Оваа недела Adobe претстави нова алатка базирана на вештачка интелигенција за Photoshop која во иднина значително ќе им ја олесни работата на дизајнерите, но и на сите оние кои го користат нивниот софтвер за креирање и обработка на слики. Новата алатка ќе биде интегриран дел во новата верзија на Photoshop, а начинот на кој работи е сличен на Dall-e или Midjourney. Користењето е едноставно и наликува на сите досегашни генератори на слика, дури може да кажеме и преедноставно… корисникот внесува текст, а вештачката интелигенција генерира слика или делови од слика согласно инструкциите.
Можност да ја тестира новата технологија на Adobe имаше македонскиот дизајнер Даниел Јанев коj резултатите ги сподели на своите LinkedIn и Twitter профили. За само неколку минути со помош на новата функционалност во целост ја промени сликата од црквата Свети Јован Канео и го претвори Охрид во скандинавско гратче.
Даниел можеби веќе ви е познат како креатор на Type of Skopje или на Dezen.mk. Тој работи како дизајнер повеќе од 10 години, а за искуството со новата функционалност на Photoshop и вештачката интелигенција му поставивме неколку прашања…
Како дизајнер, како гледаш на новата Фотошоп функционалност?
Со еден збор би било позитивно. Подолго би било дека е ова е само почеток, и некако логичен чекор после сите AI за дизајн, посебно после Adobe Firefly, да се инкорпорираат со добар UI во самиот Adobe систем. Сè почнува од Фотошоп како најпознат, ама мислам уште поинтересни функционалности тек ќе има во Илустратор, 3D и видео.
Интересно е што полека се менуваат навиките и flow-то на работа, ако сакаш да ставиш пример облаци на небо, нема повеќе да бараш фотографии онлајн, па сечење, па монтирање, сега веќе ќе биде побитно да знаеш да напишеш добри промптови и насоки. Во секој случај ја подобрува креативноста со тоа што на дизајнерите (а во брза иднина и на сите) отвара нови начини на размислувања, и лесно и брзо да ги реализираат своите идеи.
Како си задоволен од квалитетот на испродуцираните АИ промени?
Oбично од сè што е бета не сме целосно задоволни, и нормално e да има багови. Добрата работа е што како што ние повеќе учиме како до подобри резултати, така и Adobe учи од нас. Mоже само да биде подобро, не и полошо. Очекувам во новите верзии 2024 на сите Adobe програми (секогаш крај на година околу декември) квалитетот на AI да биде на многу повисоко ниво.
Што според тебе е негативната страна на АИ-то во дизајн?
Oва е дефинитивно широка тема. Искрено немам некој цврст став, од она што читам секојдневно и едните и другите имаат добри аргументи за и против, на почеток сме и веројатно треба време работите да станат појасни. Ако морам да одвојам неколку би биле копирајт и авторски права, неконзистентност на резултатите, чести грешки и повторувања, немање контрола на резултатите, нарушување на пазарот… но сè уште дефинитивно позитивните страни се далеку повеќе. Мој совет за крај би бил, сите нови, па и постари дизајнери да пробуваат AI техники и алатки во работата и сами да си извлекуваат заклучоци.
Новата алатка на Photoshop е дел од Firefly-базираните функционалности и засега е достапна единствено во бета верзијата на Photoshop и за дел од Firefly бета корисниците на веб.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
