Швајцарската софтверска компанија Netcetera, која има канцеларии и во Скопје, најави дека во 2016-та година ќе инвестира по 180.000 евра во пет стартапи од регионот. Планот е инвестициите да продолжат и во следните години.
„Гледаме многу потенцијал во пазарот, подготвени сме да инвестираме и да го прошириме нашиот опсег. Веќе добро го познаваме регионот затоа што тука сме инвестирале и во минатото. Доказ за тоа е нашата важна локација во Македонија со 130 вработени. Цврсто веруваме дека талентот во регионот е исклучителен и сакаме да поддржиме перспективни стартап компании“, вели Андреј В’чковски, директор на Netcetera.
Koмпанијата ќе соработува со инвеститорот Дарко Бутина кој ќе ги прегледува стартапите што ќе аплицираат. Планот е да се инвестираат „smart money”, односно стартапите освен пари ќе добијат и менторство и совети за претприемништво. Netcetera сака да инвестира во ИТ стартапи кои работат на финансиски технологии, поврзано здравство, транспортни технологии, дигитално претприемаштво, како и софтвер за медиуми и забава. Покрај Македонија, Хрватска, Србија и Словенија, компанијата ќе разгледува и стартап компании во земјите каде има канцеларии, поточно во Швајцарија, Германија, Австрија и Обединетите арапски емирати.
За да аплицирате за инвестицијата, треба да испратите детали за вашиот стартапи и бизнис модел до Netcetera, заедно со статистика и други факти што ја објаснуваат.
