Имате кул идеја за оптимизација на јавен превоз? ЈСП Скопје организира „Скопски автобуски хакатон“!

Јавното сообраќано претпријатие Скопје, организира хакатон во кој учесниците треба да креираат софтвер за оптимизација на бројот на патници на неколку линии. Решението треба да ги направи поатрактивни линиите: 2, 5, 19, 22 и 57.

Настанот е организиран во партнерство со: Фондот за иновации и технолошки развој; Градот Скопје; Програмата за развој на Обединетите нации (УНДП); Факултетот за информатички науки и компјутерско инженерство од Скопје (ФИНКИ); Техничкиот факултет во Битола; Технолошки Парк (SEEUTechPark); Факултетот за информатика од Штип; и Факултетот за информатички и комуникациски технологии од Битола.

На хакатонот се поканети да учествуваат сите стартапи, поединци и компании кои сакаат да придонесат. Бројот на учесници во тимовите е ограничен на 5, а идејата е сепак финалното решение да биде софтвер.  Пријавите се отворени од 1. септември и ќе траат до 15. октомври. Хакатонот е стандарден, ќе трае 24 часа и ќе започне на 3. декември во 11:00.

Интересно е што изборот на награда овој пат е оставен на победниците, иако постојат неколку предложени решенија. Најдобриот го бира комисија, а победникот може да одбере некоја од следните награди:

• Паричен износ од 45.000 денари,
• Зимување за победникот/победниците со покриени трошоци за пат и сместување со полн пансион
• Реклама на автобуси во износ од 120.000 денари
• Реклама на автобуски постројки во износ од 120.000 денари

Сите учесници се добитници на бесплатен градски превоз во период од два месеци и билети за жичарница за двајца.

Заинтресираните пријавата можат да ја пополнат тука, а за изборот на фонтот на оваа веб-страница овој пат нема да дискутираме.