Кинескиот производител на леталото Ehang 184, кое беше претставено во јануари на CES 2016, доби дозвола да го тестира возилото во Невада, САД. Засега не станува збор за тестови во населена област, туку во зона која е дозволена за тестирање на беспилотни летала. „Ова е историски договор кој ќе биде темел на идно партнерство во областите за тестирање на летови, тренинг и развој“, вели гувернерот на Невада.
Ehang 184 е електрично беспилотно летало кое може да пренесува еден патник за 23 минути лет, по што мора да се полни. Проблемите за ваков превоз се бројни: од строгата регулација, па сѐ до безбедноста на патниците. Тестовите ќе помогнат да се надминат дел од предизвиците, но за летала остануваат проблемите со законите. „Потегот ќе ги постави темелите за комерцијализација на 184 и ќе го означи почетокот на транспортот со беспилотни летала“, вели Хуанжи Ху, директорот на Ehang 184.
Леталото може да летала до 3,5 километри во висина, со брзина до 100 km/h. Сѐ што треба патникот да направи е да ја внесе дестинацијата, а понатаму леталото самостојно ќе го однесе, вели Guardian.
