Напредокот на вештачката интелигенција и роботите забрзано ја менуваат иднината на некои работни позиции. Некои експерти дури проценуваат дека до 2035 година автоматизацијата ќе замени 40% од работниците. Најзагрозени се професиите со едноставни задачи кои се повторуваат, на пример возачите или грижата за корисници.
Вообичаено недостатокот на работници не е клучен за автоматизирањето на индустријата. Така професии за кои постои интерес од луѓе работници често се на листите професии кои се во опасност. Сепак некои индустрии имаат вистински проблем со недостатокот на интерес од работниците. Една од овие индустрии на кои автоматизацијата ќе им реши многу проблеми е агроиндустријата.
Автономни трактори, прскалки, роботи кои ги собираат плодовите значително ќе ја намалат потребата на луѓе во индустријата. Во моментов главно поле на интерес се роботите кои помагаат при собирањето на плодови, но во развој се и автоматизирани решенија за сеидба, заштита на растенијата, следење на состојбата и анализа на почвата. Голем дел од овие решенија се роботи кои се движат по земја, но за некои задачи автономните дронови се посоодветно решение.
Роботи кои се користат во земјоделството
Автоматизација во земјоделството во некаква форма се користи уште од 1920 година, а трактори без човек оператор се креирани од 1950 година. Како систем за наведување на патеката на возење се користеле кабли. Сепак нешто што би можело да се смета како современ автоматизиран систем започнува со развој во 1980-те години со развојот на компјутерите и воведувањето на машински вид како можност за наведување на роботот.
Потребата за развој на автономните системи за користење во земјоделството доаѓа од потребите на самиот сектор. Стареењето на популацијата и бројот на потребни работници придонесуваат најголем дел од државите да не можат да ги задоволат потребите на индустријата. Како последица од недостатокот на работници дел од посевите на крај остануваат несобрани и скапуваат.
Развојот на електричните автономни возила дополнително го забрзува и развојот на машинерија која се користи за обработка на земјата. Веќе постојат електрични трактори кои се користат за обработка на земјата, за прскање, и кога е потребно и за жнеење. Компании како Jhon Deere имаат и софтвер кој овозможува едноставно управување на возилата на далечина, кој овозможува управување на цели флоти истовремено.
Покрај автономните трактори кои се во развој, куп други роботи се развиваат да помагаат во бербата. Клучно во развојот на новите роботи е напредокот на машинскиот вид и вештачката интелигенција која помага при „пронаоѓањето“ на здрави и зрели плодови. Во овој дел има уште работа. Најголема причина за недоволниот развој е што за различни плодови се потребни различни додатоци за собирање и различна изведба на роботот, па она што функционира за собирање јаболка, можеби може да се искористи и за портокали, но не и за јагоди или капини. Оваа специфичност прави роботите да се користат дел од годината, и потоа надвор од сезоната за берба да седат неупотребени.
Елементите на овие роботи може да се поделат во три дела: крајни ефектори, механичка рака и манипулатор. Крајни ефектори се различни крајни елементи кои се додаваат на роботските раце. Може да се користат за прскање, сечење, прифаќање/собирање и слично. Механичката рака се користи за собирање и држење на плодовите. Може да биде составена од 2 прсти и има единствена намена да ги собира плодовите. Последниот дел, манипулаторот всушност е механички склоп кој овозможува крајните ефектори и „рацете“ да дојдат на потребната положба.
Дел од предизвиците со кои се соочуваат развивачите на овие роботи доаѓаат од проблемите при собирање на помеки плодови. Сепак развивачите успеваат да најдат решение за проблемите. Машината на Harvest Croo Robotics овозможува берба на поле со јагоди на 100000m2 за само 3 дена. Роботот може да замени 30 луѓе.
Дронови во земјоделството
Интересна можност за земјоделието е и употребата на дронови за следење и оптимизација на земјоделските култури. Дроновите се опремени со различни сензори и камери и постојано прибираат податоци за временските услови, за условите на почвата, и за здравјето и стадиумот на раст на плодовите.
Една од пречките за поголема примена на дроновите во земјоделието е потребата од посебни дозволи за автономно летање. Постојаниот развој на технологијата која овозможува автономија, но и на сензорите и вештачката интелигенција имаат огромен потенцијал. Во иднина роеви дронови ќе можат да надлетуваат над нивите, да ги прегледуваат културите, па дури и да даваат предлози за подобрување.
Неколку различни модели на агро-роботи
Harvest Automation HV-100
Harvest Automation HV-100 е робот кој е поддршка на луѓето. Може да префрла различни потешки растенија во саксии од едно на друго место. Роботот се користи заедно со луѓе, но доаѓа со софтвер за мапирање на околината што му овозможува да работи и автономно.
Agrobot E-Series
Agrobot E-Series е цела постројка која овозможува автоматизирање на производство на јагоди. Роботот доаѓа со четири раце кои ги собираат јагодите, а благодарение на технологијата може да процени и колку се зрели јагодите и да одлучи дали треба да ги собере или не.
Harvey – Capsicum Harvester
Harvey е производ на Технолошкиот универзитет на Квинсленд. Прототипот на роботот се користи за собирање на пиперки, но тимот се обидува да го прилагоди за повеќе различни плодови. Роботот сам може да го процени квалитетот на плодот и благодарение на технологијата може да го собере плодот во оптимален период.
Green Robot Machinery
Собирањето на памук од нивите е мачен и бавен процес, па секое автоматизирање е добредојдено. Роботот е поставен на своевидна рамка која поминува над растенијата и го собира памукот. Со оглед на изгледот на растението, за собирање на целиот памук се потребни шест степени на слобода кои ги обезбедува манипулаторот.
FFRobotics
Роботот кој е креација на FFRobotics е доволно брз што може да собира 10 000 јаболка за еден час. Може да се користи и за круши, сливи, цитрони, лимони и слично. Ова треба да овозможи машината да може да се користи во текот на цела година. Препознавањето на плодовите се прави со машинска интелигенција, алгоритамот помага роботот да препознава ако некои плодови се оштетени или не се доволно зрели.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
