Веројатно не е изненадување дека Појасот Газа е едно од наjследените места во светот. Целиот безбедносен систем на Израел зависи од спречување на нападите и опасностите. За жал на 7 октомври покрај целиот апарат за следење и претресување, милитантите на Хамас го извршија најголемиот напад во својата историја. Она што е веројатно најчудно е дека и покрај тоа што нападот беше од копно, од воздух и од вода Израел немаше никакви информации за нападот.
Милитантите на Хамас во овие напади користеа навидум сѐ што им беше на располагање; автомобили, мотори и камионети, бродови за напад од Медитеранот, па дури и параглајдери за напад од воздух. Нема сомневање дека станува збор за координиран и напад кој е подготвуван подолг период. Нападот беше изненадување и војската остана неподготвена, па илјадници жители на југот на Израел беа оставени на немилост на терористите.
Како последица на нападите и одговорот на Израел има илјадници загинати и повредени. Нападите продолжуваат и барем засега не изгледа дека ќе има примирје. Хамас тврди дека има над 100 израелски заложници.
Целосно потфрлање и потценување на Хамас
Со оглед на тоа колку податоци израелските разузнавачки служби собираат за Хамас, изгледа неверојатно како не успеале да дознаат за нападот. Сепак, количеството на податоци кои Израел ги собира за Хамас, за организирањето и активностите, можеби имале улога во неоткривањето на нападот, пренесе Wired.
„Нема сомнеж дека големината и опсегот на нападот на Хамас укажуваат на колосален неуспех во разузнавањето од страна на IDF [Israel Defense Forces] и во Шин Бет, (внатрешната безбедносна агенција). Тие имаат голема техничка способност и потврдени одлични човечки капацитети“, вели Рафаел Маркус, експерт за регионот.
Во нападите се искористени 2200 Qassam ракети тврдат израелските претставници (Бројките од Хамас се значително поголеми и тие тврдат над 5000). Овие ракети ги произведува Хамас. Тие успеале да прошверцуваат доволно материјали и да состават над 2000 ракети, без да бидат забележани. Една од причините за ова е што воено, Хамас никогаш не бил гледан како опасност. Најголем дел од одбраната на Израел е „завртен“ кон Север и потенцијален напад на Хезболах. Сепак со целото дигитално следење, сѐ уште е изненадување како Израел беше неподготвен за нападите.
Во минатото бетонскиот ѕид, одбранбениот ракетен штит „Iron Dome“ и разузнавањето беа доволни за одбрана. На 7 октомври за прв пат во поновата историја, Израел беше изненаден, најголем дел од одбраната која ги чуваше безбедни 20 години беше пробиена.
Појасот Газа се следи со куп технологија и софтвер
Со години израелски компании креираат шпионски и малициозен софтвер за следење. Западниот Брег и Појасот Газа се набљудуваат со секоја иновативна технологија, од земја и од воздух. Сите кои се осомничени како дел или потенцијално поврзани со Хамас се дел од специјални мерки од дигитална шпионажа до сателитски надзор и технологија за препознавање на ликови. Сепак, во овој напад Хамас успеа да пронајде начин (или разузнавачките агенции имаат слепа точка) за скришум да ги организира нападите.
Појасот Газа од септември 2021 година е заобиколен со ѕид долг 60 километри. Покрај бодликавата жица, во близина на израелските населби има 7-метарски ѕид со сензори и митралези управувани од далечина. На ѕидот има поставен радар, камери, подземни и надземни сензори и куп различни инструменти за надзор. Над главите на жителите и посетителите на Газа летаат дронови.
„Палестинците се жртви на повеќеслојно следење. Различни технологии се употребуваат против Палестинците: дронови; софтвер за следење за кој веќе е откриено дека се инсталира во електронски уреди пред влегувањето во Појасот Газа; CCTV камери се поставени на влезот во Газа; и постои континуирано онлајн следење на луѓето во окупираните територии.“, вели Мона Штаја од Тахир институтот за блискоисточна политика.
Засега нема официјален извештај за тоа како нападот не е забележан, но има неколку веројатни теории. Дел од експертите веруваат дека до службите за разузнавање доаѓаат толку многу податоци, што прави да биде потешко да се открие кои од опасностите се вистински. Поранешниот заменик советник за национална безбедност на Израел Чак Фрелич, вели дека постоеле податоци, но не биле разбрани во целост. Иако веќе половина година имало индикации дека Хамас се подготвува за поголем конфликт, знаците не биле коректно протолкувани.
Еден дел од експертите се подготвени да ги обвинат разузнавачките служби дека потфрлиле. Сепак, тоа не е единствено објаснување. Дел од Палестинците се следени речиси целиот свој живот, и тоа во секој аспект од животот. Луѓето во таква положба се прилагодуваат. Не разговараат јавно за некои теми, ги одбегнуваат на телефон, не објавуваат содржина на друштвените мрежи ако некои фрази или зборови може да се протолкуваат како опасност. Потоа, овие навики се пренесуваат насекаде, па и кај регрутите на Хамас.
И Хамас има свои сајбер експерти…
Иако капацитетите и можностите на Израел се далеку над оние на Хамас, ниту милитантите не се без сајбер армија. Напаѓачите во нападите користеле обични дронови опремени со бомби за да ги уништат митралеските гнезда кои се управуваат од далечина, и за напад врз израелските тенкови.
Во минатото групата успеала од различни Facebook-страници да инсталира апликации за крадење податоци на телефоните на израелските војници. Постојат и лажни апликации за лични контакти кои всушност се шпионски софтвер.
Дополнително, дел од експертите со кои контактирал Wired сметаат дека групата веројатно има поддршка од Иран. Официјално потврда за поддршката нема, но дел од претставниците на Иран ги пофалија и им честитаа за нападите. Високи претставници на Иран минатиот месец се сретнале со претставници на Хамас, јави Politico.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
Тоа е; за жал, светот оди во самоуништување. Степенот на развојот на технологијата и хуманиот однос и соживот не одат паралелно.