На Google му требаше една година откако прв пат го забележавме нивниот автомобил во земјава, да ги додаде градовите и патиштата во Google Street View. Наместо од птичја перспектива на Google Maps, сега со Street View може да се спуштите директно на улиците на Скопје, Битола и другите градови, и да ги разгледате одблиску со панорамски фотографии во 360 степени, или пак да патувате виртуелно до Маврово или Охридското езеро. За да го користите сервисот, посетете ги Google Maps и од десниот агол спуштете го жолтото човече на местото од интерес.
Street View е популарен сервис на Google бидејќи дава нова перспектива врз мапите, овозможувајќи виртуелно присуство во посакуваната локација. Иако оваа алатка не е од којзнае каква корист пример за граѓаните на Македонија, кои си ги познаваат своите градови и околината; таа е секако покорисна за туристите кои сака да ја истражат земјата. На бизнисите им е препорачано дека можат да ги вметнат Google Maps, поточно фотографиите од Street View, на својот сајт за промоција.
Не сакам да дигам паника ама на Google Street View на Плоштад Македонија има НЕВИДЛИВ ЧОВЕК!!
https://t.co/M24PxWjv7S pic.twitter.com/stnmAL5Qc2
— Darko Arsovski (@dArsovec) October 8, 2015
Од Google велат дека приватноста на граѓаните ќе биде заштитена, а од Дирекција за заштита на личните податоци потврдија дека Google се обврзал да ги замагли лицата на луѓето и регистарските таблички на сите фотографии. Дополнително, постои можност да се пријавува фотографија со барање за дополнително замаглување доколку некој се чувствува дека му е загрозена приватноста.
„Се наметнуваат повеќе одговорности, со оглед на тоа дека се работи за приватност и заштита на податоци и на овој начин имаме предвид преземање на чекор по чекор напори. Ние, како Институција за заштита на податоците сме длабоко убедени дека соработката со ентитети како Google во овој сегмент е силно утврдување во градењето на цврст систем за заштита на податоците во земјава“, вели директорот на ДЗЛП, Димитар Ѓеорѓиевски.
Не се само тие градови, туку и Охрид, Прилеп, Велес, Струмица, Тетово, голем дел од Куманово се опфанати.