Бутан, една од најмалите азиски држави е помеѓу најголемите поддржувачи на Биткоин. Иако официјално не прифатиле криптовалута како платежно средство, Бутан неколку години „копа“ биткоин.
Евтината електрична енергија со години е најголем извоз на Бутан и на неа отпаѓа 30% од бруто домашниот производ. Сепак државните претставници последните неколку години, наместо за извоз, користат дел од електричната енергија за копање на криптовалути, поточно биткоин, пренесе Forbes.
Електричната енергија произведена со помош на водата од глечерите, не само што се користи за напојување на домаќинствата и индустријата, туку последните години се користи за комплексни математички пресметки. Решавањето на овие математички проблеми „произведува“ биткоини. Бутан заедно со Ел Салвадор се единствените две држави кои имаат државни рудници за криптовалути.
Бутан
Бутан или официјално Кралството Бутан е држава во Јужна Азија. Државата се наоѓа на источниот дел на Хималаите. На север се граничи со Кина, а на југ со Индија. Со површина од 38,394 km2 и 777 486 жители, Бутан е една од најмалите држави во Азија.Службен јазик кој се говори во Бутан е ѕонгка.
Официјално платежно средство се бутанскиот нгултрум (BTN) и индиската рупија (INR). Главен и најголем град во Бутан е Тимбу.
Државно копање на криптовалути
За разлика од властите во Ел Салвадор кои не ја кријат инвестицијата во криптовалути, Бутан ова го правел скришум. Веќе неколку години ја користеле ниската цена на електричната енергија во Бутан за копање на биткоин. Веста за локалниот весник The Bhutanese ја потврди и претставникот на државната холдинг компанија на Бутан, Druk Holding and Investments (DHI).
Druk Holding and Investments
Druk Holding and Investments e државна холдинг компанија во Бутан, основана во 2007 година од Кралската Влада на Бутан. Компанијата e создадена за да надгледува и управува со низа стратешки државни претпријатија, со цел да се поттикне одржливиот економски развој и да се подобри благосостојбата на бутанските граѓани.Во моментов DHI има разноврсен портфолио на инвестиции во сектори како хидроенергетика, рударство, финансии, здравство, образование и туризам. Дел од неговите подружници ги вклучуваат хидроенергетска компанија Druk Green Power Corporation (DGPC) која поседува и управува со повеќе хидроенергетски централи во Бутан; и Drukair Corporation Limited, Националната авиокомпанија на Бутан.
Покрај биткоин кој е главен фокус на дигиталните рудници во Бутан, во помал дел се „копа“ и етереум. DHI започнал да копа биткоин пред неколку години, кога вредноста на крипто валутата беше 5000 американски долари. За точната дата нема податоци, иако за првпат биткоин достигна 5000 долари во 2017 година, а последен пат цената на биткоин била околу 5000 долари во 2019 година. Многу краток период цената на криптовалутата беше околу 5000 долари и во 2020 година. Веројатно Бутан започнал со „копање“ на биткоин во 2019.
Целиот проект се финансира со продажбата на биткоини. Со сегашната цена, тоа е повеќе од доволно за плаќање на електричната енергија и на потребниот хардвер, па целиот проект се исплаќа самиот. Дел од биткоините се чува и се чека до следното „преполовување“, во 2024-та година. Заработката од блок ќе се намали од 6,25 на 3,125 биткони од блок. Со ова се очекува голем скок на цената на криптовалутата.
За жал, досега официјално не е откриен капацитет кој го имаат државните рудници на биткоин во Бутан.
Бутан е совршена локација за копање на криптовалути
Бутан има неколку предности кога е во прашањето копањето на криптовалути. Електричната енергија во Бутан во огромен дел се произведува во хидроелектрани. Инсталираниот капацитет на електраните е 2,326 MW, но процената е дека хидропотенцијалот е 30 000 MW. Пред 15 години, властите изработија план со кој капацитетот во 2020-та требаше од 1 480 MW да биде зголемен на 10 000 MW.
