Facebook се ребрендира во Мета, проблемите остануваат

Најголемата друштвена мрежа ќе се преструктуира и ќе го промени своето име во Meta. Ребрендирањето треба да помогне да се разделат останатите делови компанијата од друштвената мрежа. Заедно со името, Facebook го менува и логото, па палецот наскоро ќе биде заменет со мета симболот.

„Нашиот бренд е толку поврзан со еден производ што нема никаква можност да покаже што сè правиме денес, и уште повеќе што ќе правиме во иднина“, вели Марк Закерберг.

Ребрендирањето е слично како она на Google кој не така одамна го промени своето име во Alphabet, и го раздели Google во повеќе помали компании. Слично како Google, и Facebook се обидува со името да биде одраз на повеќето различни делови кои сега се под друштвената мрежа. Во Google тоа беа делови како Android, Nest, автономните возила, вештачката интелигенција, а за Facebook ќе почекаме и ќе видиме подоцна. Она што е сигурно Instagram, Facebook, WhatsApp остануваат непроменети.

Сепак, центарот на најавата и презентација е визија на Facebook и Марк Закерберг за виртуелниот свет Metaverse. Верзијата која можевме да ја видиме во видеото за жал во моментов не постои. Моменталниот хардвер не поддржува најголем дел од функционалностите кои беа најавени од г. Закерберг, а тоа го потврди и самиот. Компанијата работи на неколку нови модели на сетови за проширена и виртуелна реалност кои во некоја подалечна иднина можеби и ќе ja „оживеат“ визијата на г. Закерберг.

Планот за Metaverse веќе неколку пати беше споделен и претходно, а овој пат можевме да видиме  и визуелно како ќе изгледа тоа. Од она што може да го видиме планот е своевиден спој на виртуелна и проширена реалност, кои ќе се испреплетуваат.

Делот со виртуелниот свет и неговата презентација изгледа помалку на видео игра, и иако изгледа забавно треба да видиме како ќе се развива во иднина. Колку е забавно, за луѓето кои играле Another Life веројатно многу; оние кои не се баш воодушевени од виртуелните светови, веројатно нема да бидат воодушевени ниту од ова. Презентацијата на проширената реалност е поимпресивна, ама реалноста во која еден пар тенки очила креира поширока слика од сите уреди креирани досега, е толку далеку во иднината, што е тешко и да се поверува дека ќе може да ја видиме во следните 10 години.

Facebook се надева дека ќе успее да креира платформа на која покрај игрите и фитнесот корисниците ќе доаѓаат и да можат да работат. За жал иако видеото е импресивно, никаде не можевме да видиме како светот изгледа низ очите на корисникот. Наместо ова како и на најголем дел од презентациите на проширена реалност, повторно сме во улога на посматрач од страна, кој ја гледа целата соба. Во реалноста корисникот сепак ќе може да види значително помал дел од собата, поточно она што го гледа пред себе.

Веројатно технологијата ќе биде најкорисна во едукативниот сектор и без сомневање ќе придонесе на начин кој сè уште не може ни да ги замислиме..

Што е веќе достапно за Metaverse

Презентацијата и најавата за Horizon Home покажа што може да очекуваме во блиска иднина. Home е влезна локација во која корисникот ќе го започне своето искуство секое влегување во Metaverse. Овие локации може да се споделуваат со останатите корисници и да се креира виртуелна околина во која може да ве посетат пријателите, иако живеете на различни локации. Наскоро, сопствениците на сетовите за виртуелна реалност ќе можат да ги заменат здодевните чет пораки со разговори во виртуелна реалност со Messenger VR.

Засега главниот производ кој компанијата го најави е Horizon Workrooms. Виртуелната канцеларија треба на корисниците да им помогне со креирање на околина која им е најсоодветна за најголема продуктивност, но и за средби во живо во виртуелниот простор наместо телефонски разговори.

Дополнително компанијата веќе најави дека работи унапредување на платформите за девелопери и креатори на содржини. Ова треба да овозможи во иднина креирање на објекти во виртуелниот простор кои не само што ќе изгледаат убаво туку ќе бидат и функционални, но и цел екосистем во кој ќе има многу нови работни места.

