Фриленсерството во ИТ индустријата денес нуди бесконечни можности, но и бројни предизвици. Јован Поп-Петров, успешен веб-дизајнер и фронт-енд девелопер, веќе со години го кали фриленсерскиот занает. Како што вели, искуството е секогаш предност, но за да се стигне до негo потребна е огромна трпеливоста и желба за учење.
Иако да се биде фриленсер навидум звучи едноставно, според Јован за ваквата цел секогаш постојат клучни стратегии и начини за тоа како фриленсерите можат да се издвојат на глобалниот пазар и да добијат големи клиенти.
Во ова интервју за ИТ.мк, Јован раскажува за предностите на фриленсерството, успесите но и грешките од кои може да се научи, како и неговиот потфат наречен UpworkBoost, преку кој го споделува искуството од ваквата работа со надежните, но и веќе етаблираните и успешни фриленсери кои сакаат да го подобрат своето портфолио.
ИТ.мк: Кажи ни повеќе за твојата фриленсерска кариера и зошто го започна UpworkBoost?
Јован Поп-Петров: Јас сум Јован и веќе 16+ години работам како фриленсер. Моето патување започна уште пред фриленс платформите да станат популарни, а со текот на годините стекнав искуство со Upwork и други платформи.
Видов дека многу талентирани луѓе од Македонија и регионот не можат да најдат работа, иако имаат завршени академии, факултети и курсеви. Најголемиот проблем беше тоа што не знаеја како правилно да се претстават и да добијат клиенти.
Токму затоа го основав UpworkBoost – со цел да им помогнам на новите фриленсери да ги избегнат грешките што јас и многу други ги направивме на почетокот, и побрзо да изградат успешна кариера.
Кои се најголемите предности и предизвици на фриленсерството во ИТ индустријата?
Од предностите можеме да издвоиме:
Глобален пазар – Фриленсерите имаат можност да работат со клиенти од целиот свет, наместо да бидат ограничени само на локалниот пазар.
Флексибилност – Можете да изберете со кого ќе работите, на кои проекти и кога ќе работите.
Потенцијал за високи приходи – ИТ фриленсерите, особено програмерите и дизајнерите, можат да заработуваат значително повеќе од просечните локални плати.
Од предизвици, тука се:
Голема конкуренција – На платформи како UpWork, конкуренцијата е огромна, па мора да имате квалитетен профил и стратегии за издвојување.
Нестабилност – Постојат периоди со многу работа, но и периоди кога е тешко да се најдат нови клиенти.
Самодисциплина – Без менаџер или фиксно работно време, фриленсерите сами мора да организираат и водат проекти.
Нашето решение служи за да им помогне на фриленсерите да изградат моќен профил кој привлекува клиенти и им овозможува полесно да добиваат проекти.
Дали фриленсерството во ИТ е одржлива долгорочна кариера или повеќе служи како привремен ангажман?
Тоа зависи од пристапот на самиот фриленсер. Доколку имате квалитетен профил, добра репутација и градите стабилни односи со клиенти, фриленсерството може да биде долгорочна и одржлива кариера.
Многу успешни фриленсери со тек на време формираат свои агенции на UpWork, вработуваат други фриленсери и го претвораат својот индивидуален ангажман во бизнис.
Совет: Инвестирајте во градење силен профил, добивање добри рецензии и проширување на клиентската база.
Колку е важно создавањето на личен бренд за успех како фриленсер?
Клучно! Фриленсерите кои имаат силен личен бренд значително полесно добиваат клиенти и повисоки проекти.
Добро структуриран профил – Клучни зборови, добро напишано „About me“ и детали за искуството.
Силно портфолио – Реални проекти, успешни студии на случај и препораки од клиенти.
Онлајн присуство – LinkedIn, Behance, Dribbble, Contra профили кои го покажуваат вашиот квалитет.
Континуирано учење – Следење на нови трендови во индустријата.
Кои се најважните фактори при градење успешен профил и кои вештини најмногу се бараат во моментов на UpWork?
Клучни фактори:
- Професионална слика и квалитетно „About me“
- Прецизно дефинирани услуги и експертиза
- Добро структурирано портфолио со реални примери
- Позитивни рецензии од клиенти
- Јасно формулирани понуди и добра комуникација со клиенти
Најбарани вештини во моментов:
- Програмери: Python, JavaScript, React, Node.js, AI & ML, Blockchain
- Дизајнери: UI/UX, Adobe XD, Figma, Motion Graphics
- Маркетинг: SEO, Content Writing, PPC, Email Marketing
- Data Science: Data Analysis, SQL, Power BI
Кој пристап треба да го имаат фриленсерите за да можат да се издвојат меѓу конкуренцијата на UpWork?
Најдобрата стратегија е:
Пишување персонализирани понуди (Cover Letters) наместо копирање на исти пораки, фокус на првите неколку проекти за да добиете 5-ѕвездени рецензии, работа на долг рок – клиенти повеќе сакаат долгорочни соработки, како и оптимизација на профилот со клучни зборови за подобра видливост.
Па така, преку пакетите нудиме креирање на успешни Cover Letters и стратегии за добивање клиенти.
Кои се најчестите грешки што ги прават фриленсерите на UpWork и како може да ги избегнат истите?
Грешки што ги прават новите фриленсери:
- Неквалитетен профил со недоволно информации.
- Испраќање на генерички апликации без персонализација.
- Недостаток на портфолио или примери од претходна работа.
- Премногу ниски или премногу високи цени без добра стратегија.
- Слаба комуникација и доцнење со рокови.
Дали работата на UpWork може да доведе до постојани ангажмани и долгорочни клиенти?
Апсолутно ДА! Многу компании и стартапи бараат долгорочни фриленсери за нивните тимови.
Како да добиете долгорочен клиент?
- Доставете високо-квалитетна работа и надминете ги очекувањата.
- Одржувајте добра комуникација со клиентите.
- Барајте долгорочни проекти и нудете им континуирана поддршка.
- Изградете одличен однос – еден среќен клиент носи повеќе нови клиенти!
Советот до сите што сакаат да станат успешни фриленсери?
Не се демотивирајте! Иако можеби сте завршиле факултет, курс или академија, иако компаниите не ви одговараат на вашите апликации за работа – не застанувајте тука!
Пробајте фриленс мрежи како Upwork, Fiverr, Toptal или некоја друга платформа. Можеби вашата иднина и вашите неостварени соништа ќе станат реалност токму преку Upwork!
Не мора да ги купувате моите пакети, но вложете го вашиот максимум!
Секој ден одвојте 8 часа за учење, оптимизација на профилот, истражување на проекти и праќање понуди.
Работете на себе, подобрувајте се и никогаш не се откажувајте. За 4-6 месеци ви гарантирам дека ќе видите резултати – а можеби и многу побрзо.
Понекогаш ви треба само една шанса, еден клиент, еден проект – и вашата кариера може целосно да се промени! Ако не пробате, никогаш нема да знаете!
Верувајте во себе, работете паметно и искористете ја шансата која ја нуди фриленс светот, а доколку ви треба помош, секогаш можете да го проверите UpworkBoost – но најважното е да почнете!
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
