Неделава која полека останува зад нас беше исклучително плодна во поглед на бројните гејмерски збиднувања.
Уникатната игра за мрежно препукување, Tribes: Ascend, се воскреснуваше низ годините за да сега, конечно на подлегне на постојниот повик кон заборавот. Најновото надополнување, соодветно наречено Parting Gifts е воедно и последниот начин со кој авторите пробаа да ја испочитуваат играта. Серверите и понатаму се активни и Hi-Rez не кажаа дека ќе ги згаснат набргу, но јасно е на каде оди работата.
Кога сме кај делумно разочарувачки работи, Ubisoft признаа тешко дека ќе видиме нова игра од Assassin’s Creed и Far Cry серијалот во 2017 година, а и побрзаа повторно да ги задеваат фановите со нов Beyond Good & Evil 2 Concept Art. Периодов е значаен за Ubisoft и од друга страна. Имено, неодамна почнаа акционерските состаноци со кои Vivendi ќе проба да преземе нови чекори за да го припои францускиот издавач под нејзиното крило.
Играта која го вети небото и ѕвездите, а испорача многу, многу помалку, No Man’s Sky e под истрага од Advertising Standards Authority (ASA) затоа што агенцијата доби премногу пријави дека играта лажно се промовирала и не се одликува со сите работи за кои се зборувало и за кои пишува на предната страна на Steam. За тоа што ние мислиме за играва, можете да прочитате тука! Titanfall 2, пак, доаѓа на 28 октомври, а следново видео има две цели: да ве импресионира со гејмплејот, но и со исклучителната моќ на графичката Titan X!
Од креативните длабочини на RPG мајсторите InXIle произлезе посветата за работа на Wasteland 3; crowdfunding финансирањето ќе започне на 5 октомври, а финалниот продукт ќе се одликува со ко-оп и возила. Играта, пак, која никој не ја бараше, Homefront: The Revolution, срамежливо исфрли додаток за кампањата. Насловено како The Voice of Freedom, проширувањето е првото од трите планирани.
Се сеќавате ли на Bulletstorm? По сѐ изгледа и хитот од 2011-та година ќе доживее разубавување во форма на remaster верзија за PC, PS4 и Xbox One. Интересно е тоа што remaster-от ќе дојде од Gearbox, студиото кое стои зад популарниот серијал Borderlands и не толку популарната Battleborn. Оригиналот, меѓутоа, беше развиван од People Can Fly, студиото кое е познато и по Gears of War: Judgment. Кога сме кај Gears of War, четворката излегува на 11 октомври и за PC. Она што следи е првата мисија…
А некаде под полското небо, талентираните CD Project RED објаснија дека нивното најново чедо, Cyberpunk 2077 би можело да располага со „уникатен и малку поразличен“ мултиплеер и огромен „жив“ град. Сосема неповрзано, инди играта Firewatch стана доволно популарна за да се пренесе и на големото платно. Campo Santo, тимот кој стои зад играва ги здружи силите со Good Universe не само за развивање нова игра туку и за филмски проект кој ќе биде заснован за играта Firewatch.
System Rift e првото содржително DLC кое излезе за Deus Ex Mankind Divided и нуди интересно патување низ најразлични места од Deus Ex универзумот. Како и кај сите патувања, меѓутоа, ако сте заинтересирани само за конечната дестинација, а не и за разгледувањето, System Rift може да се комплетира за нешто помалку од два часа.
DICE, пак, најавија дека придружничката мобилна апликација за Battlefield 1 ќе доживее огромни промени во дизајнот како и промена во името. Згора на тоа, беа доволно љубезни да ни покажат како ќе изгледа кампањата за еден играч во Battlefield 1. За сѐ останато, консултирајте се со нашиот извештај!
И нивниот најголем конкурент никако не седеше мирен неделава. При мрежното играње, играта Call of Duty 4 Remaster ќе го има истиот спикер од оригиналната игра, а мод алатките за PC верзијата за Call of Duty: Black Ops 3 се во отворена бета. Кога сме кај Activision, да споменеме дека се шушка за излегувањето на Destiny 2 и за PC. Возбудени?
За крај, да споменеме дека длабоките попусти на GOG продолжуваат со полна пареа, Steam ќе добие значителни UX/UI промени, а играта Quantum Break излезе на Steam на 29-ти септември! Со крајот на неделава, доаѓа и крајот на месецот, а и чекањето на најдобрите септемвриски игри.
Која вест највеќе ви се допадна? Која пропуштивме? Кажете ни во коментарите, на друштвените мрежи или во гејминг секцијата на ИТ форум!
Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!
Доколку веќе имаш премиум членство, најави се тука.