А хардвер?

Она што е достапно во моментов едноставно не е доволно за визијата која планира да ја реализира Facebook. Компанијата работи на нов сет за виртуелна реалност „Project Cambria“ со фокус токму на Metaverse.

Сетот ќе доаѓа со нови сензори кои ќе овозможат аватарот на корисникот не само да одржува контакт очи во очи кога зборува, туку и да ги имитира гримасите на корисникот. Ова треба да ја направи интеракцијата на корисниците поприродна, но секако ќе го отежне креирањето на аватарите. Сетот ќе може да презентира виртуелни објекти во физичкиот свет кои ќе бидат со подобра длабочина и перспектива. Дополнително напредокот треба да овозможи креирање на подобра слика која ќе изгледа пореално.

Првиот поглед на „Project Cambria“ може да го очекуваме следната година. Она што веќе е навестено е дека новиот сет нема да биде евтин.

 Ќе ги спаси ли Metaverse од стареење

Еден од најголемите проблеми на друштвената мрежа е стареењето на корисниците. Facebook не е атрактивен за помладите корисници како што се конкурентите како Snap и TikTok. Од 2019 до денес бројот на тинејџери од САД кои ја користат друштвената мрежа е намален 13 проценти, а проекциите се дека следните две година ќе се намали за дополнителни 45 проценти. Истовремено во овој период ќе има намалување од 4% во групата од 20 до 30 години, пренесе Verge.

Проблемот со прифаќањето на друштвената мрежа за корисниците помлади од 30 години не е нов и постои веќе десетина години, од 2012. Проблемот е толкав што Facebook најави верзија на Instagram за деца кои дури не се ниту тинејџери, иако ова може и да не се реализира со оглед на тоа дека Instagram е извор на повеќе контроверзии и е под истрага на американските законодавци.

Една од причината поради која нема нови млади корисници е што друштвената мрежа веќе е на глас дека е мрежа за корисници постари од 40 години, што секако не е примамливо за најмладите. Наместо ова тие користат TikTok за видео и Snap како најчеста алатка за комуникација со своите врсници.

Креирањето на Metaverse секако е чекор во насока во која на Facebook ќе започнат повторно да му се приклучуваат нови млади корисници. Ако судиме по првите реакции на прашањата кои ги постави Vice, Metaverse нема да донесе нови корисници од најмладата генерација. На прашањата за Metaverse неколкуте интервјуирани или се сомничави за новата платформа, или не се заинтересирани за виртуелен свет, иако сепак станува збор за мал број одговори.

Проблемите остануваат

Ако Facebook се надеваше дека со ребрендирањето ќе се заборави на куп проблеми кои периодот ги објавија неколку „свиркачи“ тоа не се случи. Компанијата останува цел на куп критики од невладини организации, политичари, но и од медиуми.

„Новото име на Facebook е Meta. Нивна мисија е да го измислат Metaverse, свет во кој ќе заборавиме што и направија на нашата постоечка реалност“, пишува Motherboard во текст со наслов „Закерберг претстави свет на фантазија во кој Facebook не е ужасна компанија“

„Визијата на Марк Закерберг зa хибриден/виртуелен свет го одвлекува вниманието од вистинските проблеми на компанијата – и нас од нашите“, вели New Republic.

Стани премиум член и доби пристап до сите содржини, специјален попуст на над 2.200 производи во ИТ маркет, верификуван профил и можност за огласување на ИТ Огласник. Плус ќе го поддржиш медиумот кој го градиме цели 16 години!

basic

членство

42 ден./мес

зачлени се

1337

членство

125 ден./мес

зачлени се
* плаќањето е на годишно ниво

Доколку веќе имаш премиум членство, најави се тука.

Добивај известувања
Извести ме за
guest
0 Коментари
Inline Feedbacks
View all comments

ит кариера

МАКЕДОНИЈА осигурување АД Скопје Виена Иншуренс Груп

Оглас за вработување на ORACLE DBA

види ги сите огласи на kariera.it.mk