Од Product Hunt до $1,2 милиони: Вида Станиќ за особините што ги издвојуваат успешните стартапи 

Брзината одамна е една од најчесто повторуваните мантри во стартап светот. Но, брзо лансирање само по себе не значи дека сте изградиле компанија која ќе трае. За Вида Станиќ, основач и СЕО на на српскиот стартап Astute, вистинската предност се појавува кога брзината ќе се спои со нешто многу потешко за копирање: длабочината и значајноста.

Astute гради ВИ агенти кои автоматизираат голем дел од партнерствата меѓу B2B компаниите и креаторите, од администрацијата и следењето содржини до пронаоѓањето релевантни разговори, развивањето стратегии и мерењето резултати. Стартапот неодамна доби инвестиција од 1,2 милиони долари во pre-seed рунда, а потоа го лансираше производот на Product Hunt, каде што беше прогласен и за Product of the Day.

Во интервју за IT.mk, Станиќ зборува за тоа зошто стартапите мора да бидат и брзи и длабоки, што значи да се гради AI-native компанија од првиот ден и зошто најголемиот предизвик за еден основач често не е собирањето капитал или вработувањето, туку нешто многу потешко: делегирањето на задачи.

IT.mk: Што им помага на стартапите побрзо да успеат: брзото движење или градењето нешто навистина длабоко?

Вида Станиќ: Мојот краток одговор е: да изградиш нешто навистина значајно, со брзина што никој не ја очекува.

Ќе дадам пример за брзината. Неодамна, во еден понеделник затворивме oversubscribed pre-seed рунда, во средата го лансиравме производот на Product Hunt, а во четвртокот бевме Product of the Day, пред Cursor и OpenAI. Тоа е брзината на извршување што се гледа однадвор.

Но, немаше да можеме да го направиме тоа без длабочина. Неколку недели пред лансирањето работевме по 12 до 15 часа дневно, седум дена во неделата. Не само за да испорачаме брзо, туку да испорачаме нешто што навистина функционира и го менува начинот на кој нашиот пазар работи. Според мене, лошите производи не стануваат Product of the Day.

На крајот, брзината те носи до луѓето, но длабочината е причината поради која остануваат. Во моментов ви требаат и двете, а стандардот за двете постојано расте.

Дали AI-first стартапите јасно ќе ги надминат оние кои само додаваат ВИ врз постоечки производи и процеси?

Ако денес почнуваш компанија, градењето AI-native е логичен избор. Тоа прави голема разлика во брзината на извршување и во тоа колку можеш да направиш со многу мал капитал.

Но, искрено, зависи од тоа со кого се натпреваруваш. Ако тоа е друга нова компанија која само додава ВИ врз стар workflow, веројатно ќе победиш. Тие не можат да го следат твоето темпо или твојата структура на трошоци.

Но, ако се натпреваруваш со компанија која постои 20 години и сега додава ВИ, тогаш борбата е поинаква. Тие ги имаат мрежата, кредибилитетот и дистрибуцијата, а тоа што си AI-native не ти додава ништо од тоа автоматски.

Сепак, гледаме како постоечки компании губат позиции во категории со кои доминирале две децении од AI-native компании кои едноставно нудат подобра услуга и се движат побрзо. Дистрибуцијата е почетна предност, но не е непробојна одбрана.

Значи, да, AI-first ти дава реална предност против кој било конкурент. Прашањето не е дали ќе ги победиш компаниите без ВИ, туку дали можеш да ги решиш работите во кои традиционалните компании се посилни, додека тие се зафатени со додавање ВИ врз она што веќе го имаат.

Што најмногу ги забавува основачите: вработувањето, барањето инвестиции или регулацијата?

Ние не сме во индустрија со многу регулација, па затоа регулацијата досега не ни била ограничување. Затоа ќе одговорам за другите две.

Еден од нашите ментори рано ни кажа нешто што никогаш нема да го заборавам: како основач, постојано продаваш. Им продаваш на клиенти, им „продаваш“ на потенцијални вработени, им продаваш и на инвеститори. Вработувањето и собирањето инвестиции се само различни форми на продажба, со различен купувач.

Затоа, она што навистина ги забавува основачите не е ниту една од овие функции сама по себе. Станува збор за две работи. Првата е комбинираното оптоварување: продаваш на три фронта истовремено, со различен интензитет во различни периоди, и мораш да знаеш што е приоритет оваа недела, а што може да почека до следната.

Повеќето основачи не се забавени само од собирањето инвестиции. Ги забавува собирањето инвестиции додека истовремено вработуваат луѓе и затвораат клиенти, без систем кој им кажува како да управуваат со сето тоа.

Втората работа е делегирањето. Можеш да ги добиеш парите, можеш да ги вработиш луѓето и сепак да бидеш лош во пренесувањето на одговорноста. Основачите се познати по тоа што веруваат дека сè можат да направат најдобро. Токму тоа верување е вистинскиот предизвик, а тоа е нешто што никој не го става во анкета.