Misfit Village е хрватско развојно студио кое, ако не сме грешка, има работено на Go Home Annie добри три години. Се работи за длабоко-вознемирувачки психолошки трилер кој ве опкружува со паранормални настани и ве принудува да решавате најразлични загатки, се со цел да ги откриете тајните на одделот за репликација. Бројни хрватски студиа знаат како да направат квалитетни игри. Земете ја за пример Serious Sam, Unity of Command, Scum, или Kaptain Brawe. Дали и Go Home Annie може да стои раме-до-раме со овие великани?
Доме, слатки доме
Во Go Home Annie, играте со, погодувате Ани – девојка која работи за SCP фондацијата. Водена од мотото да се обезбеди, задржи и заштити (Secure, Contain, Protect) фондацијата има за задача да анализира, разреши и стави крај на опасни паранормални настани, како и на аномални субјекти. Како што ќе забележите уште во првите пет минути од играта, Go Home Annie има вакво нешто за извоз. Иако дејството во играта технички не е навистина сместено во Хрватска, многу од местата, особено куќата, остава силен балкански впечаток, со бројни натписи и предмети кои се препознатливи за Хрватска.
Со камерата која ќе ја пронајдете на прагот на куќата, ќе можете да гледате работи што се случиле или што се случуваат во некоја друга реалност, влечејќи силна инспирација за разрешување на одредени загатки. Користење на камерата за да навлегувате и манипулирање низ неколку реалности е мајстроски изведено и има за цел или да ве згрози или пак да ви ја заледи крвтта.
Чисто за пример, преку камерата гледате далматинец. Доколку се приближите до местото на кое наводно лежи далматинецот и потоа зумирате со камерата, кучето ќе биде префрлено од камерата во вистинскиот свет, пред вас. Но, не на начин кој би можел да ви се допадне.
Развојното студио врши одлична работа во градење впечатлива атмосфера, полна со вознемирувачка тензија. Како резултат, добивате интересен хибрид кој се поставува некаде помеѓу хорор игра и авантура полна со предизвикувачки загатки. Иако не се работи за долга игра, тие шест до осум часа се полни со внимателно осмислени места, загатки и вознемирувачки ситуации.
Некои загатки ни немаа логика и не ни беше јасно зошто така се имат поставено и зошто бараат баш такво нелогично решение кое само штети на имерзивноста. Како најдобар пример за ова е картонската кутија која стои пред прагот на куќата. Од некоја причина, не можете да ја отворите кутијата туку морате да најдете скалпел првин за да го исечете селотејпот.
Неколку вакви ситуации навистина не замислуваа и посакувавме изведбата да била малку поразлична. Други загатки, пак, бараат подолго експериментирање, надевајќи се дека на слепо или пак со добра доза среќа ќе налетате на решението. За жал, или среќа, играта не ве држи за рака, туку остава на вас да го најдете вистинскиот пат низ играта.
Од друга страна, нема никаква забелешка кон дизајнот на светот и музичката подлога. Јасно е дека многу време и енергија е посветено за веродостојно осмислување на бројните места, полнење со интересни елементи кои оставаат впечаток како да се вистински места. На сличен начин, бројните паранормални настани и аномалии се прикажани на начин на кој нема да можете да им останете рамнодушни. Аудио звуците се прекрасно вметнати во играта и значително допринесуваат до исклучително морбидни ситуации.
Go Home Annie е дефинитивно уште една квалитетно изработена хрватска игра. Доколку сакате хорор игри со силен акцент на истражување и решавање загатки, тогаш би требало да ја проверите играта на Misfit Village.
Повеќе детали за играта
- Произведува: Misfit Village
- Издава: Nordcurrent Labs
- Жанр: хорор авантура
- Платформа: Microsoft Windows, конзоли
- Излезена на: 10 декември 2024
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
рамО до рамО… и има ли некои звуци што не се аудио? и сигурно значително придонесуваат.
(лекторот нешто мрзлив или само така ми се чини?)