Што е саботна симс средба?
Неделна статија замислена да ја информира The Sims заедницата преку детално разгледување експанзии и бројни додатоци за култната симулација. Преку критичка посвета на бројните новитетите поврзани со додатокот, ве известуваме за тоа што најдобро функционира во поглед на механиките и на какви сѐ работи би можеле да наидете за уредување на вашиот дом.Моментно, The Sims 4 има 16 главни експанзии, 12 game пакети, и 20 stuff пакети. Целта на оваа статија е заеднички да поминеме низ сите нив!
Каква игра е The Sims 4?
Како четврта клучна игра од овој серијал, The Sims 4 продолжува со надградување на урнекот кој беше воспоставен со претходните три игри. Вашата цел е да создавате и управувате со најразлични ликови (симсови), да градите и уредувате пространи домови и да симулирате комплексни секојдневни ситуации.
Излегувањето на играта во сега-далечната 2014 година ги импресионира фановите со минималистичкиот дизајн и значително подобрена графика. На времето, ново-создадениот енџин беше фален за подлабоките можности за создавање ликови и користење бројни алатки, како и поверодостојна рекреација на емоции и длабок систем за искажување на индивидуални ставови.
Дали знаевте дека…
…The Sims 4 никако не беше планирана да биде игра за самостојно играње. Првично, Maxis работеше на онлајн мултиплеер игра, но откако видоа колку катастрофално лошо помина SimCity во 2013 година, развојното студио инстантно го промени правецот на развојот и целосно се посвети на правење духовен наследник на The Sims 3.Ова се покажа како паметна одлука бидејќи The Sims 4 стана абсолутен комерцијален успех и добитна формула која привлече над 70 милиони играчи, со што ја искачи четворката на врвот на серијалот.
Под лупа: The Sims™ 4 Cats & Dogs
Нашата прва статија ја започнуваме со четвртата експанзија: The Sims™ 4 Cats & Dogs. Како што кажува самото име, фокусот на оваа експанзија е да ви дозволи да ја негувате вашата љубов кон домашните миленичиња, попрецизно кон темпераментни мачки и послушните кучиња.
Идеално милениче!
The Sims 4 се прослави со комплексната алатка за создавање ликови, а оваа експанзија ви дава уште една алатка на располагање, овојпат насочена кон животните. Преку Create a Pet алатката, можете да го создадете вашето идеално милениче. За создавање на вашето кутре или куче, односно маченце или мачка, имате на располагање арсенал од најразлични раси. На животното можете да му одредите најразлична својства кои ќе го дефинираат понатамошното однесување. За уште подлабоки детали, имате целосна контрола врз бројни аспекти на изгледот. Па така, можете не само да го дефинирате крзното со невообичаени шари, туку и да ги облечете животните во најразлична облека која ќе ги направи да се уште послатки (и соодветно да го претставуваат вашиот животен стил).
Во The Sims™ 4 Cats & Dogs, вашето милениче е многу повеќе од анимирана декорација. Како што напоменавме, миленичињата се водат од нивни внатрешни интереси и двигатели и на вас се остава што од тоа ќе решите да охрабрите и негувате, а што да пробате да потиснете и обесхрабрите. За да успеете во целта, ќе негувате длабоки односи со миленичињата, ќе се грижите за нив, ќе ги тренирате, или, пак, ќе играте најразлични игри.
За бројни незаборавни моменти, ќе можете да си ја направите вашата куќа во целосно нов свет. Експанзијата ви дозволува да уживате во бројни активности на крајбрежните брегови на Brindleton Bay. Уште во првите неколку минути, ќе забележите дека многу внимание се има посветено на осмислување на преубаво место полно со светла и позитивна енергија. Brindleton Bay се одликува со импозантни знаменитости како пристаниште, светилник, парк и бројни патеки и места за социјализација не само со другите симсовци, туку и со другите крзнени пријателчиња.
Во новиот свет ќе можете и вие да направите ветеринарна клиника и да се посветите на градење на ветеринарска кариера. За исполнување на оваа благородна цел, ќе можете да ангажирате дополнителен персонал, да ги организирате вашите секојдневни работни обврски, како и да одредувате колку ќе наплаќате за услугите. Кога болеста ќе чукне на врата, вашите миленичиња никако не се имуни и ќе биде потребно да вршите најразлични дијагнози и да ги лекувате со бројни лекови. Во одредени ситуации ќе бидете принудени и да извршувате најразлични операции.
Ветеринарните клиники функционираат на сличен начин како рестораните во Dine Out. но лекувањето знае да биде долг и сложен процес. Загрижените сопственици доаѓаат по вас и ви дозволуваат да ги направите соодветните проверки и дијагностицирања. Во зависност од комплексноста на болеста, може да биде потребно повеќе време и истражување. Паралелно со ова, миленичињата имаат скала со стрес и верувајте дека никако не би сакале да ја надминете. Доколку успешно го излечите миленичето, вашата клиника добива висока оценка од клиентите и, како директен резултат, ем вашата кариера напредува, ем вие се чувствувате прекрасно. :)
Интересни факти за The Sims™ 4 Cats & Dogs!
1. Иако насловот вели дека можете да создавате само мачки и кучиња, алатката ќе ви дозволи да направите и лисици и ракуни.2. Можеби сте чуле од некого дека можете да чувате и други, помали миленичиња како најразлични глодари. Иако ова е точно, тие не се воведени со оваа експанзија, туку со додатокот The Sims 4: My First Pet Stuff!
3. Иако ви кажавме дека не можете директно да ги контролирате животните, има еден мод кој ви дозволува да го направите токму тоа. Подетално ќе го разгледаме во друга прилика.
4. Миленичињата, особено мачките и кучињата значително допринесуваат до намалување стрес, анксиозност и депресија. Ова е одлична прилика озбилно да размислите за втомување едно крзнено пријателче.
Каква облека ќе најдете во The Sims™ 4 Cats & Dogs?
Со оглед на тоа дека фокусот на оваа експанзија е на миленичињата, The Sims™ 4 Cats & Dogs нуди огромен арсенал од облека со која ќе можете да го истакнете нивниот темперамент. Но, покрај облека за нив, ќе најдете интересна облека и впечатливи фризури и за вашите симсовци!
Какви предмети ќе најдете во The Sims™ 4 Cats & Dogs?
Режимот за градење во The Sims 4 се проширува со импресивни 332 предмети. Развојното студио Maxis има покажано љубов за сите соби во вашиот дом, неисклучувајќи ниедна од нив. Во поглед на миленичиња, ќе наидете на бројни куќички, чинии за храна, места за измет, кутии со играчки, и места за играње. Доколку решите да градите кариера како ветеринар, ќе можете да поставите во вашата клиника бројни маси за истражување и критични операции, како и места за создавање и давање лекови.
Дружба без граници
Тоа беше нашата прва статија. Се надеваме дека дел од работите што ги прочитавте ви беа интересни и дека ќе не пречекате и наредната недела каде под лупа ќе ставиме уште едно DLC создадено за моментните летни горештини! Во меѓувреме, дали знаевте дека полека се поплочува патот за излегување на уште една експанзија? Целосно фокусирајќе се на љубовта, експанзијата Lovestruck ќе излезе на 25 јуни и, покрај нови романтични механики, симс ликовите ги можат да се подноват и со нова облека и со нови предмети за нивниот дом.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
