За многумина, најголемото богатство е знаење јазици, особено во денешното време. За таа цел имате на располагање бројни одлични апликации, од кои Duolingo и понатаму непобедливо стои на врвот. Но, како еден недостаток со Duolingo е тоа што и не е баш корисен на оние корисници кои знаат само македонски и сакаат да научат втор јазик. Поради тоа, одиме на второто најдобро нешто.
LingoHut е веб сајт кој го откривме сосема случајно откако сакавме да видиме дали има нешто интересно за учење од македонски на грчки јазик. Излезе дека вебсајтот и тоа како има, но не само за грчки, туку за бројни други јазици. Со посетување на веб сајтот, ви се нудат две опции: да изберете кој јазик го зборувате и потоа да изберете кој јазик сакате да го учите. Ова значи дека имате бројни интересни комбинации каде објаснувањата и инструкциите можат да ви се на, пример, македонски, српски, или бугарски, а јазикот кој сакате да го учите да биде еден од 45 понудени.
На располагање имате бројни лекции со релативно јасни објаснувања, примери и изговори, но вреди да се спомене дека ова е само вовед и дека за нешто поозбилно потребна ви е подинамична метода од сувопарното сервирање кое се наоѓа тука. Но, како за почеток, сметаме дека нема да погрешите со она што ќе го најдете кај LingoHut.
Кој е јазикот што навистина сакате да го научите? И зошто!? Ви се допаѓа ли она што го има на сајтот или би ни препорачале некоја друга алатка или сајт за учење јазик? Кажете ни во коментарите!
