Неделна доза Елон #1

во Веб, Свет

Го купува Twitter, па не го купува Twitter; Tesla ќе отпушти 10% од вработените, не, Tesla ќе вработи нови вработени; Или работете 40 часа неделно од канцеларија или одете си од Tesla и не работете на друго место…. ова се само дел работите кои во последните десетина дена ги слушнавме од или за Елон Маск. Со оглед на популарноста на претприемачот не е изненадување што Маск цела недела е во фокус на медиумите.

(Се надеваме дека нема да има потреба од „Неделна доза Елон“ да стане редовна рубрика на IT.mk, но за секој случај ќе го насловиме овој текст со #1)

Купувањето на Twitter  можеби сепак нема да се случи

Уште од самиот почеток дел од критичарите на Елон Маск се сомневаа дека нема да го купи Twitter и дека потегот е некој вид манипулација или ПР момент. Дури и кога беа поднесени документи сомнежите продолжија. Оваа недела дел од финансиските експерти можат да ја искористат приликата да ни кажат „Ви рековме!“. Основачот на Tesla се закани дека ќе се повлече од купувањето на Twitter.

Причината поради која се премислува е недостатокот на одговори за бројот на лажни профили на платформата. Маск тврди дека не добива одоговор на барањето за потврда на бројот на лажни профили и ботови на микроблогот, според него бројот е значително поголем од 5% кои Twitter ги споделува во документите кои му ги доставиле и бара увид да може сам да провери.

Сепак покрај „паузирањето“ на аквизицијата на Twitter, јавно (засега) останува доследен дека ќе ја купи платформата. Како и кога ќе се случи ова ќе мора да почекаме и да видиме.

Анализата на вредноста на акциите на Twitter на берзата ја покажува и скептичноста на берзата. Очекувањето е дека доколку акционерите веруваат дека Маск ќе го купи Twitter вредноста на акциите да биде блиска до цената на договорот (54,20 US долари). Наместо ова, акциите се паднати на околу 40 долари, пренесе CNBC.

Цената која Илон Маск ја понуди за Twitter е 44 милијарди долари. Во договорот постои клаузула за раскинување и во овој случај ќе треба да плати 1 милијарда долари, но ситуацијата е покомплицирана и не гарантира дека Маск може да плати само 1 милијарда долари и да се повлече. Тој ќе може да се повлече од договореното ако успее да докаже дека Twitter го измамил и споделил погрешни бројки – што некако очигледно и се обидува да го направи тоа. Во било кој друг случај микро-блогот би можел да го тужи за нанесена штета. Можно сценарио е и дека двете страни ќе се „најдат“ негде на средина, па Маск ќе успее да го купи Twitter за помалку од 44 милијарди долари.

Минимум 40 часа од канцеларија или…

На 1-ви јуни Electrek сподели неколку електронски пораки кои сопственикот на Tesla ги испратил до своите вработени. Фокус на пораките е крај на работа од дома и барање вработените да се вратат на своите работни места.

„Секој кој сака да работи од дома мора да биде во канцеларија најмалку (да мислам најмалку) 40 часа неделно или да замине од Tesla. Ова е помалку отколку што бараме од работниците во погон“.

Маск додаде дека секако може да има некои исклучоци, но тие ќе бидат посебно разгледувани, и тоа лично од него. Тој не заборави да додаде дека и самиот преспива во канцелариите на компанијата и побара од останатите да го следат неговиот пример, додавајќи дека колку е повисока позицијата, толку треба да биде и повидливо присуството.

На почетокот на мај во интервју за Financial Times, сопственикот на Tesla ги пофали работните навики на кинеските работници кои останувале во фабриките до 3 часот изутрина, додавајќи дека Американците бараат начин да не работат.

Дел од компаниите конкуренти на Tesla се чини едвај го дочекаа барањето на Маск. Тиана Ватс-Портер која работи како регрутер за Microsoft објави пост посветен токму на пораката на Маск.

„Тука во Microsoft, LinkedIn и GitHub ги нудиме СИТЕ МОЖНОСТИ. Можете да работите на ваш начин и да бидете свои, овде, во Microsoft“.

Ќе го намали бројот на вработени за 10%

На крајот на минатата недела Маск, повторно во електронска пошта до сите вработени објави дека ќе го намали бројот на редовно вработените за 10 проценти, и наместо тоа ќе го зголеми бројот на работниците кои работат на час. Во пораката го сподели и своето „супер лошо чувство“ за економијата. Предвидувањето на Маск речиси веднаш се почувствува на акциите на компанијата. По објавувањето на содржината на комуникацијата акциите на Tesla паднаа 9%.

Малку подоцна прати дополнителна порака за тоа дека иако компанијата има превработеност во некој сектори, во други има недостаток. Tesla нема да отпушта вработени кои работат на изработка на автомобили и батерии, по што акциите рипнаа 3%.

Добивај известувања
Извести ме за
guest
0 Коментари
Inline Feedbacks
View all comments