Според тој план во 2020-та година требаше да се завршат 4 хидроелектрани. Поради комбинација на комплексни геолошки, административни и финансиски проблеми, само една од предвидените 4 електрани е завршена, а уште една се очекува да започне да работи наскоро. За другите две нема предвидување кога би можеле да станат оперативни.
Покрај електричната енергија произведена во хидроелектраните која и натаму е најевтина, Бутан има предност и поради ладењето. Лоцирањето на „рудниците“ на високите планински превои ќе овозможи намалување и на електричната енергија која треба да се користи за ладење.
Предизвик за крипто рудниците се зимските месеци во кои производство на електрична енергија е ниско. Приоритет на Бутан е домашната потрошувачка и индустријата, па во овој случај или се гасат рудниците или се увезува електрична енергија.
Колкав е државниот капацитет за копање на криптовалути во Бутан
За големината на државниот капацитет, за жал нема официјални податоци. Неофицијално, Бутан бил заинтересиран за 100MW рудник, кој би бил приклучен на хидроелектрана.
Рудникот е далеку од најголемите потфати во светот, барем кога крипто-рударењето е во прашање, но е доволно во целост да го промени увозот на Бутан. Во просек, најголем дел на увозот во азиската држава отпаѓа на челик, ориз и нафта. Минатата година 10% од увозот на Бутан – 142 милиони долари бил компјутерски чипови. Во 2021-ва година, увозот на чипови бил 51 милиони долари. Во 2020-та на увозот на чипови биле потрошени само 1 милион долари. Според процената на Forbes, дури и со супер висока цена на чипови во 2021-ва година, бројот на увезени чипови би бил доволен за капацитет со големина од неколку фудбалски игралишта.
Партнерства со приватни рудници
Државните рудници на биткоин не се единствена инвестиција во крипто бизнисот за Бутан. Државата е во преговори со Bitdeer – компанија основана од кинескиот милијардер Ви Џихан. Партнерството со Бутан ќе ги зголеми капацитети на Bitdeer за 12%. Почетокот на градбата на крипто-рудникот во Бутан е најавен за втората половина на 2023 година. Druk Holding and Investments и Bitdeer најавија креирање заеднички фонд од 500 милиони долари за кој овој месец започнуваат да собираат инвестиции. Фондот ќе се користи за финансирање на изградба на податочни центри во Бутан, пренсе Coindesk.
Општата забраната за криптовалути која ја донесе Кина, и зголемениот данок и ограничувања кои ги воведоа дестинации како Шведска и Казахстан, придонесоа рудниците да бараат нови локации. Евтината електрична енергија и натаму е клучна за рентабилноста на копањето на криптовалути.
Свој придонес за интересот за биткоин во Бутан има и пандемијата која во 2020-та и 2021-ва година во целост ги уништи приходите од туризмот. Туристите кои сакаат да ги посетат будистичките манастири се значителен извор на приходи за Бутан, па беше неопходен нов извор на финансии.
Идејата за контејнери за транспорт кои наместо роба, ќе имаат модули за копање кои треба да се приклучат на електрична мрежа дојде од група кинески и сингапурски бизнисмени. Цената на контејнер со 700KW риг би била 800 000 долари. Проектот засега е ставен во мирување.
Недоволна транспарентност со државни пари
Потребата за дополнителни финансии на Бутан и идејата за користење на хидро потенцијалите на државата не се проблематични. Она што е поголем проблем е недостатокот на транспарентност кај властите кои криеле како се трошат парите на граѓаните.
Неколку години јавна тајна во Бутан е државниот крипто рудник, но единствен „доказ“ за ова биле објавите на LinkedIn за вработени на DHI во „crypto mining farmhouse“ или „Bitmain-made mining rigs“. Граѓаните не биле известени за капацитетите, па и оние кои имале нешто слушнато, верувале дека станува збор единствено за експериментални проекти.
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
