Стартува аукцијата за вистински пари на Diablo 3

Новата закрпа на Diablo 3 им овозможи на играчите да купуваат и продаваат опрема за вистински пари. Засега закрпата е достапна единствено на играчите на американските сервери иако нема IP ограничување од каде им пристапувате на серверите. Аукциите моментално се единствено за оружје и оклопи, а во иднина се очекува сите предмети од играта да можете да ги продадете за пари. Дел од парите од продажбата, 15 проценти одат за Blizzard, но само ако се решите да ги префрлите на сметка. Ако парите ги оставите на вашиот Blizzard профил тогаш целата сума останува ваша, но можете да ја користите единствено за нивните производи.

Покрај ограничувањата со дополнителна верификација на профилите, пристапот на аукциите за пари е ограничен на серверот на кој „природно“ му припаѓатe. За македонските играчи тоа се европските сервери, што значи дека ако имате карактери на американските или азиските сервери со нив нема да можете да пристапите до аукциите за пари.

Пред ова Blizzard излегоа со соопштение во кое им се заканија со исклучување на профилите на сите кои играат со „изменета“ игра. Ова главно се однесува на користење на скрипти кој го автоматизираат играњето. Ова е првпат Blizzard да излезат со предупредување пред да почнат со казните. Пред се поради тоа што скриптираните ботови можат да соберат предмети кој се продаваат за 1000$ за неколку часа но и „програми“ кои можат да ја генерираат било каја опрема која се наоѓа во играта.

Купувањето на опрема за вистински пари не е револуцинерна иновација и веќе сме ја виделе кај повеќе „бесплатни“ игри. Сепак размени помеѓу играчите на виртуелни добра (оружја, оклопи, пари од играта) за вистински пари до сега не сме виделе, барем не легално.