Над 40 отсто од производите кои онлајн се продаваат од Кина се фалсификати или неквалитетни, велат податоците на кинеската новинска агенција Xinhua, кои ги пренесе Reuters.
Извештајот доаѓа со барање за итно преземање на мерки за заштита на потрошувачите. Затоа овие резултати им беа презентирани и на кинеските законодавци кои сега треба да пронајдат начин за да ги заштитат корисниците. Најчесто фалсификувани производи се наводно кожни новчаници и ташни, по што следат часовници, накит, облека и модни додатоци. На четврто место е електроника и паметните телефони.
Проблемот станува повпечатлив како што расне онлајн продажбата; само во првата половина на 2015 година е забележан пораст од скоро 50 отсто. Сега онлајн продажбата е 11,4 отсто од вкупната продажба во Кина. Најголем дел од онлајн пазарот во Кина очекувано отпаѓа на Alibaba – 57,7 отсто, по кој следи JD.com со 25 отсто.
Продажбата на фалсификати и неквалитентна роба е се поголем проблем и за продавниците кои сакаат да работат легално и да ги продаваат производите кои се прикажани на страната. Најголемата кинеска компанија Alibaba, токму од овие причини се соочува со забрана за продажба во САД.
