестови, туку дека секоја money-moving функција мораше прво да има тест пред да постои имплементација, така веднаш ги фаќаме regressions пред да стигнат до продукција. PostHog и custom logs & monitoring ни даваат видливост во реално време за секоја трансакција и секој usage event.

Каков е процесот за оние кои сакаат подлабока интеграција – какви SDKs, APIs или CLI алатки нудите и колку време му треба на еден девелопер да ја поврзе AgentaOS со својот backend?

Го градевме AgentaOS да биде AI-friendly за интеграција. API-first и намерно многу слично на Stripe API на кое девелоперите се веќе навикнати, исти концепти за webhooks, subscriptions, сè. Потоа изградивме SDKs. Но отидовме и понатаму, имаме CLI алатки за да можеш да го дадеш на своите AI агенти, на пример Claude Code локално, и тие да се поврзат со AgentaOS. Не мора воопшто да го користиш нашиот UI. 

Целата документација е и LLM-friendly, имаме llm.txt, llm-full.txt, и agentaos.ai/SKILL.md, па онboarding-от може да се случи со еден prompt:

Read https://agentaos.ai/SKILL.md and set up AgentaOS for me:
install the CLI, log me in, create a test product, and give me the checkout link.

Тоа е буквално целата интеграција.

Најпривлечниот дел за многу девелопери од регионот е тоа што можат да продаваат глобално како физички лица, без отворање фирма надвор. Како практично изгледа процесот кога парите легнуваат на македонска/девизна сметка? Кои се обврските на корисникот од даночен аспект тука?

Отвораш профил кај нас како физичко лице, поминуваш KYC проверка каде го проверуваме и продуктот и тебе, и ни оставаш девизна сметка, USD или EUR – IBAN. Ние процесираме сè како Merchant of Record, и два пати месечно ти праќаме исплата директно на таа сметка, како девизен прилив. 

Заедно со тоа генерираме payout statement што можеш да го покажеш на банката. Ние ѝ гарантираме на банката потекло на средствата, но пријавата на персонал данок на доход е твоја обврска.

AI стартапите имаат специфични модели на наплата: кредити, токени, хибридни претплати. Како AgentaOS го поедноставува ова за основачите што сакаат да го интегрираат во своите апликации?

Малку кои AI продукти имаат чист subscription модел, обично гледаш комбинација, кредити плус претплата, или токени со overage наплата. Наместо секој founder да ја гради таа логика одново, API-то е дизајнирано да поддржи хибридни модели директно, наплата по употреба паралелно со стандардна претплата, без да мора да развиваш посебен pricing систем за секоe сценарио.

Како се справувате со chargebacks и измами (fraud detection)?

Имаме OPS / Backoffice платформа која проактивно ги следи трансакциите. Дефинираме правила, имаме и AI агенти кои постојано ги проверуваат нашите корисници и нивните клиенти, и ако детектираат сомнителна активност, алармираат и директно го контактираме корисникот проактивно, пред проблемот да дојде до dispute. Покрај тоа, интензивно користиме 3D Secure. Едноставно кажано, тоа е чекорот каде банката бара да потврдиш дека навистина си ти оној што плаќа, преку push нотификација или код во банкарската апликација, пред трансакцијата да помине. Ако картичката е украдена, лицето нема пристап до твојот телефон, па плаќањето не поминува.

Освен цената, која е главната предност што ја нуди AgentaOS?

Нашиот pricing модел е % fees од процесирана трансакција. Да, поевтини сме за процесирање од голем дел од конкуренцијата, но не гледам на тоа како главна приказна. x% од 0 revenue e 0.

Она што сакаме е нашите клиенти да растат, затоа им нудиме бесплатни revenue и pricing audit-и, ги промовираме, ги советуваме. Тоа е модел на сервис како софтвер, кој ниту еден друг payment processor ниту Merchant of Record во моментов не го прави на овој начин. Ако нашите корисници растат, ние растеме заедно со нив.

Верувате дека локалната стартап заедница ќе успее ако ги има истите алатки како останатите. Каква е првичната реакција од локалната и регионалната сцена по објавата на Agenta 2.0?

Лансиравме на 10 август, среде сезона кога луѓето се на одмор и сè уште не сите стигнале да погледнат. Свесно лансиравме прво во Македонија, иако компанијата е во Естонија и целиот OPS е таму, затоа што сакавме токму луѓето овде прв пат да добијат пристап. И покрај тоа што е рано, побарувачката е голема, веќе имаме 50 верифицирани корисници и над $50k процесиранo. Очекувам интересот да расте понатаму како што ја градиме довербата.

Што е следно за AgentaOS во наредните неколку месеци – кои функционалности или интеграции се први на roadmap-от?

Штотуку го лансиравме бесплатниот revenue & pricing model audit. На старапите во Македонија им понудиме и дедициран onboarding. Во иднина воведуваме и AI revenue insights, каде AI-то ќе предлага pricing модели врз основа на твоите податоци, плус нови документи и функционалности што ги градиме заедно со заедницата. 

Веќе градиме партнерства со неколку компании во Македонија, а следна дестинација е Србија, каде сме поканети на неколку настани. Природниот чекор после тоа е останатиот дел од Балканот, Албанија, Косово, БИХ, каде проблемот со кој почнав е идентичен.

Но интересот веќе оди и подалеку од регионот, добиваме доста барања од solo-entrepreneurs од Азија, Африка и многу други земји во развој, а сè повеќе и од Европа. Нашата цел е да им дадеме пристап до подобри payment алатки и да им помогнеме да го растат бизнисот.