Stick it to the Stickman e нов, но освежувачки наслов кој успешно комбинира повеќе жанрови, вметнувајќи рог-лајт тепачка со напредна физика во свет полн со остра корпоративна сатира. Чедото на Free Lives и Devolver Digital ве фрла во безмилосниот свет на бизнисот, каде што единствениот начин да напредувате на корпоративната скала е да се пробиете преку користење тупаници, клоци и широк арсенал на канцелариски и индустриски алатки. Немате избор доколку сакате да станете нов шеф и да уживате на врво со сите противници кои ја делат истата амбиција.
Организиран хаос со длабока стратегија
Stick it to the Stickman се одликува со динамичен и непредвидлив борбен систем, кој е целосно базиран на физика. Секој удар, експлозија или фрлање низ прозорец има реална тежина и последици, што создава комични, но и брутални сцени на уништување. Она што ја издигнува играта над обична тепачка е неверојатната длабочина во персонализацијата на вашиот борец. Со стотици уникатни потези и способности кои можете да ги отклучите и комбинирате, секој обид за освојување на компанијата е различен.
На располагање имате ликови кои специјализираат за борба одблиску со смртоносни техники или пак да се фокусирате на борба од далечина користејќи сè, од хефталки до фрлачи на огнени топки. Слободава ви овозможува да изградите совршена борбена машина приспособена на вашиот стил на игра. Мисиите, пак, се сатиричен коментар на модерната работна култура – ќе извршувате задачи како доставување пакети, киднапирање градежни инспектори и задушување протести, сето тоа во име на профитот. Играта може да се игра самостојно, но хаосот достигнува ново ниво кога ќе вклучите пријател во локален co-op или преку Steam Remote Play.
Минимализам во служба на акцијата
Визуелно, играта користи минималистички стил со стикмен фигури, што е паметен избор на дизајнерите. Оваа едноставност овозможува графиката да остане чиста и прегледна дури и кога екранот е преполн со десетици противници, експлозии и најразлични ефекти. Наместо да се фокусира на фотореализам, уметничкиот правец ја нагласува флуидноста на движењата и комичната бруталност на физички-базираната борба.
Звучниот дизајн совршено го надополнува визуелниот хаос. Секој удар има задоволувачки и пренагласен звучен ефект, додека динамичната музичка подлога го одржува адреналинот и ве турка напред низ бескрајните катови на корпоративната зграда. Звуците на кршење стакло, експлозии и оружја создаваат симфонија на уништување која е централен дел од искуството.
Ветувачки почеток со амбициозни планови
Моментално, Stick it to the Stickman е во Early Access фаза, но веќе нуди импресивна количина на содржина. Доколку веднаш ѝ пружите шанса на играта, можете да очекувате десетици часови кампања, со огромна вредност за преигрување која произлегува благодарение на рог-лајт елементите. За таа цел, достапни се 20 различни класи и четири режими на игра.
Програмерите планираат финалната верзија да вклучува нови корпоративни оддели како производство, маркетинг, научен центар, па дури и бункер за судниот ден. Секој нов оддел ќе воведе уникатни механики на игра и ќе ве води чекор поблиску до финалното поглавје од приказната. Доволното време ќе покаже дека Stick it to the Stickman не е само забавна тепачка, туку и комплетно и сатирично искуство со уникатна и квалитетно реализирана идеја.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
