Steam Next Fest е краткотраен настан кој се одржува во чест на игрите кои допрва треба да излезат. Од 9 до 16 октомври, гејмерите ќе можат да преземат и одиграат бројни демо верзии на идни игри, како и да гледаат различни стримови одгранизирани од самите девелопери. Решивме да прошетаме низ фестивалот и да истакнеме три игри кои набргу ќе излезат.
Elaria: The Corrupted Throne e скромна, но амбициозна RPG игра
Elaria: The Corrupted Throne е интересна RPG игра во отворен свет која треба да излезе во моментот кога ќе заврши фестивалот, односно на 16 октомври. Во стилот на карактеристична loot-фокусирана игра, девелоперите Bluesuit се имаат погрижено да ви дозволат да истражувате бројни зандани, да се наградувате и да експериментирате со најразлични бонуси кои произлегуваат од носење различни оклопи, односно користење уникатни оружја.
Иако е игра за само еден играч, демото за Elaria: The Corrupted Throne крие забавни механики кои се засноваат и на играње Adoh. Оваа е мини игра каде предизвикувате други NPC ликови и ги тестирате вашите способности за стратешко размислување преку комплексна игра со карти. За потребите на Adoh, девелоперите имаат осмислено 100 карти. Во моментот кога ќе излезе целосната верзија, Elaria: The Corrupted Throne ќе се одликува со главна кампања, бројни споредни мисии, стотици оружја и оклопи и над 90 уникатни способности кои се замислени да го направат секое навлегување во занданите како свежо и забавно искуство. За додатен предизвик, во играта ќе најдете и бројни босови, како и можност за New Game Plus.
Повеќе детали за играта
- Произведува: Bluesuit
- Издава: Bluesuit
- Жанр: RPG
- Платформа: Microsoft Windows
- Ќе излезена на: 16 октомври 2023
Conquistadorio е класична авантура со предизвикувачки загатки
Conquistadorio се чини како класична point and click авантура која под хаубата крие впечатливи цртежи и ветување за интригантна приказна исполнета со бројни предизвици. Чедото на Morion Studio излегува на 20 октомври, но од она што го видовме преку демото, се работи за шарматно изработена игра каде играте со конквистадор кој решил да се повлече од општеството и да си живее изолиран живот, далеку од сите главоболки. Арно ама, ако Мухамет не сака да отиде кај планините, планините ќе дојдат кај него. Таква е и ситуацијата со главниот лик кој ќе си го изгуби ковчегот во кој сака да спие и, немајќи друг избор, започнува френетична потрага по него.
Доколку наоѓате задоволство во решавање предизвикувачки загатки кои се имплементирани во уникатен уметнички стил каде бројните околини се рачно нацртани – тогаш Conquistadorio е игра, или, барем, демо, само за вас! Иако загатките имаат логична основа, сепак бараат време за размислување и спремност за експериментирање. Добрата работа е тоа што во борбата за сочувување на нервите ќе ви помогнат пријатните амбиентални звуци и релаксирачката музичка подлога.
Повеќе детали за играта
- Произведува: Morion Studio
- Издава: AD Gaming
- Жанр: класична авантура
- Платформа: Microsoft Windows
- Ќе излезе на: 20 октомври 2023
Enshrouded e акциона survival игра со градење и ко-оп
Како трета игра која едноставно моравме да ја провериме беше чедото на Keen Games GmbH. Иако сеуште не се знае кога ќе излезе во раниот пристап на Steam, Enshrouded e една од поочекувани акциони RPG игри кои имплементираат елементи на survival и градење бази, како и, подразбирливо, крафтање бројни предмети, ресурси, оружје и опрема за подобро справување и предизвиците во огромниот, отворен свет.
Како што е својствено за игри од овој калибар, започнувате од нула и полека, но сигурно се издигнувате така што истражувате шуми, пештери и зандани и барате бројни богатства и ресурси. Во оваа игра, фокусот е на водење брзи и динамични битки каде безмислосно напаѓате со бројни оружја и магии, избегнувате напади и се позиционирате за да можете да ги откриете и експлоатирате слабостите на непријателите и босовите. За поголема ефикасност, имате на располагање дрво со вештини, а секое оружје отвора можности за имплементирање различни стратегии.
Во Enshrouded, битките се само дел од забавата и имате на располагање и комплексни можности за voxel-засновано градење предмети, преку куќи, па и запрепастувачко-огромни архитектонски oстварувања во кои ќе се вдомат разноликите NPC ликови. Во безбедноста на вашиот дом, можете да работите на создавање легендарни оклопи и оружја, а потоа да ги здружите силите со уште 15 ваши пријатели и да започнете рејдови и справување со орди од непријатели.
Повеќе детали за играта
- Произведува: Keen Games GmbH
- Издава: Keen Games GmbH
- Жанр: RPG, survival
- Платформа: Microsoft Windows
Wéko The Mask Gatherer
A, како дополнително почесно споменување би упатиле кон играта на SIRO GAMES Sarl – Wéko The Mask Gatherer! Се работи за невобичаена акциона авантура со RPG елементи која некако не потсетува на Kena: Bridge Of Spirits, што во графиката, што со симпатичните сопатници, а што поради бројните маски кои ги собирате и начинот на кој се водат битките. Имено, бројните маски кои ги откривате ви даваат уникатни мистични моќи кои значително можат да ви помогнат во оние ситуации каде ќе потфрли директниот напад, одбраната или тркалањето. Не сме сигурни кога би можела играта да излезе, но демото е веќе достапно преку Steam!
Повеќе детали за играта
- Произведува: SIRO GAMES Sarl
- Издава: SIRO GAMES Sarl
- Жанр: Action RPG
- Платформа: Microsoft Windows
Тоа беа нашите три четири демо верзии кои решивме да ги провериме на Steam Next Fest. Што проверивте вие? Кажете ни во коментарите!
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
