Одлични вести за корисниците кои секојдневно го користат Microsoft Copilot. Компанијата на својот блог најави нови функционалности за Copilot и нова помоќна Copilot Pro верзија. Заедно со оваа најава Microsoft сподели податок дека досега имаат над 5 милијарди генерирани чет разговори и 5 милијарди генерирани слики.
Што е Microsoft Copilot
Copilot од Microsoft е дигитален асистент со вештачка интелигенција кој е дизајниран за поголема продуктивност и ефикасност. Во основа е верзија на ChatGPT од OpenAI, но на GPT-4 моделот. Алатката може да се користи за решавање на комплексни задачи, генерирање на креативни содржини, или генерирање на слики. Copilot е интегриран со голем дел од софтверот на Microsoft, вклучувајќи го и Excel. Асистентот може бесплатно да се користи со Microsoft корисничка сметка.
Copilot Pro
За оние корисници кои имаат потреба од понапредни функционалности Microsoft го најави Copilot Pro. Моделот нуди понапредни функционалности и можности. Ова е премиум верзија на Copilot и претплатата чини 20 американски долари. Copilot Pro овозможува исто искуство на вештачката интелигенција на сите уреди на корисникот. Доаѓа со пристап за Copilot во Microsoft 365 и има пристап до најновите модели, во случајот GPT-4 Turbo.
Една од најинтересните функционалности, барем во моментов, ќе биде користењето на Copilot GPTs. Ова е слична функционалност како онаа која ја најави и OpenAI во ноември. Станува збор за претходно тренирани генеративни трансформативни модели, креирани за специфична улога. На пример, некои може да ги научат корисниците како да играат некоја друштвена игра, други се корисни со различни рецепти за готвење, трети може да се користат како помош за математика за учениците.
Microsoft веќе најави повеќе различни примери за Copilot GPTs. Дел од овие ќе покриваат пишување, кодирање, дизајн, истражување или учење. Microsoft работи и на сопствен Copilot GPT Builder кој ќе им овозможи на корисниците сами да си ја прилагодат вештачката интелигенција на своите потреби.
Copilot Pro ќе доаѓа со неколку придобивки во однос на сегашниот модел. Претплатниците ќе имаат исто искуство без разлика дали го користат Copilot на веб, во некоја од апликациите на Microsoft, на десктоп или преку телефон. Софтверот од Office пакетот: Word, Excel, PowerPoint, Outlook, OneNote, за претпланиците на Copilot Pro ќе доаѓа со интегриран Copilot.
Дополнителна предност е користењето на актуелниот модел на GPT. Во моментов тоа е GPT-4 Turbo. Конечно, корисниците ќе може побрзo да креираат слики со Image Creator from Designer (порано Bing Image Creator).
Copilot for Microsoft 365 отворен за сите
Copilot Pro е наменет за поединци. Copilot for Microsoft 365 е понуда на вештачката интелигенција за деловните клиенти. Компанијата откри дека во раната програма која почна во ноември 2023 година, учествувале 40 отсто од Fortune 100 компаниите. Сега Microsoft е подготвен да го отвори Copilot for Microsoft 365 за компаниите од сите големини. Ова проширување ќе овозможи алатката да ја користат и малите и средни претпријатија.
Најавени и нови функционалности за бесплатниот Copilot
Microsoft не запира со надградбите исклучиво за претплатниците. Компанијата ќе понуди нови функционалности и за корисниците кои не плаќаат претплата и го користат Copilot бесплатно. Веројатно најголема нова функционалност ќе биде додавањето на GPTs. Сепак, креирањето на нови GPT модели ќе биде достапно единствено за Copilot Pro корисниците. Компанијата веќе најави што може да очекуваме, а првите GPTs кои ќе бидат достапни се специјализирани за фитнес, патувања, готвење и слично.
Мобилна апликација за Copilot е достапна за сопствениците на Android и iOS уреди. Мобилната апликација вклучува пристап до GPT-4 и Dall-E 3. Апликациите се достапни за преземање од Google Play и App Store.
Copilot ќе биде достапен и на мобилната верзија на Microsoft 365 и тоа и за Android и за iOS апликацијата.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
